DONIYoR ShAHARChA YoShLARI BILAN HAMKOR, HAMQADAM

Har qanday davlatning kelajagi yosh avlod taʼlim-tarbiyasi bilan chambarchas bogʻliq. Chunki yoshlar ertagi kun egalaridir.

Mamlakatimizda shu boisdan ham oʻsib kelayotgan yosh avlodni maʼnaviyatli, maʼrifatli, yurt koriga yaraydigan insonlar qilib voyaga yetkazishga ulkan eʼtibor qaratilmoqda. Prezidentning “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi Qarori bu boradagi ishlarni yuqori bosqichga koʻtarishga asos boʻlayotir.

Qarorga muvofiq har bir ovul, mahalla, shaharchada faoliyat boshlagan yoshlar yetakchilari oʻz hududida yoshlar siyosatini samarali amalga oshirmoqda. Ular “Yoshlar balansi”ni shakllantirib, bu haqdagi  maʼlumotlarni “Yoshlar daftari” va “Yoshlar portali”ga kiritib boradi.

Yoshlar yetakchilariga yoshlar orasida maʼnaviy-maʼrifiy ishlarni yaxshi yoʻlga qoʻyish, tarbiyasi ogʻir, maʼnaviy koʻmakka muhtoj yoshlarni “Bir nuroniy oʻn yoshga masʼul” loyihasi orqali va boshqada taʼsir choralari orqali tarbiyalash hamda jamiyatga faol aralashuviga erishish, yoshlarning boʻsh vaqtlarini mazmunli oʻtkazish maqsadida kitobxonlikka, sanʼatga, axborot-texnologiyalarini puxta egallashga, kasb-hunar oʻrganishga keng jalb etishdek masʼuliyatli vazifalar yuklangan.

Tumanimizning Qipchoq shaharchasi yoshlar yetakchisi Doniyor Vaisov ushbu lavozimga tayinlanganidan beri oʻz xizmat vazifasini sidqidildan ado etishga harakat qilayapti. Hududda 502 xonadonda 2606 nafar aholi istiqomat qiladi. Shularning 718 nafarini 14-30 yoshdagilar tashkil etadi.

Shaharcha fuqarolar yigʻini masʼullari bilan birgalikda oʻtkazilgan xatlov natijalariga koʻra, 2022-yil boshida 21 nafar yoshlar “Yoshlar daftari”ga kiritildi. Shaharcha yoshlar yetakchisi  tavsiyasiga koʻra, ularga zarur yordamlar koʻrsatildi va daftardan chiqarildi. Ularning 6 nafariga imtiyozli foizlarda kredit ajratildi va oʻz-oʻzini band qilishiga erishildi, 1 nafari ishga joylashtirildi, 4 nafar oliygoh talabalarining toʻlov shartnoma pullari toʻlab berildi, 2 nafariga haydovchilik guvohnomasi olish uchun oʻquv badali, 1 nafarining safarbarlik chaqiruv rezervida xizmat qilish badali, ikki nafarining zamonaviy kasbga oʻqish badali toʻlab berildi, 4 nafariga subsidiya asosida tikuv mashinasi berildi, 1 nafarining davolanish xarajatlari qoplab berildi.

Joriy yilda ham yoshlarni vatanparvarlik ruhida tarbiyalash va ularning intellektual salohiyatli boʻlib voyaga yetishiga koʻmaklashish maqsadida 14-yanvar – Vatan himoyachilari kuniga bagʻishlab qator tadbirlar oʻtkazdi. Umuman, shaharcha yoshlarining boʻsh vaqtlarini mazmunli va maqsadli oʻtkazishlari uchun turli milliy sport oʻyinlari, yoshlar festivallari va boshqada madaniy-maʼrifiy tadbirlar oʻtkazilmoqda. Bunda yoshlar yetakchisiga faol yoshlar, hududdagi umumiy oʻrta taʼlim, maktabgacha taʼlim tashkilotlari yosh kadrlari yaqin hamkor, koʻmakchi boʻlishayapti. Ijtimoiy ogʻir ahvolga tushib qolgan, maʼnaviy koʻmakka muhtoj yoshlar bilan ishlashishda esa “Bir nuroniy – oʻn yoshga masʼul” loyihasi doirasida hududdagi ulkan hayotiy tajribaga ega pir-u badavlat onaxonlar, otaxonlar bilan oʻrnatilgan hamkorlik samarali natijalar berayapti.

Quvonarlisi, shaharcha yoshlari qiziquvchan, intiluvchan, barchasining ham oʻz hayotiy rejalari, orzulari bor. Yetakchi Doniyor Vaisov ular bilan doimo hamnafas, hamqadam.

Sevara Ismoilova