“MEHR HARAKATI” DOIRASIDA KAM TAʼMINLANGAN OILALAR FARZANDLARIGA QIShKI KIYIM-KEChAKLAR TARQATILDI
Shu kunlarda yurtimizda “Mehr harakati” doirasida kam taʼminlangan, ehtiyojmand oilalar holidan xabar olinib, ularga zarur boʻlgan uy-roʻzgʻor buyumlari, kiyim-kechaklar, oziq-ovqat mahsulotlari berilmoqda. Harakat doirasida Amudaryo tumani Mahalla va nuroniylarni qoʻllab-quvvatlash boʻlimi binosida “Mahalla” xayriya jamoat fondi mablagʻlari hisobidan umumtaʼlim maktablarida taʼlim oluvchi kam taʼminlangan oilalar farzandlariga qishki kiyim-kechaklar berildi.
13-dekabr kuni oʻtkazilgan tadbirda tuman hokimi Sultonboy Yoʻldashev hamda sektorlar rahbarlari, Xalq taʼlimi boʻlimi masʼullari va umumtaʼlim maktablari direktorlari ishtirok etdilar. Tadbirda tumanimiz maktablarida taʼlim-tarbiya olayotgan kam taʼminlangan va boquvchisini yoʻqotgan, ehtiyojmand oilalarning 95 nafar farzandlariga qishki kiyim-kechaklar tarqatildi.
Maʼlumki, Vazirlar Mahkamasining 1997-yil 20-avgustdagi “Oʻqituvchilar va oʻquvchilar moddiy sharoitini yaxshilashga oid qoʻshimcha chora-tadbirlar toʻgʻrisida” hamda 2002-yil 25-yanvardagi “Aholining ijtimoiy himoyaga muhtoj qatlamlarini aniq yoʻnaltirilgan tarzda qoʻllab-quvvatlashning 2002-2003-yillarga moʻljallangan dasturini amalga oshirish chora-tadbirlari toʻgʻrisida” tegishli qarorlarida kam taʼminlangan oilalarga mansub oʻquvchilarni bepul qishki kiyim-bosh toʻplami bilan taʼminlash belgilangan. Shunga koʻra bunday oʻquvchilar roʻyxati maktab rahbari va ota-onalar qoʻmitasi tomonidan aniqlanib, shakllantirilgan roʻyxat boʻyicha qishki kiyim-kechaklar tarqatilib kelinmoqda.
Undan tashqari, mazkur qarorga muvofiq koʻmakka muhtoj oilalarning bolalarini qishki kiyim-bosh, maktab formasi va oʻquv qurollari bilan taʼminlash maqsadida “Temir daftar”ga kiritilgan, boquvchisini yoʻqotgan va nogironligi boʻlgan 16 yoshga toʻlmagan bolalarga bir martalik yordam puli berildi. Ushbu moddiy yordam bilan tumandagi muhtoj oilalardagi bolalar qamrab olinadi. Shuningdek, boquvchisini yoʻqotgan oilalardagi va nogironligi boʻlgan 16 yoshga toʻlmagan bolalar roʻyxati shakllantirilib, pensiya va nafaqalariga qoʻshib berildi.
Taʼkidlash joizki, yurtimizda “Yangi Oʻzbekiston Taraqqiyot strategiyasi”da ijtimoiy adolat tamoyili asosida aholining yordamga muhtoj qatlamlarini qoʻllab-quvvatlash va kambagʻallikni bartaraf etish davlat siyosatining ustuvor yoʻnalishi etib belgilangan. Aslida bu xalqimizga xos insonparvarlik tamoyilining amaldagi ifodasidir. Oxirgi yillarda eʼtiborga muhtoj aholi qatlamiga gʻamxoʻrlik koʻrsatish boʻyicha yangi tizim yaratildi.
Tadbirda ushbu ezgu ishlarni davom ettirish, yurtimizdagi mehr-oqibat muhitini mustahkamlashga qaratilgan yanada keng imkoniyatlar xususida soʻz yuritildi. Shuningdek, bolalar oʻzlariga topshirilgan qishki kiyim-kechaklar toʻplamidan iborat boʻlgan sovgʻalarni mamnuniyat bilan qabul qildilar. Tadbirda ishtirok etgan ota-onalar ham davlatimizning muruvvat yordami gʻamxoʻrliklari, eʼtiboridan mamnun ekanligini bildirdilar.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
