15-sonli maktabda “Mehrijon sayli” oʻtkazildi

Yoshlikda olingan bilim ­– toshga oʻyilgan naqsh kabi, deydi donolar. Shuning uchun jajji oʻgʻil-qizlarni boshlangʻich sinflardanoq ilm olish, oʻqish-oʻrganishga qiziqtira olish, ularning koʻnglida kelajakda ulkan salohiyatga ega, ziyoli inson boʻlib voyaga yetishga havas uygʻotish juda muhim.

Shu maʼnoda olib qaraydigan boʻlsak, maktablarning boshlangʻich taʼlim oʻqituvchilari zimmasidagi masʼuliyat juda salmoqli va sharafli ekanini anglaymiz. Har yili mamlakatimizda umumiy oʻrta taʼlim maktablarida sentyabr oyida boshlangʻich taʼlim fan oyligini oʻtkazish belgilanganligi ham oʻquvchilarning savodxonligini oshirishga qaratilgan.

Avvalo ularga “Bilimlar kuni”, “Mustaqillik saboqlari” mavzularida mustaqillik darslari tashkil etiladi va bu darslar orqali qalbida ona Vatanga muhabbat, yurtga sadoqat tuygʻulari tarbiyalanadi.

Oylik doirasida oʻtkaziladigan turli tanlovlar, mustaqil fikrlashga yoʻnaltiradigan musobaqalar, davra suhbatlari orqali ularning dunyoqarashi kengaytirilib, oʻzaro hurmat tuygʻulari shakllantiriladi.

Shu yilning 29-sentyabrida Amudaryo tumanidagi 15-sonli maktabda boshlangʻich taʼlim fan oyligiga bagʻishlangan tadbirda ham barcha oʻquvchilarning mustaqil diyorimizda kuz faslining oʻzgacha tarovatini, saxovati haqida, ona zaminimizda yetishtiriladigan mevalar, poliz mahsulotlari haqida ularning yosh avlod vakillari oʻsib ulgʻayishidagi foydalari haqida keng bilimlarga ega boʻlishiga hissa qoʻshildi.

“Mehrijon sayli” tadbirida boshlangʻich sinf oʻquvchilari ishtirok etishdi. Unda maktab direktorining oʻquv ishlari boʻyicha oʻrinbosari Komiljon Masharipov, maʼnaviy-maʼrifiy ishlar boʻyicha oʻrinbosari Iskandar Iskandarovlar qatnashib, oʻquvchilarga fan oyligi doirasida oʻtkazilgan tadbirlarda faol qatnashganligi uchun minnatdorlik bildirdi va maktab oʻqituvchilar jamoasini 1-oktyabr – kasb bayrami kuni bilan qizgʻin qutladi.

Maktabning boshlangʻich sinf oʻqituvchilari Muqaddam Primmatova, Muhabbat Rahimboyeva, Shirin Safarboyeva, Nilufar Toʻrayeva, Umida Rajabova, Nodira Boltaboyeva, Yulduz Avazmetova, Sevara Sobirovalar hamkorlikda tayyorlagan “Mehrijon sayli”da oʻquvchilar kuz pishiqchilik manzaralari aks etgan sahna koʻrinishlari namoyish etishdi.

Oʻquvchilar kuzning boshqa fasllardan oʻziga xos farqlari, kuzda ona zaminimiz bagʻrida yetiladigan mevalar, sabzavotlar haqida sheʼrlar, topishmoqlar aytdilar.

Maktabning musiqa fani oʻqituvchisi Oʻrinboy Shomurodovning iqtidorli oʻquvchilari Javohir Qadamboyev, Otabek Bobojonovlar ijro etgan qoʻshiqlari ham barchaga xushnudlik baxsh etdi.

Boshlangʻich taʼlim fan oyligi doirasida quyi sinflar oʻquvchilari ishtirokida tayyorlangan “Mehrijon sayli” tadbirida oʻquvchilarga xalqimizning qadimdan kuz faslida nishonlanib kelayotgan “Mehrijon” milliy bayrami haqida koʻpgina maʼlumotlarga ega boʻldilar.

Bayram tadbiri oʻquvchilarni jannatmakon yurtimizni sevishga, ardoqlashga va unga munosib farzandlar boʻlishga ruhlantirdi.

Oygul Rajabova