INSONPARVARLIK TAMOYILI ASOSIDA

Oʻzbekiston Respublikasi Oliy Majlisi Senatining 2014-yil 14-noyabrdagi "Oʻzbekiston Respublikasi Konstitutsiyasi qabul qilinganligining yigirma ikki yilligi munosabati bilan amnistiya toʻgʻrisida”gi qarori xalqimizning oʻziga xos bagʻrikenglik va kechirimlilik fazilatlarining yorqin ifodasi boʻldi.

Ushbu qaror eʼlon qilinganidan keyin tuman prokuraturasi tomonidan ham bir qancha ishlar amalga oshirildi. Qaror qabul qilinganidan beri oʻtgan davr mobaynida turli muddatlarga ozodlikdan mahrum etilgan 7 nafar amudaryolik fuqaro avf etilib, oʻz oilalari bagʻriga qaytdi. Bu fuqarolar tuman hokimligi qoshidagi ijtimoiy koʻnikish markaziga biriktirilib, ularga tegishli yordamlar koʻrsatilmoqda.

Oʻzbekiston Respublikasi Vazirlar Mahkamasining 1996-yil 1-iyuldagi 318-sonli farmoyishiga asosan jazoni oʻtash joylaridan ozod boʻlgan shaxslarga pasport olish, oziq-ovqat mahsulotlari xarid qilish,transport xarajatlari va boshqa ehtiyojlari uchun eng kam oylik ish haqining jami besh yarim barobarigacha miqdorda moddiy yordam koʻrsatish belgilangan.

Hozirgi kunda tuman prokuraturasi tomonidan jazoni oʻtash joylaridan ozodlikka chiqarilgan fuqarolar uchun belgilanganyordamlarning koʻrsatilishi, ularning ishga joylashtirilishi borasidagi ishlar qatʼiy nazorat qilinmoqda. Shu bilan birga ularning takroriy jinoyat sodir qilishlarining oldini olish, ularning jamoatchilikka qoʻshilib, ijtimoiy hayotga koʻnikib ketishlarini taʼminlash masalasi ham komissiya aʼzolari bilan birgalikda hal etilmoqda.

Amnistiya qaroriga asosan jazoni ijro etish muassasalaridan ozod qilingan 7 nafar fuqaroning sogʻliklari tekshirilib, ularga tegishli tibbiy yordamlar koʻrsatilmoqda. Shu bilan birga bu fuqarolarning bandligini taʼminlash masalasi tuman bandlikka koʻmaklashish markazi bilan hamkorlikda muvaffaqiyatli hal etilmoqda.

Tuman prokuraturasi oʻzini oʻzi boshqarish organlari hamda ichki ishlar boʻlimi bilan hamkorlikda ozodlikka chiqarilgan fuqarolarning nazoratsiz qolib, yana qayta jinoyat sodir etishlarining oldini olish maqsadida ular bilan uchrashuvlar va suhbatlar oʻtkazmoqda.

Farxod ALLAMBERGENOV, tuman prokurori,