FAN OYLIGI DOIRASIDAGI TADBIRLAR QIZIQARLI OʻTMOQDA

Oktyabr – filologiya fanlari oyligi munosabati bilan umumtaʼlim fanlari maktablarida oʻtkazilayotgan adabiy kecha, insholar tanlovlari, ochiq oʻquv mashgʻulotlarida oʻqituvchilar va oʻquvchilar faol ishtirok etishmoqda.

Oylik doirasida 40-sonli maktabda ham “Qadring baland boʻlsin ona tilim “ mavzusida tadbir boʻlib oʻtdi. Tadbirni maktab direktori Sanobar Xoʻjamurodova ona tiliga bagʻishlangan sheʼr bilan boshladi va Oʻzbek tiliga davlat tili maqomining berilishi tarixi haqida oʻquvchilarga batafsil maʼlumot berib oʻtdi.

Har besh odamning uchtasi muloqot jarayonida chet el soʻzlarini qoʻshib gapirishi, koʻcha-koʻyda, bannerlardagi xato yozilgan soʻzlar, ijtimoiy tarmoqlardagi imlo xatolari toʻgʻrisida gapirib, har bir inson tilimizning sofligi, uning rivojlanishida oʻz hissamizni qoʻshish kerakligini eslatib oʻtdi. Soʻzi davomida Asosiy fan olimpiadasi 2-bosqich gʻoliblari, jumladan,  ingliz tili fanidan    10-sinf oʻquvchisi Ilhomova Laylo 1-oʻrin, fizika fanidan 9-sinf oʻquvchisi Xudoybergenova Barchinoy 1-oʻrin, geografiya fanidan 11-sinf oʻquvchisi Boltaboyeva Sevara 2-oʻrin, ona tili va adabiyot fanidan 10-sinf oʻquvchisi Norboyeva Iroda 2-oʻrin, qoraqalpoq tili fanidan 10-sinf oʻquvchisi Masharipova Maftuna 2-oʻrin, fizika fanidan 9-sinf oʻquvchisi Madaminova Madina 2-oʻrin, geografiya fanidan 11-sinf oʻquvchisi Umarboyeva Rayhon 3-oʻrin, matematika fanidan 11-sinf oʻquvchisi Kenjaboyeva Shahrizoda, 10-sinf oʻquvchisi Arslonov Behruz 3-oʻrin, biologiya fanidan 10-sinf oʻquvchisi Gulmirzayeva Maftuna 3-oʻrin gʻoliblarini hamda ularning ustozlarini ham tabrikladi va keyingi bosqichlarda omad tilab, ularning Respublikada ham gʻolib boʻlishiga ishonch bildirib, motivatsiya berdi. Shuningdek, 11-sinf oʻquvchilari yaʼni EILTS sertifikatini qoʻlga kiritgan Oʻtamurodova Mavjuda, Jumamurodova Faridalarni oʻquvchilarga oʻrnak qilib koʻrsatdi, ular kabi oʻquvchilarni bilimli boʻlishga chorladi.

Tadbir davomida maktab ijodkor  oʻquvchilari til haqidagi sheʼrlaridan namunalar aytdi, 5-6-sinf oʻquvchilar raqsga tushdi va hikmatli soʻzlardan keltirib, bir-biri bilan maʼlumot almashdi. Tadbir koʻtarinki ruhda boʻlib oʻtdi.

Oktyabr – filologiya fanlari oyligi munosabati bilan 6-sinflar kesimida “Til-maʼrifat koʻzgusi” shiori ostida devoriy gazeta va bukletlar tanlovi, 9-10-11-sinflar orasida “Ona tilim- faxrim, iftixorim” mavzusida insholar tanlovi boʻlib oʻtdi. Bundan tashqari, 7-8-sinflar oʻrtasida mushoira kechalari hamda  bahs-munozarali suhbatlar oʻtkazildi. Ona tili va adabiyot oʻqituvchilari bir-birlari bilan metod almashish maqsadida naʼmunali darslar tashkil qildi. Oktyabr oyi yakuniga qadar fan oyligi doirasidagi badiiy kecha va tanlovlar davom etadi.

U.Karimova, 40-sonli maktabning ijodiy-madaniy masalalar boʻyicha targʻibotchisi.