“Gender zoʻravonlikka qarshi 16 kunlik faol harakatlar” tadbirlari oʻtkazilmoqda

Maʼlumki, mamlakatimizda joriy yilning 25-noyabr kuni start berilgan “Zoʻravonlikka qarshi birgalikda kurashamiz” shiori ostidagi “Gender zoʻravonlikka qarshi 16 kunlik faol harakatlar” tadbirlari Respublikamizning barcha hududlarida oʻtkazilmoqda. 7-dekabr kuni shunday tadbirlardan biri Amudaryo tumanidagi 82-sonli umumtaʼlim maktabi binosida boʻlib oʻtdi.

Tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova, Oʻzbekiston Respublikasi Vazirlar Mahkamasi Din ishlari boʻyicha qoʻmitasi Qoraqalpogʻiston Respublikasi hududiy boshqarmasi xotin-qizlar masalalari boʻyicha mutaxassislari Bayramgul Ayimbetova, Xudaybergan Nizamatov, Ayollarni reabilitatsiya qilish va moslashtirish Qoraqalpogʻiston Respublikasi Amudaryo tumanlararo markazi direktori Gavxar Chimbaychiyeva, xotin-qizlar masalalari boʻyicha inspektor, podpolkovnik Inobat Oʻrazmatova, Fuqarolik tashabbuslarini qoʻllab-quvvatlash markazi direktori Gulsara Jollibekova, tuman hokimligining din ishlari boʻyicha mutaxassisi Muzaffar Sherimbetov hamda deputatlar, davlat va nodavlat tashkilotlar vakillari, huquqshunoslar, oʻqituvchilar, ommaviy axborot vositalari xodimlari ishtirok etishdi.

Yigʻilishni tuman hokimining oʻrinbosari Goʻzal Saburova ochib berdi hamda gender zoʻravonlik geografik, ijtimoiy yoki iqtisodiy chegaralarni bilmaydigan global muammo ekuanligini, Birlashgan Millatlar Tashkilotining maʼlumotlariga koʻra, 15 yoshdan oshgan har uchinchi ayol hayoti davomida kamida bir marta boʻlsa ham jismoniy yoki jinsiy zoʻravonlikka uchrashini aytib oʻtdi.

Shundan soʻng, Gulsara Jollibekova Oʻzbekistonda keyingi yillarda gender zoʻravonligining oldini olish va unga qarshi kurashning tashkiliy-huquqiy asoslari yanada mustahkamlanib, ayniqsa, xotin-qizlarga nisbatan zoʻravonlikning oldini olish, bu hodisa jabrdiydalarini reabilitatsiya qilish boʻyicha aniq chora-tadbirlarga asoslangan qator saʼy-harakatlar amalga oshirib kelinayotganligini taʼkidladi. Bu jarayonlarda nodavlat notijorat tashkilotlari alohida tashabbuskorlik va faollik bilan ishtirok etishayotgani quvonarli hol ekanligini aytib oʻtdi.

Darhaqiqat, “Gender zoʻravonlikka qarshi 16 kunlik faol harakatlar” kampaniyasi doirasida nodavlat jamoat tashkilotlari tomonidan koʻplab samarali tadbirlar amalga oshirilmoqda. Jumladan, tumanimizda ham “Zoʻravonlikni va kamsitilishini oldini olishga har birimiz masʼulmiz” mavzuida uchrashuvlar, “Xotin-qizlarni  tazyiq va zoʻravonlikdan himoya qilish  tugʻrisida”, “Xotin-qizlar va erkaklar  uchun teng  huquq hamda imkoniyatlar  kafolatlari  tugʻrisida”gi qonunlarni bilasizmi?” mavzularida davra suhbatlari oʻtkazilmoqda.

Yigʻilishda Bayramgul Ayimbetova bunday tadbirlarni oʻtkazishdan maqsad, yurtimizda turli shakllardagi zoʻravonliklarning oldini olish va zoʻravonlikdan himoya qilish toʻgʻrisidagi qonun hujjatlari ijrosini taʼminlash va sohaga oid qonunchilikni takomillashtirish yuzasidan davlat tashkilotlari va fuqarolik jamiyati institutlarining hamkorligini kuchaytirish boʻyicha oʻzaro tajriba almashishdan iborat ekanini taʼkidladi.

Shuningdek, davra suhbatida soʻz olgan Inobat Oʻrazmatova va boshqalar keyingi vaqtlarda mamlakatimizda gender tengligini taʼminlash borasida amalga oshirilayotgan islohotlarning samaralari haqida alohida toʻxtaldi.

Davra suhbatida, oʻz tashkilotlari faoliyati misolida xotin-qizlarning huquq va manfaatlarini himoya qilish va taʼminlash, gender zoʻravonlikning turli shakllariga qarshi kurashish, ogʻir ijtimoiy ahvolga tushib qolgan ayollarga ijtimoiy-huquqiy, psixologik yordam koʻrsatish, ularni manzilli qoʻllab-quvvatlash boʻyicha amalga oshirilayotgan ishlar, bu borada erishilayotgan yutuqlar va mavjud muammolar haqida atroflicha fikr yuritildi. Shuningdek, zoʻravonlik jabrlanuvchilarini himoya qilishga qaratilgan qonun hujjatlarining ijrosi, jamiyatda gender zoʻravonlikka barham berishga toʻsqinlik qilayotgan asosiy muammolar, xotin-qizlarning huquqiy himoyasi boʻyicha qonunchilikdagi boʻshliqlar va ularni bartaraf etish kabi qator mavzular ham keng muhokama qilindi va qator taklif hamda tavsiyalar bildirildi.

Tuman hokimligining Axborot xizmati