Yangi yil yarmarkasi: arzon va sifatli mahsulotlar xarididan xalq mamnun

Yurtimizda turli bayramlar oldidan aholiga arzon narxlarda sifatli qishloq xoʻjaligi va oziq-ovqat mahsulotlari yetkazib berish anʼanaga aylangan. Sababi, bayramlar arafasida isteʼmol bozorlarida oziq-ovqat mahsulotlariga talab oshishi tufayli “olibsotarlar” tomonidan narxlarni sunʼiy oshirib yuborishi holatlari uchrab turadi.

 Mana shunday holatlarning oldini olish, aholini zarur boʻlgan birinchi darajali oziq-ovqat mahsulotlari bilan toʻliq taʼminlash, narxlar barqarorligini saqlash maqsadida har yili Respublikamizning barcha tuman, shahar markazlarida oziq-ovqat yarmarkalari tashkil etiladi.

Amudaryo tumanida ham shu yilning 1-dekabr kunidan boshlab “Mangʻit Dehqon bozori” maʼsuliyati cheklangan jamiyatida oziq-ovqat yarmarkalari tashkil etildi.

Yarmarkada aholiga qulay xizmat koʻrsatish uchun barcha sharoitlar yaratilgan.  Jumladan, sotuvchilarning oziq-ovqat va qishloq xoʻjaligi mahsulotalarini sotishlari uchun tegishli rastalar, sovutgichlar, tarozilar va mahsulotlarni saqlash uchun omborxonalar ajratilib, tashkil etilgan yarmarka savdosiga jalb etilgan tadbirkorlik subʼektlari toʻlov terminallari va nazorat kassa mashinalari bilan toʻliq taʼminlangan.

Ahamiyatlisi, oziq-ovqat yarmarkasida fermer va dehqonlarga oʻz mahsulotlarini peshtaxtalarni ijaraga olmagan holda xaridorlarga toʻgʻridan-toʻgʻri sotish imkoniyati berilgan.

Ushbu yarmarkalarda 30 turdagi oziq-ovqat mahsulotlari, jumladan, fermer xoʻjaliklari tomonidan yetkazib berilayotgan qoramol, qoʻy, tovuq goʻshtlari, tuxum va sut mahsulotlari, meva-cheva, poliz va sabzavot, shuningdek, qandolatchilik, korxonalarning boshqa turdagi mahsulotlari istisno tariqasida, ishlab chiqarish baholarida sotilmoqda.

Bozorga kiritilayotgan barcha turdagi oziq-ovqat va qishloq xoʻjaligi mahsulotlari sanitariya laboratoriyalari xodimlari tekshiruvdan oʻtkazilib, sotishga ruxsat berilmoqda.

Bozor rastalari va doʻkon peshtaxtalari sarxil neʼmatlar bilan toʻldirilganidan tumanimiz aholisi mamnun boʻlib, bayramga oʻzgacha tayyorgarlik koʻrishmoqda.

Tadbirkorlarning fidoyi mehnatlari samarasi boʻlgan qandolanchilik mahsulotlari, yangi yil dasturxonlari uchun maxsus tayyorlangan turli xil tortlar, Yangi yil archasi bezak-oʻyinchoqlari narxining hamyonbopligi xaridorlarga manzur boʻlmoqda.

Ushbu yarmarkalar xalqimizga dehqon va sohibkorlarning, tadbirkorlarning haqiqiy bayram tuhfasi boʻldi.

Yangi yil bayramini barcha oʻzgacha quvonch bilan qarshi oladi, toʻkin dasturxon atrofida kirib kelayotgan yilning xayrli boʻlishini tilab duolar qiladi. “Mangʻit dehqon bozori” maʼsuliyati cheklangan jamiyati va tegishli nazorat organlari bilan hamkorlikda tashkil etilgan oziq-ovqat mahsulotlari yarmarkasi yurtdoshlarimizning bayram shodligiga shodlik qoʻshishi shabhasiz.

Yarmarka 2023-yilning 5-yanvariga qadar davom etadi.

Tuman hokimligining Axborot xizmati