ChAQIRUVGA QADAR BOShLANGʻICh TAYYoRGARLIK FANI OʻQITUVChILARI OʻRTASIDA TENNIS MUSOBAQASI OʻTKAZILDI

5-dekabr kuni Amudaryo tumanidagi 16-sonli ixtisoslashtirilgan davlat umumtaʼlim maktabida tuman xalq taʼlimi boʻlimi tasarrufidagi taʼlim muassasalarining chaqiruvga qadar boshlangʻich tayyorgarlik fani oʻqituvchilari ishtirokida Oʻzbekiston Respublikasi Konstitutsiyasi qabul qilinganining 30 yilligi munosabati bilan chaqiruvga qadar boshlangʻich tayyorgarlik fani oʻqituvchilarining jismoniy imkoniyatlari, bilim va salohiyatlarini sinovdan oʻtkazishga bagʻishlangan tadbir oʻtkazildi. Unda Amudaryo tumani Mudofaa ishlari boʻlimi boshligʻi, podpolkovnik Sherzod Murodov, Mudofaa ishlari boʻlimi boshligʻining tarbiyaviy va mafkuraviy ishlar boʻyicha oʻrinbosari Zokirjon Saʼdullayevlar ishtirok etishdi.

Tadbirda zamonaviy chaqiruvga qadar boshlangʻich tayyorgarlik fani oʻqituvchilariga qoʻyiladigan talablar haqida Amudaryo tumani Mudofaa ishlari boʻlimi boshligʻi, podpolkovnik Sherzod Murodov batafsil soʻz yuritdi va barchani 8-dekabr – Oʻzbekiston Respublikasi Konstitutsiyasi qabul qilinganining 30 yilligi bilan samimiy tabrikladi.

Shundan soʻng, tadbirda ishtirok etayotgan oʻqituvchilarning bilim va jismoniy imkoniyatlari, irodasi va kuchini sinovdan oʻtkazish maqsadida ular oʻrtasida sportning tennis turi boʻyicha musobaqa tashkil etildi. Qizgʻin va qiziqarli bahslar asosida oʻtkazilgan tennis musobaqasida tuman Xalq taʼlimi boʻlimi tasarrufidagi deyarli barcha umumtaʼlim maktablarining chaqiruvga qadar boshlangʻich tayyorgarlik fani oʻqituvchilari faol ishtirok etdilar.

Maʼlumki, harbiy vatanparvarlik tarbiyasi umumiy tarbiyaning tarkibiy qismi boʻlib, yoshlarda Vatanni fidokorona himoya qilishga tayyorlik va bunga qodirlikni shakllantirishga yoʻnaltirilgan. Uning maʼnaviy-maʼrifiy va nazariy asosi esa Vatanni himoya qilish toʻgʻrisidagi tegishli ilm-fan sohalarini puxta oʻzlashtirish, shu bilan birga ajdodlarimizning tarixiy va zamonaviy amaliy tajribalari, ilmiy merosi hamda harbiy vatanparvarlik tarbiyasi bilan bogʻliq umuminsoniy qadriyatlar va zamonaviy qatʼiy talablarga uzviy amal qilishdan iboratdir.

Ushbu oʻta muhim vazifani amalga oshirishning ilk bosqichi – yoshlarda mafkuraviy immunitetni kuchaytirish, ularni turli yot gʻoya va tahdidlardan asrash, oʻz mustaqil fikriga ega, irodali, fidoyi va vatanparvar insonlar etib tarbiyalash vazifasi umumtaʼlim maktablarining chaqiriqqa qadar boʻlgan yoshlarni tayyorlash fani oʻqituvchilari zimmasiga yuklatilgan. Chunki Prezidentimiz taʼkidlaganlaridek: “tarbiya va taʼlimni bir-biridan alohida ajratib boʻlmaydi, bu ikki jarayon oʻzaro uygʻun, uzluksiz asosda tashkil etilgandagina odobli, yuksak maʼnaviyatli, bilimdon, zukko, ruhan va jismonan sogʻlom, keng dunyoqarash, tafakkur va zamonaviy kasb-hunar egasi boʻlgan yoshlar” aynan ana shu – chaqiriqqa qadar boʻlgan yoshlarni tayyorlash boʻyicha fan oʻqituvchilari taʼlim-tarbiyasi tufayli chiniqib boradilar. Albatta, bunday zukko yoshlarni chaqiriqqa qadar tayyorlashda ushbu fan oʻqituvchilarining oʻzlari jismonan kuchli, irodali va maʼnaviyatli, bilimdon mutaxassislar boʻlmogʻi joiz.

Musobaqa yakunida eng chiroyli oʻyin koʻrsatgan ishtirokchi, eng yaxshi raketka ustasi, eng kuchli va irodali sportchi, eng bilimdon va zukko chaqiruvga qadar boshlangʻich tayyorgarlik fani oʻqituvchisi yoʻnalishlari boʻyicha gʻoliblarga tadbir tashkilotchilari tomonidan sovgʻalar berildi.

Mazkur maʼnaviy-maʼrifiy tadbir umumtaʼlim maktablarining chaqiruvga qadar boshlangʻich tayyorgarlik fani oʻqituvchilarini oʻz sohalari boʻyicha yanada faol va bilimdon boʻlish sari ilhomlantirgani bilan muhim ahamiyat kasb etdi.

Robiya YOʻLDOShEVA.