XORIJIY TILLAR FAN OYLIGI DOIRASIDA “WE LOVE ENGLISH” DEB NOMLANGAN TADBIR OʻTKAZILDI

Yurtimiz hududidagi umumtaʼlim maktablarida shu kunlarda xorijiy tillar fan oyligi doirasidagi tadbirlar oʻtkazilmoqda. Oylik doirasida tashkil etilayotgan ochiq oʻquv mashgʻulotlari, intellektual oʻyinlar, insholar tanlovlarida oʻquvchilar faol ishtirok etib, oʻz bilimlarini yanada mustahkamlab olishmoqda.

Shu yil 29-noyabr kuni Amudaryo tumanidagi 36-sonli maktabda ham fan oyligi munosabati bilan “We love english” deb nomlangan tadbir oʻtkazildi. Maktabning ingliz va rus tillari oʻqituvchilari tomonidan tashkil etilgan ushbu tadbirda direktor oʻrinbosarlari Sarvar Qutlimurodov hamda Bahrom Xoʻjamurodovlar ishtirok etdilar va kechani ochib berdilar. Shuningdek, bugun yurtimizda xorijiy tillarni oʻrganishga boʻlgan talab kun sayin oshib borayotganini taʼkidlab, rus, ingliz, nemis tillari dunyo miqyosida oʻz mavqeiga ega tillardan sanalishini, til bilgan har qanday inson koʻp bilimga ham ega boʻlishini, shu orqali kelajakda yuqori martabalarga erishish mumkinligini aytib oʻtishdi.

Fan oyligi tadbirlari davomida faol boʻlgan ingliz tili fani oʻqituvchilaridan Xosiyat Rajabova, Zamira Otajonova, Dildor Xolmenova, Dilnura Boboniyozova, Shahlo Iskandarova, Madina Fayzullayeva hamda Nilufar Shomurodovalarni, rus tili fani oʻqituvchilari Muhabbat Tursunboyeva, Raʼno va Nasiba Ahmedovalar, Nodira Soliyeva, Ikrom Ortiqov, Yulduz Yusupovalarning fidoyiliklarini namuna qilib koʻrsatdi.

Shundan soʻng, oʻquvchilar ingliz va rus tilidagi sheʼrlar, qoʻshiqlar ijro etib, raqsga tushishdi. Maktabning 3-sinf oʻquvchisi Saidjon Yusufboyev ijrosidagi “Viuchi russkiy yazik” nomli sheʼr, 1-sinf oʻquvchilarining “Yagoda malina”, “Umka” qoʻshiqlariga ijro qilgan raqslari, 4-sinf oʻquvchilarining “Butterfly”, 5-sinf oʻquvchilarining “Traffik light” sheʼrlari barchaga juda manzur boʻldi.

Taʼkidlanganidek, noyabr – xorijiy tillar fan oyligi munosabati bilan rus va ingliz tili fanlari boʻyicha oʻtkazilgan diktant, insho, ijodiy ishlar tanlovlari oʻzining ijobiy samarasini berdi. Ochiq dars mashgʻulotlari jarayonida ham asosiy eʼtibor yangi innovatsion usullardan foydalanib, oʻquvchilarning bilimini oshirish, ulardagi koʻnikmalarni rivojlantirish, aniqlangan boʻshliqlarni bartaraf etishga qaratildi. Mashgʻulotlar davomida oʻquvchilarning fanga, til oʻrganishga boʻlgan qiziqishlari yanada ortdi va faolligi oshdi. Fan oyligi doirasida oʻtkazilgan ochiq darslar oʻqituvchilar tomonidan kuzatildi va tahlil qilindi.

Fan oyligining yakuni munosabati bilan maktab miqyosida oʻtkazilgan tadbir ham nihoyatda qiziqarli oʻtdi. Oʻquvchilar darslardagi samaradorlik natijasini, oʻzlarining oʻzlashtirish darajalarini, xorijiy tillarni oʻrganishga boʻlgan intilishlarini tadbir davomida namoyon etdilar. Tadbirlarda faol boʻlgan oʻquvchilarni ragʻbatlantirish maqsadida ularga sertifikatlar topshirildi.

Fan oyligi doirasida qizgʻin tarzda oʻtkazilgan barcha tadbirlar nafaqat oʻquvchilarga, balki oʻqituvchilarga ham masʼuliyat, oʻz kasbiga sadoqat hamda fanlarning ahamiyatini yana bir bor anglashga imkoniyat yaratdi.

Rayhon Oʻrozboyeva, 36-sonli maktabning ingliz tili fani oʻqituvchisi.