Bosuv mahallasining yoshlar yetakchisi nimalar bilan band?

Oʻzbekiston Respublikasi Prezidentining 2022-yil 19-yanvar kungi “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi qaroriga asosan har bir shaharcha, qishloq, ovulda, shuningdek, shaharlar, shaharchalar, qishloqlar hamda ovullardagi har bir mahallada yoshlar yetakchisi lavozimi joriy etilgan edi.

Jumladan, Amudaryo tumanining ham 49 ta ovul va mahallalarining har biriga 1 nafar yoshlar yetakchisi tayinlandi. Yetakchilar ish faoliyatini boshlaganiga bir yil boʻldi. Lekin, mana shu qisqa davrga qaramasdan ular tomonidan yoshlarning muammolarini hal qilish, boʻsh vaqtini mazmunli oʻtkazish, bandligini taʼminlash boʻyicha salmoqli ishlar amalga oshirildi.

Amudaryo tumanining Bosuv mahalla fuqarolar yigʻini yoshlar yetakchisi Nigora Bazarbayeva ham oʻz ish faoliyatini boshlagan kundan boshlab mahallasidagi har bir yoshning xonadonida boʻlib ular bilan birma-bir suhbatlashdi. Suhbatlashish asnosida muammoli yoshlar ruyxatini shakllantirib, hokim yordamchisi bilan hamkorlikda muammolarni hal qilishga kirishdi.

Yoshlar yetakchisining va hokim yordamchisining bevosita koʻmagi bilan mahallaning yosh kelinlari Oyjamol Choʻtova hamda Tursunoy Matyusupovalar tikuvchilik tsexini ochishib, 3 nafar mahalladoshining ham bandligi taʼminlanishiga oʻz hissalarini qoʻshishdi. Ushbu tsehda ular turli koʻrpa va yostiqlarni arzon narxlarda tikib, xalqimizga beminnat xizmat koʻrsatishmoqda.

Yoshlar bu bilan ham cheklanib qolmasdan hokim yordamchisiga murojaat qilib, 33 mln. soʻm miqdorida imtiyozli kredit oldilar. Ular ushbu mablagʻ evaziga oʻz tomorqalarining 2 sotix maydonida issiqxona qurib, poliz mahsulotlarini yetishtirshmoqda.

Yoshlar yetakchisi va hokim yordamchisining koʻmagi bilan oʻz tadbirkorlik faoliyatini yoʻlga qoʻygan yoshlardan yana biri Sabohat Tursinbayeva ham 20 mln. soʻm miqdorida imtiyozli kredit oldi. Sabohat ushbu mablagʻ evaziga 25 quti asalari sotib olib, asal yetishtirishni boshlab yubordi.

Oʻz bobosidan asalarichilikning sir-asrorlarini puxta egallagan Sabohatning asalarilari yil boshida 25 quti boʻlgan boʻlsa, yil yakuniga kelib 45 quti boʻldi. Bugungi kunda asalarilardan yetishtirilayotgan asallar xaridorgir boʻlib, bozor rastalarini tabiiy va arzon asallar bilan toʻldirmoqda.

Mahallada ushbu yoshlardan tashqari yoshlar yetkachisi va hokim yordamchisi koʻmagi bilan 2022-yil davomida bandligi taʼminlangan, tadbirkorlik faoliyatini yoʻlga qoʻygan yana 55 nafar yoshlar bor. Ular ham tadbirkorlikning turli yoʻnalishlari boʻyicha oʻz faoliyatini yoʻlga qoʻygan.

 Jumladan, 14 nafar yoshlarga imtiyozli kreditlar, 24 nafariga qishloq xoʻjaligi sohasi bilan shugʻullanishlari uchun yer maydonlari, yana 7 nafariga esa takroriy ekin ekishi uchun yer maydonlari ajratib berildi.

Mahalladagi ijtimoiy himoyaga muhtoj yoshlarning 37 nafariga ham “Yoshlar daftari” balansidan turli yordamlar koʻrsatildi.

Yoshlar yetakchisi tomonidan amalga oshirilayotgan buningdek saʼy-harakatlar natijasida mahalla yoshlarining jamiyat hayotiga daxldorligi mustahkamlanib, ertagi kun uchun masʼuliyati ortmoqda.

Tuman hokimligining Axborot xizmati.