FIDOYI PROFILAKTIKA INSPEKTORI

Navoiy mahallasidagi profilaktika katta inspektori Alisher Xudoyberganov fuqarolar yigʻini masʼullari bilan hamkorlikda hududda yashovchi, huquqbuzarlik sodir etish ehtimoli boʻlgan fuqarolarning turmush tarzini, mavjud muammolarni oʻrganib kelmoqda.

Alisher Qangli ovulidagi 29-sonli maktabni tugatgan. 2013-2014-yillarda Surxondaryo viloyati  Termiz shahrida bir yillik muddatli harbiy xizmatni oʻtab, 2014-yilda Oʻzbekiston Respublikasi IIV Akademiyasiga oʻqishga kirdi. Akademiyada fuqarolarning huquqlari, erkinliklari va qonuniy manfaatlarini himoya qilish, jamoat tartibini saqlash, shaxs, jamiyat va davlat xavfsizligini taʼminlash borasida chuqur bilimlarni oʻzlashtirib, 2018-yilda “Huquqbuzarliklar profilaktikasi faoliyati” mutaxassisligi boʻyicha yurist kvalifikatsiyasiga ega boʻldi.

Mahallaning profilaktika inspektori huquqbuzarliklar profilaktikasini amalga oshirishda tegishli idoralar bilan hamkorlik qilib, zarur paytlarda aholiga huquqiy, ijtimoiy, psixologik va boshqa turdagi yordam koʻrsatib, huquqbuzarlik sodir etish ehtimoli boʻlganlar oʻrtasida jamiyatda qabul qilingan xulq-atvor normalari va qoidalarini singdirishga qaratilgan chora-tadbirlarni amalga oshirib kelmoqda.

Mahalla raisi, hokim yordamchisi, xotin-qizlar faoli, yoshlar yetakchisi bilan birgalikda tashkil etilayotgan bu kabi targʻibot tadbirlariga mahalladagi 733 ta xonadonda istiqomat qiluvchi 4429 nafar aholining barchasi qamrab olinmoqda.

Inspektor ishtirokida oʻtkazilib kelinayotgan “Xavfsiz tun”, “Payhon”, “Turmush”, “Xavfsiz hudud” tadbirlari aholi osoyishtaligini taʼminlashda muhim omil boʻlmoqda.

Koʻrilgan chora-tadbirlar tufayli mahalla hududida osoyishtalik, uyushmagan yoshlar va oʻsmir yoshlarning boʻsh vaqtlarini mazmunli oʻtkazishga qaratilgan turli koʻngilochar tadbirlar aholi maʼnaviyatini yuksaltirish, oʻsib kelayotgan yosh avlodni sportga, sanʼat va kasb-hunar oʻrganishga, tadbirkorlik bilan shugʻullanishga jalb etish imkonini bermoqda.

Biz esa mahalla osoyishtaligini taʼminlash, huquqbuzarliklarning oldini olish, jamoat tartibini saqlash borasida samarali mehnat qilib kelayotgan A.Xudoyberganovning ish faoliyatiga zafarlar tilaymiz.

Tuman hokimligining Axborot xizmati.