“YuSUF EShON BOBO” JOMʼE MASJIDIDA 25 NAFAR AMUDARYoLIKNI HAJ SAFARIGA JOʻNATISh MAROSIMI OʻTKAZILDI

Yer yuzining barcha qitʼalaridagi musulmonlar shu muqaddas oyda Haj ziyoratiga borib, Islom dinidagi beshinchi arkon amallarini ado etishadi. Darhaqiqat, muborak safarga borish, tabarruk Kaʼbatullohni tavof qilish har bir moʻmin-musulmonning niyati, orzusidir.

 Butun dunyoga tashvish keltirgan koronavirus pandemiyasi sababli Haj ziyoratiga borish maʼlum muddatga toʻxtab qolgan edi, joriy yildan yana ulugʻ safarga yoʻllar ochildi.

Shu yil 24-iyun kuni Mangʻit shahrida joylashgan “Yusuf Eshon bobo” jomʼe masjidida hamyurtlarimizni muborak Haj safarga joʻnatish bilan bogʻliq kuzatuv marosimi boʻlib oʻtdi.

Unda Mahalla va nuroniylarni qoʻllab-quvvatlash boʻlimi hamda tuman hokimligi masʼullari, shuningdek, ziyoratchilar va ularning yaqinlari ishtirok etishdi.

Hayajonli damlarda Yaratganning bayti sari yoʻl olayotgan, orzulari ushalgan hamyurtlarimiz eson-omon muborak qadamjolarni ziyorat qilib kelishni soʻrab, xayrli duolar qilishgan boʻlsa, kuzatishga chiqqan yaqinlari Kaʼbatullohga borish ularga ham nasib etishini dillariga tugishdi.

Taʼkidlash joizki, Prezidentimizning alohida eʼtibori va gʻamxoʻrligi natijasida minglab vatandoshlarimiz oʻz farzlarini emin-erkin bajarish baxtiga erishmoqda. Bu borada ularga davlatimiz tomonidan juda katta amaliy yordam koʻrsatilmoqda, qulay sharoit yaratib berilmoqda.

Kvotalar pandemiyadan avvalgiga qaraganda qariyb 4 ming nafar, yaʼni 52 foizga koʻpaydi. Albatta, Oʻzbekiston aholisiga berilgan imkoniyatlar, inson qadrini ulugʻlashga qaratilgan izchil siyosatning yorqin samarasi boʻldi.

Aytish kerakki, Haj farzini ado etish uchun haj safariga otlanishning oʻz tartib-qoidalari bor. Bu borada 2017-yilda Oʻzbekiston Pespublikasi Vazirlar Mahkamasining “Haj” va “Umra” tadbirlarini tashkil etish va oʻtkazish tartibi toʻgʻrisidagi Nizomga oʻzgartirish va qoʻshimchalar kiritish boʻyicha tegishli qarori qabul qilingan edi.

Unga koʻra, tumanimizda ham Haj safariga otlanishni niyat qilgan fuqarolarning nomzodlarini saralab olish uchun mahallarda ishchi guruhlar tuzildi. Bu yilgi Haj mavsumi arafasida bu boʻyicha tuzilgan ishchi guruhlar tomonidan 25 nafar ziyoratchilar nomzodi saralab olinib, tuman ishchi guruhiga taqdim etildi. Tuman ishchi guruhi tomonidan har bir nomzod bilan belgilangan tartib-qoidalar asosida suhbat oʻtkazilganidan soʻng, ular haj safariga yuborishga tavsiya etildi.

“Yusuf Eshon bobo” jomʼe masjidida boʻlib oʻtgan kuzatish marosimida boʻlgʻusi hojilarga ziyorat davomida Makka va Madina shaharlarida barcha sharoitlarga ega mehmonxonalar xizmat koʻrsatib, tajribali ishchi guruh va malakali shifokorlar hamrohlik qilishi va boshqalar toʻgʻrisida maʼlumotlar berib oʻtildi.

Maʼlum qilinishicha, ziyoratchilar Madina shahrida «Masjidi Nabaviy»dan 100 metr uzoqlikda joylashgan 5 yulduzli «Zam-zam Pullman» va «Kraun Plaza» mehmonxonalarida, Makka shahrida esa «Abroj al-Hidoya» mehmonxonasida istiqomat qiladi. Ziyoratchilar mehmonxonadan tashqari, Mino-Muzdalifa-Arafot manzillarida ham uch mahal issiq ovqat hamda bepul tibbiy xizmat bilan taʼminlanadi.

Boʻlgʻusi hoji bobo va hoji onalarga eson-omon Alloh yoʻlidagi farzlarini ado etib qaytishlarini, ziyoratlari qabul boʻlishini tilab qolamiz.

Tuman hokimligining Axborot xizmati.