TADBIRKORLIKDA YaNGI SOHA

Tumanimizning Durunki mahallasida istiqomat qiluvchi Muyassar Vaisova internet orqali chuvalchang yetishtirishga oid videolarni koʻrib qoladi va unda bu ishga qoʻl urish ishtiyoqi tugʻiladi.

U 2022-yil oktyabr oyida mahallasining hokim yordamchisi Sarvarbek Komiljonovga murojaat qilib, 20 mln. soʻm miqdorida imtiyozli kredit olishga muvaffaq boʻldi. Ushbu mablagʻlarni Kaliforniya qizil chuvalchanglarini sotib olish uchun sarfladi.

U oʻz hovlisi tomorqasida chuvalchanglarni boqib, ularni muntazam oziqlantiradi.

– Kaliforniya qizil chuvalchangi kechasi-yu kunduz ishlaydi. Bir jinsli boʻlgani uchun tez koʻpayadi. Bir haftada bitta tuxum qoʻyadi va tuxumdan oʻrtacha 16 tadan 24 tagacha nasl qoldiradi. Chuvalchang ishlab chiqaradigan biogumus ekologiya uchun foydali boʻlish bilan bir qatorda, bitta koʻchatdan oʻnta koʻchatning hosilini olish mumkin, – deydi u.

Darhaqiqat, chuvalchanglarning ichagida gumin kislotasi bor. Undan oʻtgan goʻng shu kislota bilan toʻyinib, oʻsimliklar uchun ona sutidek taʼsir qiladigan eng zoʻr oʻgʻitga aylanadi. U oddiy oʻgʻitga qaraganda kamida 10 baravar kuchli va tabiiy boʻladi. Shuning uchun ham biogumus bilan oziqlantirilgan koʻchatlar oddiy oʻgʻit bilan oziqlantirilgan koʻchatlarga qaraganda 15-20 kun ilgari rivojlanib, hosil beradi.

Buni yaxshi anglagan Muyassar Vaisova yaqinda yana hokim yordamchisiga murojaat qilib, tomorqasiga issiqxona qurishda amaliy yordam soʻradi. U sotuvdan ortgan biogumuslarini issiqxonasidagi poliz ekinlariga ishlatib, erta bahordan bozor rastalarini poliz mahsulotlari bilan toʻldirmoqchi.

Biz esa tinib-tinchimas Muyassar Vaisovaning faoliyatiga omad tilaymiz!

Fotima Eshimbetova.