TUMANDAGI 36-SONLI VA 56-SONLI MAKTABDA KENG KOʻLAMLI QURILISh-TAʼMIRLASh IShLARI OLIB BORILMOQDA

Prezidentimizning shu yil yanvar oyida “2022-2024-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi qarori qabul qilingan edi. Shunga koʻra mamlakatimizning ijtimoiy va ishlab chiqarish infratuzilmasini izchil rivojlantirish, qishloq va mahallalarni yanada obod qilish, joylarda qulay tadbirkorlik va investitsiya muhitini shakllantirish uchun 2022-2024-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi ishlab chiqildi va joriy etildi.
Amudaryo tumanida ham mazkur dastur boʻyicha keng koʻlamli qurilish-taʼmirlash ishlari olib borilmoqda. Ushbu dasturga koʻra Chordara mahallasidagi 36-sonli maktab binosi ham rekonstruktsiya qilinib, 180-oʻringa moʻljallangan qoʻshimcha bino qurish ishlari amalga oshirilmoqda. Loyiha bahosi 2 mlrd. 292 mln. soʻmdan ortiq boʻlgan qurilish ishlari “KMK-304” masʼuliyati cheklangan jamiyati tomonidan bajarilmoqda. Qurilish ishlarida tashkilotning 8 nafar ishchisi mehnat qilmoqda.
Ushbu maktab 1974-yilda foydalanishga topshirilgan. Oʻz davrida zamonaviy koʻrinishga ega boʻlgan mazkur maktab 560 oʻquvchi oʻrniga moʻljallangan. Ayni paytda ushbu taʼlim maskanida 30 ta sinfda 800 nafar oʻquvchi taʼlim-tarbiya olmoqda. Ularga 72 nafar pedagog-oʻqituvchilar yangi pedagogik texnologiyalar asosida taʼlim berishmoqda. Pedagoglarning 3 nafari oliy toifali, 9 nafari 1-toifali, 22 nafari 2-toifali, 38 nafari esa mutaxassis, 2 nafari rus tilidan S2 darajadagi sertifikatga ega oʻqituvchilardir.
Hozirda binosi taʼmirtalab holatga kelib qolgan mazkur maktabda taʼlim-tarbiya ishlari yaxshi yoʻlga qoʻyilgan boʻlib, oʻquvchilarning boʻsh vaqtlarini mazmunli tashkil etish, unumli foydalanishlarini taʼminlash maqsadida 8 ta fan, 4 ta sport, 2 ta ijtimoiy-madaniy toʻgaraklar tashkil etilgan. Shuningdek, oʻquvchi-yoshlar futbol, basketbol va voleybol maydonchalari hamda yopiq sport zalida sport bilan shugʻullanishadi.
Yosh avlod zamonaviy sharoitlarda taʼlim-tarbiya olishi uchun imkoniyat yaratish maqsadida qurilayotgan maktabning yangi binosining fundament ishlari yakunlangan boʻlib, ayni paytda ishchilar birinchi qavat gʻishtini terishmoqda. Bino avgust oyining oxirlarida foydalanishga topshirilishi moʻljallangan.

Dastur doirasidagi shu kabi qurilish-taʼmirlash ishlari Boyovul mahallasidagi 56-sonli maktabda ham amalga oshirilmoqda. Koʻp yillardan beri yosh avlodga taʼlim-tarbiya berilib kelinayotgan ushbu taʼlim maskani ham ancha taʼmirtalab boʻlib qolgan va oʻquvchi oʻrnini kengaytirishga ehtiyoj sezilayotgan edi. Quvvatidan ortiq oʻquvchisi mavjud boʻlgan mazkur maktabda imkon darajasida taʼlim-tarbiya ishlari yaxshi yoʻlga qoʻyilgan.
Tumanda 2020-2021-yilgi oʻquv yilida umumtaʼlim maktablarini tamomlagan bitiruvchilarining oliy  oʻquv yurtlariga oʻqishga kirish koʻrsatkichi yanada ortdi. Bu borada 56-sonli maktab eng ilgʻor taʼlim maskanlaridan biri boʻldi. Ushbu oʻquv yilida maktabning 11-sinfini tamomlagan  77 nafar bitiruvchidan 55 nafari, yaʼni 71,2 foizi OTMga qabul qilindi. Maktabning texnologiya fani yoʻnalishidagi 11-“B” variativ sinfining 25 nafar bitiruvchilaridan barchasi, yaʼni 100 foizi OTM talabalari boʻlishgan edi. Mazkur oʻquv yilidagi bitiruvchilardan ham ustozlarning umidi katta.
Oliy taʼlimga qamrab olish koʻrsatkichi boʻyicha eng ilgʻor boʻlgan 56-sonli maktabda ham zamonaviy sharoitlar yaratish maqsadida amalga oshirilayotgan qurilish ishlari tumandagi “Temir beton” masʼuliyati cheklangan jamiyati tomonidan bajarilmoqda. Loyiha bahosi 2 mlrd. 326 mln.dan ortiq boʻlgan qurilish ishlari davomida maktab uchun 180-oʻringa moʻljallangan qoʻshimcha bino va rekonstruktsiya ishlarini amalga oshirish rejalashtirilgan. Ayni paytda qoʻshimcha binoning fundament ishlari yakunlanib, birnchi qavatda gʻisht terish ishlari olib borilmoqda.
Har ikkala maktab oʻqituvchi va oʻquvchilari yangi oʻquv yilini taʼmirlangan va yangi qurilgan binoda qarshi olishadi. Ushbu taʼlim maskanlari jamiyat rivoji, taraqqiyotiga hissa qoʻsha oladigan, yurt kelajagiga munosib boʻlgan yoshlarni tarbiyalashga uzoq yillar xizmat qiladi.

Ozoda Xudoyberganova.