HAYoT MAZMUNI

Hayot mazmuni... Uni har kim har xil tasavvur qiladi. Mening nazdimda esa hayot mazmuni - el-yurtga xizmat qilish, yurt koriga yarash.

Shu maqsadda harbiy xizmat burchimni ado etganimdan soʻng shartnoma asosida shu sohada mehnat faoliyatimni davom ettirdim. Dastlab 1997-yilda Qoraqalpogʻiston Respublikasi Mudofaa ishlari boshqarmasida ish boshlagan boʻlsam, keyinchalik Moʻynoq tumani, Qoʻngʻirot tumani mudofaa ishlari boʻlimlarida ishladim. 2012-yildan beri Amudaryo tumani mudofaa ishlari boʻlimida chaqiruv boʻlinmasi boshligʻi katta yordamchisi vazifasida ishlayapman.

Chaqiruv boʻlinmasi asosan 18 yoshdan 27 yoshgacha boʻlgan, salomatligiga koʻra Qurolli Kuchlar safida harbiy xizmatni oʻtashga yaroqli yigitlarni chaqiruvga tayyorlash bilan shugʻullanadi.

Xizmat vazifamiz masʼuliyatli va ayni paytda sharaflidir. Chunki biz tayyorlagan yigitlar Vatanimiz sarhadlari daxlsizligi, xalqimiz tinchligi, osoyishtaligi yoʻlida xizmat qiladilar.

Shunisi quvonarliki, bizning tumanimiz yigitlari Vatan oldida harbiy burchini ado etishni oʻzlarining oliy maqsadi, deb biladilar. Buni chaqiriluvchilarning soni koʻpligida, harbiy xizmatga borish istagi kuchli ekanligida ham koʻrish mumkin. Yigitlar Armiyaga borish istagida oʻzlari murojaat qiladilar. Ular bilan maxsus suhbatlar oʻtkazilgan chogʻda:

– Armiyaga nima uchun bormoqchisan? - deb soʻraganimizda, bergan javoblaridan quvonib ketadi odam. Chunki ular oʻz ona yurtiga xizmat qilishga, harbiy libos kiyib, tinchlik-osoyishtaligimizni qoʻriqlashga hissa qoʻshishni istashadi.

Bizning tumanimiz chaqiriluvchilarning koʻpligi jihatidan Nukus shahridan soʻng Qoraqalpogʻistonda ikkinchi oʻrinda turadi.

Bu - oʻsib kelayotgan yosh avlod bilan boʻlimimiz xodimlari astoydil ishlashayotgani samarasidir.

Fursatdan foydalanib, barcha kasbdoshlarimni Vatan himoyachilari kuni bilan tabriklayman!

Bayram JUMANBETOV,

tuman mudofaa ishlari boʻlimi chaqiruv boʻlinmasi boshligʻining katta yordamchisi, kichik serjant.

(Foto - http://www.uza.uz)