«Litsenziya» axborot tizimi ishga tushdi!

License.gov.uz- Litsenziyalash va ruxsatnoma olish sohasida interaktiv xizmatlar koʻrsatish uchun "Litsenziya" axborot tizimlari majmuasidir.

Litsenziyalash va ruxsat berish tartib-taomillarini tubdan takomillashtirish hamda byurokratik toʻsiqlarni bartaraf etish orqali tadbirkorlik subʼektlari faoliyati uchun yanada keng shart-sharoitlarni yaratish maqsadida Oʻzbekiston Respublikasi Prezidentining 2020-yil 24-avgustdagi "Litsenziyalash va ruxsat berish tartib-taomillarini tubdan takomillashtirish chora-tadbirlari toʻgʻrisida"gi PF-6044-sonli Farmoniga asosan "Litsenziya" axborot tizimi ishga tushirildi.

«Litsenziya» axborot tizimi quyidagi imkoniyatlarga ega:

litsenziyalash, ruxsat berish va xabardor qilish tartib-taomillaridan oʻtish borasida:

litsenziya va ruxsat etish xususiyatiga ega hujjatlarni olish yoki amal qilish muddatini uzaytirish uchun ariza va unga ilova qilinadigan hujjatlarni topshirish, QR-kod (matrik shtrixli kod) qoʻyilgan elektron litsenziya va ruxsat etish xususiyatiga ega hujjatlarni olish;

vakolatli organlar tomonidan arizalarni koʻrib chiqish hamda litsenziya va ruxsat etish xususiyatiga ega hujjatlarni berish yoki berishni rad etish haqida qarorlar qabul qilish;

faoliyatni boshlaganlik yoki tugatganlik haqida vakolatli organni xabardor qilish uchun xabarnomalar yuborish va xabarnoma qabul qilinganligi toʻgʻrisida tasdiqnomalar olish;

arizani koʻrib chiqish uchun davlat boji, yigʻim va barcha turdagi toʻlovlarni Yagona billing tizimi orqali elektron toʻlash;

• litsenziya va ruxsat etish xususiyatiga ega hujjatlarni qayta rasmiylashtirish, ularning amal qilishini toʻxtatib turish va bekor qilish haqidagi arizalarni qabul qilish va koʻrib chiqish;
• Litsenziyalash, ruxsat berish va xabardor qilish tartib-taomillarini amalga oshirishda vakolatli organlarning oʻzaro hamkorligi borasida:
• boshqa vakolatli organlardan qoʻshimcha hujjat va maʼlumotlarni olish hamda ular bilan kelishishni «bir darcha» tamoyili asosida tadbirkorlik subʼektining ishtirokisiz mustaqil ravishda amalga oshirish;

         berilgan litsenziya va ruxsat etish xususiyatiga ega hujjatlarning hamda xabarnoma yuborgan tadbirkorlik subʼektlarining avtomatlashtirilgan reyestrlarini yuritish;

         litsenziya va ruxsat etish xususiyatiga ega hujjatlarga hamda xabarnomalarga aloqador maʼlumotlarni tegishli idoralarning maʼlumotlar bazasi orqali avtomatik tarzda tekshirish;

• litsenziya va ruxsat etish xususiyatiga ega hujjatlar hamda xabarnomalarga tegishli boʻlgan talab va shartlarning bajarilishini monitoring qilish borasida:

litsenziya va ruxsat etish xususiyatiga ega hujjatlar hamda xabarnomalarga doir talab va shartlarga rioya etilishi ustidan vakolatli organlar tomonidan masofaviy nazoratni amalga oshirish;

davlat xizmati koʻrsatilishining har bir bosqichida murojaatlarning koʻrib chiqilishini kuzatib borish;

litsenziya va ruxsat etish xususiyatiga ega hujjatlar hamda xabarnomalar bilan bogʻliq harakatlar, shu jumladan bekor qilish va toʻxtatib turish boʻyicha vakolatli organlar tomonidan sud va boshqa idoralarga murojaat qilish;

arizalarni koʻrib chiqish, litsenziya yoki ruxsat etish xususiyatiga ega hujjatni berish yohud berishni rad etish, uning amal qilishini toʻxtatib turish haqidagi qarorlar ustidan jamoatchilik nazoratini joriy etish, shuningdek, tegishli faoliyat bilan litsenziyasiz yoki boshqa ruxsat etish xususiyatiga ega hujjatsiz yohud xabarnoma yubormasdan shugʻullanish hamda belgilangan talab va shartlarni buzish holatlari haqida toʻgʻridan-toʻgʻri joylashish nuqtasini koʻrsatgan holda maʼlumot berish;

vakolatli organlarning avtomatik shakllantiriladigan reytingini yuritish;

vakolatli organlar tomonidan berilgan litsenziya va ruxsat etish xususiyatiga ega hujjatlarning hamda xabardor qilish tartibida amalga oshiriladigan faoliyatlarning xususiyatidan kelib chiqib, jismoniy va yuridik shaxslarning faoliyati (harakati) davomida nazorat qilishning aniq mezonlarini belgilagan holda «xavfni tahlil etish» tizimini joriy qilish.

Oʻzbekiston  Respublikasi Vazirlar Mahkamasining 2022-yil 25-fevral kungi 88-son Qaroriga asos Faoliyatni boshlash yoki tugatish uchun vakolatli organni xabardor qilish tartibi toʻgʻrisidagi yagona nizom qabul qilindi. Qarorga muvofiq License.gov.uz axborot tizimi orqali 26 ta faoliyat turlarining tartiblarini nazarda tutuvchi pasportlar tasdiqlandi.

Oʻzbekiston Respublikasi Vazirlar Mahkamasining 2022-yil 21-fevral kuni 80-sonli “Maxsus elektron tizim orqali ayrim faoliyat turlarini litsenziyalash tartibi toʻgʻrisidagi yagona nizomni tasdiqlash haqida”gi  Qarori qabul qilindi.

Qarorning 1-ilovasi bilan Maxsus elektron tizim orqali ayrim faoliyat turlarini litsenziyalash tartibi toʻgʻrisida yagona nizom tasdiqlandi.

Ruxsat etish xususiyatiga ega xujjatlarni olish uchun Yagona interaktiv davlat xizmatlari portali va "Litsenziya" axborot tizimidan foydalanish mumkin.

Qaror bilan ruxsat etish xususiyatiga ega 28 ta hujjat pasportlari tasdiqlandi.

Jismoniy va yuridik shaxslar yoki ularning nomidan ish yuritish vakolatiga ega boʻlgan shaxs oʻz elektron raqamli imzosidan foydalangan holda shuningdek talabgor — jismoniy shaxslar uchun ERI oʻrniga Mobil-ID tizimidan ham foydalanish mumkin, litsenziya olishi yoki faoliyatni boshlashi uchun «Litsenziya» axborot tizimi yoki Yagona interaktiv davlat xizmatlari portalida roʻyxatdan oʻtadi hamda faoliyatning litsenziyalanadigan turini, shu jumladan, har bir kichik turini tanlab, elektron shaklda ariza toʻldiradi.

"Litsenziya" axborot tizimidan foydalanish jismoniy va yuridik shaxslarning vaqtini tejashi bilan bir qatorda xujjatlarning qisqarishi ovoragarchiliklarning boʻlmasligiga olib keladi.

Jismoniy va yuridik shaxslar oʻz faoliyatlarini boshlashda vakolatli organni xabardor qilishi, litsenziyalanadigan faoliyat turlari bilan shugʻullanishlari uchun vakolatli organlarga bormasdan "Litsenziya" axborot tizimidan foydalanish imkoniyati  yaratilgan boʻlib, tizim orqali zarur maʼlumotlar va xujjatlar vakolatli organga yuboriladi va natijasi boʻyicha maxsus xujjatlari tizim orqali ariza beruvchiga  yuboriladi.

Endlikda "Litsenziya" axborot tizimi foydalanuvchilariga yanada qulaylik yaratish maqsadida iOS va Android mobil ilovalari orqali xizmatlardan foydalanish imkoniyati yaratildi.

Ushbu mobil ilovalar orqali litsenziyalash va ruxsat berish hujjatlarini olish uchun ariza berish, kabinet orqali tashkilotga tegishli boʻlgan litsenziya va ruxsat berish hujjatlari boʻyicha maʼlumotlarni olish, litsenziyalar reyestridan maʼlumotlar izlash va yana boshqa imkoniyatlardan foydalanish joriy etildi.

Umida Saparbayeva, Amudaryo tumani Adliya boʻlimi Davlat xizmatlari markazi boʻlim boshligʻi.