DOIMIY KOMISSIYa YIGʻILIShI OʻTKAZILDI

Shu yilning 22-noyabrida tuman hokimligi majlislar xonasida Xalq deputatlari Amudaryo tuman Kengashining Axborot siyosati va mahalliy davlat organlarida ochiqlikni taʼminlash masalalari boʻyicha doimiy komissiyaning navbatdagi yigʻilishi boʻlib oʻtdi. Yigʻilishni doimiy komissiya raisi Bahodir Boltaboyev ochdi va olib bordi.

Yigʻilishga Xalq deputatlari tuman Kengashining Doimiy komissiya raislari va tuman hokimining kurilish boʻyicha oʻrinbosari, tegishli idora, tashkilotlar rahbarlari va vakillari ishtirok etdi.

Yigʻilishda “2022–2023-yillarda mahallalar infrastrukturasini yanada yaxshilash boʻyicha qoʻshimcha chora-tadbirlar toʻgʻrisida”gi PQ-408-sonli qarori ijrosini taʼminlash boʻyicha tumanda olib borilayotgan ishlar tanqidiy koʻrib chiqildi.

 Yigʻilishda kun tartibidagi masala yuzasidan qilingan maʼruzada Qarorga muvofiq hududlarni obod qilish, ovul va mahallalarda infratuzilma bilan bogʻliq eng dolzarb masalalarni tizimli hal etish, aholiga munosib turmush sharoitlarini yaratish maqsadida ichki yoʻllar, ichimlik suvi, elektr energiyasi taʼminotini yaxshilash rejalashtirilgani aytib oʻtildi. Shuningdek, qaror asosida ishlab chiqilgan dasturga muvofiq 2ta mahallaga maʼmuriy bino qurish ishlari rejalashtirilgan boʻlib, ularning bajarilishi ustidan nazoratni olib borish Qoraqalpogʻiston Respublikasi Joʻqorgʻi Kengesi va xalq deputatlari tuman Kengashi deputatlari zimmasiga yuklatilgan. Shu kunlarda deputatlar joylarda tushuntirish-targʻibot ishlarini olib bormoqdalar.

Yigʻilishda tuman hokimining sanoat, yirik qurilish, kommunikatsiya, kommunal xoʻjaligi va obodonlashtirish masalalari boʻyicha oʻrinbosari Nodirbek Kamolov Oʻzbekiston Respublikasi Prezidentining 2022-yil 25-oktyabrdagi “2022-2023-yillarda mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi qaroriga asosan tumanimiz hududidagi mavjud muammolarni bartaraf etish va infratuzilmasini rivojlantirish maqsadida amalga oshirilishi belgilangan ishlar haqida batafsil hisobot berdi.

Taʼkidlanganidek, yuqoridagi qaror bilan tasdiqlangan dasturga muvofiq tumanimiz hududida umumiy qiymati 22 milliard 209 million soʻmlik qurilish-taʼmirlash ishlarini amalga oshirish belgilangan. Ushbu mablagʻlar hisobiga jami 25 ta obʼekt, shundan 19 ta mahallada ichki yoʻllarni taʼmirlash, 2 ta mahallada suv inshootlarini rekonstruktsiya qilish, yangidan ichimlik suvi tarmogʻini tortish , 2 ta mahalla fuqarolar yigʻini maʼmuriy binosini va 1 ta mahallada bolalar sport maydonchasini yangidan qurish, 1 ta mahallada esa elektr tarmoqlarini tortish rejalashtirilgan.

Ajratilishi belgilangan mablagʻlar hisobidan tumanimizning ovul va mahallalarida aholining turmush tarziga bevosita taʼsir koʻrsatuvchi eng dolzarb muammolarni bartaraf etish koʻzda tutilayotganligi axborotlarda alohida qayd etib oʻtildi.

Yigʻilishda Prezdentning mazkur qarori asosida olib borilishi lozim boʻlgan ishlar va bu borada deputatlik nazoratini oʻrnatish masalalari muhokama qilindi.

Shuning bilan Xalq deputatlari tuman Kengashining Axborot siyosati va mahalliy davlat organlarida ochiqlikni taʼminlash masalalari boʻyicha doimiy komissiyasi yigʻilishi yakunlandi.

Tuman hokimligining Axborot xizmati.