11 nafar farzandni tarbiyalab voyaga yetkazgan ona “Vafo va sadoqat” medali bilan taqdirlandi

Bugungi tinch va osoyishta zamonamiz, dorilomon kunlar uchun necha-necha ajdodlarimiz oromi va halovatidan kechib, mehnat qilganlar. Millionlab ota-bobolarimiz yurt tinchligi yoʻlida qon toʻkib, jang maydonlarida tinchlik yoʻlida jonlarini fido qilganlar. Ikkinchi jahon urushi va urushdan keyingi tiklanish yillari ajdodlarimiz uchun ana shunday sinovli davrlar boʻldi. Aynan oʻsha mashʼum urush paytida – 1941-yilda dunyoga kelgan Toʻlgʻanoy Daoʻletbayeva ham zamondoshlari qatori koʻp qiyinchiliklarni boshidan kechirdi.

U uzoq yillar mobaynida Qangli ovulida jamoa xoʻjaligi ishchisi sifatida mehnat qildi. Turmush oʻrtogʻi bilan birgalikda 11 nafar farzandni Vatan koriga yaraydigan munosib farzandlar qilib tarbiyalab voyaga yetkazdi. Bugungi kunda onaxonning  farzandlari turli sohalarda Vatanimiz ravnaqi uchun xizmat qilib, yurt farovonligi uchun oʻz hissalarini qoʻshib kelmoqdalar.

Yurtmizda Toʻlgʻanoy ona singari qahramon ayollar qoʻplab topiladi. Ular doimo hurmat va eʼtiborda eʼzozda. Ayniqsa, butun mamlakatimiz boʻylab koʻtarinki ruhda oʻtkazilayotgan “Keksalar haftaligi”da ularning yillar davomida qilagan mehnatlari, barkamol farzandlarni tarbyalab voyaga yetkazishdagi fidoiyliklari yana bir bor eʼtirof etilmoqda.

Yaqinda Amudaryo tumanining Qangʻli ovulida joylashgan 29-sonli umumtaʼlim maktabda  boʻlib oʻtgan “Uch avlod uchrashuvi” da Toʻlgʻanoy onaning faxriy vatanparvar farzandlarni voyaga yetkazgani, bugungi kunda keksa onaxonning 5 nafar farzandi harbiy sohalarda fidokorona mehnat qilib kelayotganligi sababli onaxon Oʻzbekiston “Veteran” jangchi faxriy va nogironlari birlashmasi tomonidan mukofotlandi. Keksa onaxonga “Vafo va sadoqat” medali tantanali tarzda topshirildi.

Boʻlib oʻtgan mazkur uchrashuvda Oʻzbekiston Respublikasi Mudofaa vazirligi xodimlari, Afgʻon urushi qatnashchilari, bir guruh nuroniylar, faol yoshlar ishtirok etishdi.

Onaxon keksalar uchun koʻrastilayotgan bu kabi eʼtibor hech bir mamlakatda topilmasligini, jannatmakon yurtimizda inson qadri har narsadan ustun turishini mamnuniyat bilan taʼkidlab, “Vafo va sadoqat” medaliga munosib koʻrilgani uchun oʻzining chuqur minnatdorligini bildiridi. Shuningdek, Vatanga xizmat qilish eng oliy saodat ekanligini, hayotda vatanparvar boʻlib yashash uchun avvalo ona vatanni sevish lozimligini aytib oʻtdi.

Uchrashuvda soʻzga chiqqan keksa onaxonning zamondoshlari uning uzoq yillar mobaynida jamoa xoʻjaligida oddiy ishchi sifatida mehnat qilib, turmush oʻrtogʻi bevaqt vafot etgan boʻlsa ham 11 nafar farzandni halol mehnatlari bilan tarbiyalab, barkamol inson qilib voyaga yetkazganini eʼtirof etishdi.

Shuningdek, nuroniylar urush vaqti va undan keyingi tiklanish yillaridagi qiyinchiliklar, xalqning mashaqqatli hayoti, bevaqt olamdan koʻz yumgan necha minglab mard oʻzbek oʻgʻlonlarining porloq xotiralari yodga olindi.

Shuningdek, tadbirda Afgʻon urushida ishtirok etgan baynalminal jangchilar ham ishtirok etib, urush dahshatlari, tinchlikning qadri haqida hayotiy hikoyalarini ishtirokchilar bilan baham koʻrdilar.

Amudaryo tumanidan 13 nafar yigit afgʻon zaminida oʻz xizmat burchlarini ado etishgan. 9-yil-u 2 oy davom etgan bu urushdan omon qaytganlarning biri oyogʻi yo qoʻlini, yana biri yarim jonini begona yurt tuprogʻini yovdan ozod etish uchun boʻlgan qaqshatqich jang maydonlariga tashlab qaytdi.

Yoshi ulugʻlar tadbirda ishtirok etayotgan yoshlarga oltindan qimmat nasihatlar, pand-u oʻgitlar berishdi. Yoshlarning kasb-hunar egallashi, yuksak marralarni zabt etishlari uchun barcha sharoitlar muhayyo ekanligi taʼkidlab, ilm, kasb-hunar sirlarini puxta egallashga daʼvat qilishdi.

Shu oʻrinda aytish kerakki, qahramon boʻlish uchun faqatgina jang maydonlarida mardonavor jang qilish shart emas. Vatanimiz dovrugʻini koʻkalarga koʻtaradigan, turli sohalarda fidoiylarcha mehnat qilib, uning taraqqiyotiga munosib hissa qoʻshadigan yosh avlodni tarbiyalash ham haqiqiy qahramonlikdir.

“Vafo va sadoqat” medali bilan taqdirlangan Toʻlgʻanoy ona Daoʻletbayeva ham ana shunday qahramon ayol, fidoyilik, vafo va sadoqat timsolidir.

Tuman hokimligining Axborot xizmti