"Jonajon yurtim farovonligiga hissa qoʻshaman” shiori ostida barcha ovul va mahallalarda obodonlashtirish, koʻkalamzorlashtirish ishlari boshlandi

Obod yurtning fayzi, tarovati oʻzgacha boʻladi. Zotan, ozodalik, poklik, saranjom va sarishtalik yurtimizning yanada koʻrkam boʻlishiga zamin yaratadi. Bunda xalqimizning yillar davomida shakllangan ezgu qadriyati – hashar muhim oʻrin tutadi.

Qoraqalpogʻiston Respublikasi “Nuroniylar” jamoatchilik Kengashi tashabbusi bilan “Jonajon yurtim farovonligiga hissa qoʻshaman” shiori ostida Amudaryo tumanining barcha ovul va mahallalarida obodonlashtirish, koʻkalamzorlashtirish ishlari qizgʻin boshlab yuborildi.

Jumladan, 25-fevral kuni tumanning Olmazor mahallasida boʻlib oʻtgan hashar ham yosh avlod qalbida milliy anʼanalarimizni qadrlashga, muqaddas qadriyatlarimizni mustahkamlashga xizmat qildi.

Darhaqiqat, hashar — necha ming yillar mobaynida odamlarning boshini qovushtirib, ularni insonparvarlik, saxovatpeshalik, saranjom-sarishtalik kabi ezgu amallarga chorlaydi. Ushbu qadriyatning yana bir eʼtiborli jihati shundaki, u insonlar oʻrtasida mehr-oqibat rishtalari, hamjihatlik, ayniqsa, yoshlar qalbida mahalla-koʻyga, ona-Vatanga muhabbat, daxldorlik tuygʻularini mustahkamlaydi.

Olmazor mahallasida boʻlib oʻtgan hasharda yoshlar, oʻrta yoshli aka-opalar, hamda buvi va buvijonlar faol ishtirok etishdi.

Ular erta tongdan koʻchalarini, hovlilari atrofini, guzar va hiyobonlarni, ariqlar, koʻcha va yoʻlaklarni hamda bolalar maydonchalarini tartibga keltirishdi. Shu bilan birga daraxtlarni oqlab, ularga shakl berdilar. Hasharda ariq boʻylariga, avtomobil yoʻllari yoqalariga mevali va manzarali daraxt koʻchatlari ekildi. Ekilgan har bir niholni yaxshi parvarish qilish, uning kelajakda mevali daraxt boʻlib boʻy choʻzishi uchun ularning har biriga bir nafar yosh biriktirildi.

Hashardan soʻng ishtirokchilarga issiq ovqat tortildi. Mahalladagi yoshi ulugʻ onaxonlar, yosh kelinchaklar doshqozonda sumalak qaynatishdi. Ular sumalak atrofida yurtimizga tinchlik, omonlik, totuvlik, qut-baraka tilashdi.

Bu kabi hasharlar tumanning barcha hududida boʻlib oʻtdi.

Farovon mahallasida boʻlib oʻtgan hashardan soʻng, mahallaning “Yakkatut” va “Kimyogarlar” kuchasida bahorning ilk taomi – sumalak qaynatildi. Doshqazon atrofida yigʻilgan barcha yoshi ulugʻ onaxonlar, qiz, kelinchaklar dilidagi bor ezgu niyatlarini aytib sumalak uchun kerakli boʻlgan masalliqlarni solishdi.

Shu oʻrinda aytish lozimki, sumalak qaynatish momomlarimizdan meʼros boʻlib qolgan azaliy qadriyatimiz. Uning tayyorlanish tarixi haqida qoʻplab rivoyatlar tarqalgan.

Shulardan biri: dehqon olib qoʻygan oxirgi donini tezroq ekish uchun yaxshi niyatlar bilan oldinroq ivitib qoʻyadi. Lekin birdan ob-havo buziladi. Bugʻdoy idishda nish urib oʻsa boshlaydi, ob-havo yaxshilanavermaydi. Dehqon oila aʼzolari och turgan paytda bugʻdoyni butunlay nobud qilmaslik choralarini izlay boshlaydi. U tavakkal qilib nish urgan va ancha boʻy koʻtargan donni qiymalaydi va xotiniga bundan taom pishirishni buyuradi. Uy bekasi uni uzoq vaqt qaynatadi. Qarangki, oqkoʻngil dehqonning niyati xolis chiqadi. Undan hidi yoqimli, oʻzi toʻyimli, mazasi esa tanovul qilgan kishining uzoq vakt esida qoladigan darajadagi shirin taom hosil boʻladi. Bu taom borgan sari xalq oʻrtasida keng tarqalib, bahorning eng lazzatli taomiga aylanadi.

Bu kabi tadbirlar jumladan, hashar hamda sumalak qaynatish marosimi tumanning Doʻstlik mahallasida ham boʻlib oʻtdi.

Hashar davomida erta tongdan turib koʻchalarni supurib-sidirib, tevarak- atrofga suv sepib, har xil gullar ekish har bir xonadonga chiroy bagʻishlashi aytib oʻtildi. Bu borada yoshlarga ugit va nasihatlar berildi.

Milliy urf-odatlarimizni, qadriyatlarimizni oʻzida mujassam etgan milliy taomning tayyorlanishi har yildagidanda koʻtarinki ruhda boʻlib oʻtdi.

Sumalak qaynatish jarayonida uning foydali xususiyatlari aytib oʻtildi. Shuningdek, doshqazon atrofida onaxonlar, qiz-juvonlar, jajji bolajonlar raqsga tushib, goʻzal qoʻshiqlar hirgoyi qilishdi.

Darhaqiqat, sumalak lazzatli taom boʻlish bilan birga darmondori hamdir. Uning tarkibida inson organizimi uchun zarur boʻlgan barcha oqsil va uglevodlar jamlangan.

Erta tongdan doshqozonda qaynayotgan ivitilgan bugʻdoyni shu holga keltirguncha ancha mehnat talab qilindi. Bu galgi sumalakni ham Doʻstlik mahallasidagi buvijonlar hamjihatlik va ogʻizbirchilikda tayyorlashdi.

Sumalak atrofida yurtimiz tinch, osmonimiz musaffo boʻlishi, yurtimiz kundan-kunga rivojlanishi kabi ezgu tilaklar aytilib, bolalarning shoʻx-shadon kulgulari yangradi.

Tuman hokimligining Axborot xizmati.