NOMLARI GAZETA TAXLAMLARIDA QOLGANLAR...
Bu yil Amudaryo tumanimiz tashkil qilinganligiga 65-yil toʻladi. Albatta, avvalgi sobiq “Amudaryo haqiqati” gazetasi ham 65 yoshda. Toʻgʻri, sobiq Mangʻit tumanida 1934-yildan “Stalinchi” va Qipchoq tumanida “Sotsializm yoʻli” gazetalari chiqqan. Ikki tuman 1957-yilning dekabr oyi oxirida birlashganidan soʻng, 1958-yilning yanvar oyi boshidan “Amudaryo haqiqati” degan nom bilan gazeta chiqa boshlagan. Gazeta bor-yoʻgʻi ikki yil chiqqanidan keyin tugatilib, 1960-62-yillarda Amudaryo, Toʻrtkoʻl, Beruniy tumanlari uchun “Kommunizm gʻalabasi” gazetasi chop etila boshladi. Keyinchalik bu gazeta ham tugatildi.
1965-yil iyul oyidan boshlab, yana “Amudaryo haqiqati” gazetasi tahririyati qayta tashkil etilib, oʻz faoliyatini boshladi. Men 1966-yil yanvar oyidan boshlab, shu gazetada faoliyat yuritdim. Gazeta muharriri, Alloh rahmat qilsin, ustoz Sobir Yusupov edilar. Ustoz 1965-1975-yillarda gazeta muharriri boʻlib ishladi, soʻngra tuman partiya qoʻmitasida pensiyaga chiqqanlarigacha – 1981-yilning boshiga qadar ishladilar.
Oʻsha paytlarda gazetaning jamoatchi muxbirlari juda koʻp boʻlib, ularning soni 100 nafardan ziyod edi. Ularning anchasi bu olamni tark etishdi. Xolmurod Otamurodov, Yoʻldosh Jumaniyozov, Toʻramurod Matqurbonov, Gʻoyib Xolimbetov, Jumaboy Bekchanov, Oʻrin Safariy, Usmon Ahmedov, Xolboy Oʻrozmetov, Qodirbergan Oʻtalov, Yoʻldosh Rahimov, Nurulla Xudoyorov, Yoʻldosh Matyoqubov, Rahimboy Jumaniyozov, Abduraim Matkarimov va boshqalarning yozgan xabar, maqola, lavha, reportaj, ocherklari gazeta sahifalarida muntazam yoritildi. Ularning nomlari va yoritilgan maqolalari “Amudaryo haqiqati” gazetasi taxlamlarida oʻchmas tarixiy dalillar sifatida qoldi.
Kezi kelganidan foydalanib, yuqorida nomlari tilga olingan, ayni kunda oramizda yoʻq jamoatchi muxbirlarimizning avlodlarini matbuot kuni bayrami bilan tabriklayman. Bobolarining ruhlari shod, iymonlari hamroh, oxiratlari obod va joylari hamisha jannatda boʻlsin!
Saʼdulla XOʻJANIYoZOV,
Qoraqalpogʻiston Respublikasida xizmat koʻrsatgan jurnalist.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
