XALQ TAʼLIMI VAZIRLIGI TOMONIDAN QORAQALPOGʻISTON RESPUBLIKASIDA XAYRIYa AKTsIYaSI OʻTKAZILMOQDA
Shu kunlarda Xalq taʼlimi vazirligi tomonidan Qoraqalpogʻiston Respublikasida koʻp yillar davomida faoliyat yuritgan faxriy oʻqituvchilar holidan xabar olish aktsiyasi oʻtkazilmoqda.
Xususan, Oʻzbekiston Respublikasi Prezidenti Administratsiyasi rahbarining topshirigʻiga asosan Qoraqalpogʻiston Respublikasi xalqi hayoti bilan bogʻliq muammolarni oʻrganish jarayonida xalq taʼlimi tizimiga taalluqli masalalarga ham alohida eʼtibor qaratilib, Qoraqalpogʻiston Respublikasi xalq taʼlimi tizimida koʻp yillar davomida faoliyat yuritgan fahriy oʻqituvchilar, kam taʼminlangan oila farzandlari hamda sogʻligida nuqsoni boʻlgan oʻquvchilar holidan xabar olinib, ularning hayotiga doir muammolarni bartaraf etish choralari koʻrilmoqda.
Ushbu aktsiya doirasida Xalq taʼlimi vaziri oʻrinbosari Vahobjon Rajabov rahbarligidagi aktsiya tashkilotchilari Amudaryo tumanida ham boʻlishib, nafaqadagi faxriy oʻqituvchilar holidan xabar oldilar va Oʻzbekiston Respublikasi Xalq taʼlimi vazirligi nomidan 7 turdagi oziq-ovqat mahsulotlari toʻplami, esdalik uchun maxsus tabriknoma va yana boshqa qimmatbaho sovgʻalarni topshirdilar.
Oʻzbekiston Respublikasi Xalq taʼlimi vaziri oʻrinbosari Vahobjon Rajabov rahbarligidagi aktsiya tashkilotchilari oʻzining butun ongli hayotini yosh avlod taʼlim tarbiyasiga bagʻishlagan, ayni damda keksalik gashtini surayotgan faxriy oʻqituvchi Durdiboy ota Yerdoshev xonadonida boʻlishdi.
Durdiboy ota Yerdoshev aktsiya tashkilotchilari, xususan, Oʻzbekiston Respublikasi Xalq taʼlimi vaziri oʻrinbosari Vahobjon Rajabov, Qoraqalpogʻiston Respublikasi Xalq taʼlimi vazirining birinchi oʻrinbosari Akbar Rayimovlarning tashrifi hamda hukumatimizning faxriy oʻqituvchilarga koʻrsatayotgan hurmat-eʼtibori va gʻamxoʻrligidan chin dildan minnatdor boʻldi. Xonadoniga tashrif buyurgan mehmonlar bilan samimiy muloqot qilib, mamlakatimiz taʼlim tizimida amalga oshirilayotgan oʻzgarish va yangilanishlar, zamonaga mos ravishda sohaga tatbiq etilayotgan islohotlar xususida toʻlqinlanib soʻzladi.
Xalqimiz bejizga ustoz otangday ulugʻ, degan purmaʼno hikmatni yaratmagan. Chunki, bizga oq-qorani tanitib, mustaqil hayot sari yoʻllagan bu tabarruk zot ota-onamizdan keyin mustaqil hayot boʻstonida doimiy va eng fidoyi jonkuyar doʻst sifatida ilm oʻrgatgan, hayot sinovlarini sabot va matonat bilan yengib oʻtishda eng yaqin maslahatgoʻy, mehribonimiz boʻlgan.
Aktsiya ishtirokchilari shu kuni Quvondiq Tangirberganov, Egambergan Saidov, Shukurjon Xoʻjamurodova hamda Oʻzbekiston Xalq oʻqituvchisi Hayitgul Yoʻldoshevalarning xonadonlarida ham boʻlishib, ularning yashash sharoitlari, kundalik hayotiga oid muammolari bor yoki yoʻqligi bilan qiziqdilar.
Faxriy ustozlar bugungi dorilomon kunlarga cheksiz shukronalik tuygʻularini izhor etishib, mamlakatimizda inson qadr-qimmatini ulugʻlash, uning hayotdan rozi yashashlarini taʼminlash maqsadida amalga oshirilayotgan izchil islohotlar xususida mamnuniyat bilan fikr bildirdilar.
Oʻzbekiston Respublikasi Xalq taʼlimi vaziri oʻrinbosari Vahobjon Rajabov, Qoraqalpogʻiston Respublikasi Xalq taʼlimi vaziri birinchi oʻrinbosari Akbar Rayimov va Amudaryo tuman xalq taʼlimi boʻlimi mudiri Akmal Ismoilovlar xalq taʼlimi sohasida koʻp yillar samarali mehnat qilgan amudaryolik faxriy oʻqituvchilarning samarali mehnatlarini eʼtirof etishib, ularga uzoq umr tilab, hamisha shogirdlari ardogʻida yurishdek samimiy tilaklar bildirishdi.
Robiya Yoʻldosheva.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
