ADOLATNI QAROR TOPTIRISh VA QONUN USTUVORLIGINI TAʼMINLASh SUDYaLAR ZIMMASIDAGI ASOSIY VAZIFA

Mamlakatimizning sud-huquq tizimida Prezident Farmon va Qarorlariga muvofiq tarixiy islohotlar, yangilanish va oʻzgarish jarayonlari qatʼiyat bilan amalga oshirilmoqda. Buning natijasida sohada tub burilish yuz berib, xalqning mushkuli oson boʻlmoqda hamda sudlarga boʻlgan ishonchi oshmoqda.

Amudaryo tumanidagi zamonaviy sud binosida Jinoyat va Fuqarolik ishlari boʻyicha tuman sudlari samarali faoliyat koʻrsatib kelmoqda. Biz – ikkala sud sudyalari vazifamiz faqat jinoyat sodir etgan shaxsni jazolash emas, balki jinoyat sodir etgan shaxsni qayta tarbiyalash, jinoyatlarning kelib chiqish sabablarini oʻrganish va uni bartaraf etishdan iborat, degan tamoyil asosida ish olib bormoqdamiz. 

Jinoyat ishlari boʻyicha tuman sudi tomonidan oʻtgan yildan 26 shaxsga nisbatan ochilgan 19 ta jinoyat ishi qoldiq boʻlib oʻtgan. Joriy yilning 9 oyi davomida sudning ish yurituviga 150 shaxsga nisbatan 124 ta jinoyat ishi kelib tushgan.

Shu davr mobaynida 79 shaxsga nisbatan 66 ta jinoyat ishi boʻyicha ayblov hukmi chiqarilgan, 33 shaxsga nisbatan koʻrilayotgan 32 ta jinoyat ishi harakatdan tugatilgan. Shuningdek, 1 nafar shaxsga nisbatan 1 ta jinoyat ishi birlashtirilgan, 1 nafar shaxsga oqlov hukmi chiqarilgan. Jinoyatchilik va huquqbuzarliklarning oldini olish va ularni keltirib chiqaruvchi sabab va shart-sharoitlarni bartaraf etish yuzasidan 67 ta ish boʻyicha xususiy ajrimlar chiqarildi. Oʻtgan davr mobaynida jami koʻrib tamomlangan 101 ta jinoyat ishidan 23 tasi sayyor sud majlisida koʻrildi.

Fuqarolik ishlari boʻyicha Amudaryo tumani sudi tomonidan ham fuqarolarning huquq va qonuniy manfaatlarining sud orqali himoyalanishini taʼminlash, ishlarni qonunda belgilangan muddatlarda sifatli koʻrib chiqish borasida 30-sentyabr holatiga 2113 ta ish koʻrib tamomlangan.

Tamomlangan ishlardan 1592 tasi boʻyicha hal qiluv qarorlari chiqarildi. Shuningdek, 521 ta ish boʻyicha ajrimlar chiqarilgan boʻlib, 27 ta ish yuritishdan tugatildi, 494 ta ariza koʻrmasdan qoldirildi, jami 2184 arizalar boʻyicha sud buyrugʻi chiqarildi. Daʼvo tartibida 1897 ta, alohida tartibda, yaʼni yuridik ahamiyatga ega boʻlgan faktlarni tasdiqlash, farzandlikka olish, fuqaroni muomala layoqatini yoʻqotgan deb topish boʻyicha 229 ta fuqarolik ish koʻrildi.

Sud tomonidan jami 10042 ta ijro hujjatlari tegishli majburiy ijro byurolariga ijro uchun yuborildi. Shuningdek, ijrosi taʼminlanmagan ijro hujjatlari boʻyicha tegishli majburiy ijro byurolariga eslatma xatlar yuborilib, taqdimnomalar kiritildi. Bugungi kunda sud tomonidan jami koʻrib tamomlangan 2113 ta ishlardan 620 tasi sayyor sud majlislarida koʻrib chiqildi.

Prezidentimiz mamlakat sud tizimi vakillari, oʻzbek sudyalari oldiga “Cudyaning ongida – adolat, tilida – haqiqat, dilida – poklik boʻlishi kerak”, degan haqqoniy talabni qoʻydi. Har bir sudya ushbu talabga masʼuliyat bilan yondoshgan holda adolatni qaror toptirish va qonun ustuvorligini taʼminlash yoʻlida sidqidildan xizmat qilishi kerak. Zero, yurtda adolat hukmronlik qilsagina, turmush farovon boʻladi, rivojlanish, yuksalish ortadi.

J.Oʻrazboyev, Jinoyat ishlari boʻyicha tuman sudi raisi.

Q.Atamurodov, Fuqarolik ishlari boʻyicha tuman sudi raisi.