OʻZGARIShLAR MAMLAKATIMIZ RIVOJIGA ASOS BOʻLADI

Davlat siyosiy yetukligi va mamlakat ijtimoiy barqarorligini oʻzaro birlashtiradigan mezonlar bor. Ular koʻp emas. Shular orasida eng asosiysi jamiyatda qonun ustuvorligini soʻzsiz taʼminlash boʻlsa, ikkinchisi, hokimiyat va xalq oʻrtasidagi shaffof hamda uzluksiz muloqotni yoʻlga qoʻyishdir. Bu nafaqat demokratiya, balki kuchli fuqarolik jamiyatini barpo etishning muhim shartidir. Mazkur ustuvor vazifalar ijrosining oliy huquqiy asosi esa, shubhasiz, Konstitutsiya hisoblanadi.

Konstitutsiya – Bosh Qomusimizdagi 128 ta moddaning roppa-rosa yarmi – 64 tasini oʻzgartirish va 6 ta yangi modda qoʻshish taklif etilyapti.

Oliy Majlis Qonunchilik palatasi “Oʻzbekiston Respublikasi Konstitutsiyasiga oʻzgartish va qoʻshimchalar kiritish toʻgʻrisida”gi Qonun loyihasini eʼlon qildi. Loyihada Asosiy Qonunning 64 ta moddasiga 200 dan ortiq oʻzgartishlar kiritish hamda 16 ta normani oʻz ichiga olgan 6 ta yangi modda (prim-moddalar) qoʻshish taklif etilmoqda.

Jumladan, Konstitutsiyaga kiritilayotgan oʻzgarishlar bilan shaxsiy hayot daxlsizligiga oid normalar kuchaytirilayapti. Ushbu modda "Har bir inson shaxsiy hayotining daxlsiz boʻlishi, shaxsiy va oilaviy siri, oʻz shaʼni va qadr-qimmati himoya qilinishi huquqiga ega. Har kim oʻz shaxsiga doir maʼlumotlarni himoya qilish huquqiga ega. Har bir shaxs yozishmalarni, telefon va boshqa telekommunikatsiya qurilmalari orqali soʻzlashuvlarni, pochta-telegraf joʻnatmalarini hamda boshqa xabarlarni amalga oshirish erkinligi va ularning sir saqlanishi huquqiga ega. Ushbu huquqning cheklanishiga faqat qonunda belgilangan hollarda va tartibda, sudning qaroriga asosan yoʻl qoʻyiladi" deb belgilanmoqda.

Shuningdek, 28-moddadagi: “Oʻzbekiston Respublikasi fuqarosi Respublika hududida bir joydan ikkinchi joyga koʻchish, Oʻzbekiston Respublikasiga kelish va undan chiqib ketish huquqiga ega. Qonunda belgilangan cheklashlar bundan mustasnodir”, degan norma esa “Oʻzbekiston Respublikasi hududida qonuniy asoslarda boʻlib turgan har bir shaxs respublika hududi boʻylab erkin harakatlanish, turar va yashash joyini erkin tanlash huquqiga ega, bundan qonunda belgilangan cheklovlar mustasno. Har kim respublikadan tashqariga chiqish huquqiga ega. Oʻzbekiston Respublikasi fuqarolari Oʻzbekistonga moneliksiz qaytish huquqiga ega” deb belgilanmoqda.

Xulosa qilib aytganda, bu oʻzgarishlar, mamlakatimiz rivoji hamda xalqimiz farovonligi uchun xizmat qiladi.

Tumanimiz aholisini Konstitutsiyamiz qabul qilinganligining 30 yilligi bilan qizgʻin tabriklayman. Yurtimiz tinch, xalqi baxtiyor boʻlsin!

J.Avezov, tuman Adliya boʻlimi

YuXKM bosh yuriskonsulti.