YaNGI YIL BAYRAMIGA BAGʻIShLANGAN TADBIR OʻTKAZILDI
“Istiqlol” toʻyxonasida 38-IDUMning 1-sinf oʻquvchilari ishtirokida “Yangi yil archasi” tadbiri oʻtkazildi.
27-dekabr kuni boʻlib oʻtgan tadbirda boshlangʻich sinf oʻqituvchilari hamda oʻquvchilarning ota-onalari ishtirok etishdi. Bayram tadbirini 38-IDUM direktori Bahrom Boltaboyev kirish soʻzi bilan ochib berdi va homiylik qilgan “Istiqlol” toʻyxonasi rahbari Gulasal Oʻrozimbetovaga maktab maʼmuriyati tomonidan chuqur minnatdorchilik bildirdi.
Tadbir davomida maktab direktorining maʼnaviy-maʼrifiy ishlar boʻyicha oʻrinbosari Nazokat Yusupova, 1-“A” sinf rahbari 35-yillik ish tajribasiga ega boshlangʻich sinf oʻqituvchisi Raʼno Avazmurodova ham homiy Gulasal Oʻrozimbetovaga minnatdorchilik bildirib, bolajonlarning murgʻak qalblariga yangi yil shukuhini olib kirganligi, bunday tadbirlar bolalar oʻrtasida oʻzaro bir-biriga hurmat, ishonch va doʻstona mehr-muhabbatni shakllantirishda katta ahamiyatga ega ekanligini aytib oʻtdi. Qolaversa, bu bolajonlar kelajakda Oʻzbekistonning bilimli va albatta, baxtli bolalari boʻlishi shak-shubhasizligini, 2023-yilning yurtboshimiz tomonidan “Insonga eʼtibor va sifatli taʼlim” yili deb eʼlon qilinganini soʻzladi. Soʻzga chiqqan bir guruh ota-onalar ham barchani bayram bilan tabriklab, saxovatpesha tadbirkor Gulasal Oʻrozimbetovaga oʻz minnatdorchiliklarini izhor etdilar.
Bayram tadbirida bolajonlar oʻzlari yod olgan sheʼr, kuy va qoʻshiqlar, jozibador raqslarni ijro etib, davraga oʻzgacha fayz kiritdilar. Bolajonlarning sevimli Qorbobo va Qorqizi homiy Gulasal Oʻrozimbetova tomonidan tayyorlangan sovgʻalarni taqdim etdilar.
Tadbir yakunida tadbirkor G.Oʻrozimbetova soʻzga chiqib, maktab maʼmuriyati, jajji bolajonlar va ularning ota-onalarini kirib kelayotgan yangi yil bilan qutlab, kelajakda shu bolajonlar bilimli, fidoyi insonlar boʻlishiga tilakdoshlik bildirdi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
