“Profilaktika inspektorining fuqarolarning oʻzini oʻzi boshqarish organlari va jamoatchilik bilan hamkorligi”

Bugungi kunda huquqbuzarliklar profilaktikasini tashkil etishda, jinoyatchilarni fosh etishda hamda huquqbuzarlarga nisbatan taʼsir choralarini amalga oshirishda jamoatchilik yordamidan keng foydalanib, samarali natijalarga erishilmoqda. Biroq shunga qaramay, respublikamizda jinoyatchilikka qarshi kurash va uning oldini olishda jamoatchilik bilan hamkorlikni tashkil etish va takomillashtirish islohotlarning hozirgi bosqichida dolzarbligicha qolmoqda.

2014-yil 14-maydagi «Huquqbuzarliklar profilaktikasi toʻgʻrisida»gi qonuni va ushbu qonun ijrosi boʻyicha qabul qilingan normativ-huquqiy hujjatlarda belgilangan qoidalarga asosan profilaktika (katta) inspektori fuqarolarning oʻzini oʻzi boshqarish organlari bilan quyidagi yoʻnalishlarda hamkorlik qiladi:

– aholi, eng avvalo yoshlar orasida sogʻlom turmush tarzini qaror toptirishga qaratilgan tadbirlar, huquqiy targʻibot ishlarini olib borish;

– axloq-odob doirasidagi huquqbuzarliklarning oldini olish, voyaga yetmaganlar va yoshlarni ommaviy madaniyatning salbiy taʼsirlaridan himoya qilish; 

– oila-turmush munosabatlari sohasida gʻayriijtimoiy xulqatvor, qilmish, turmush tarzi va huquqbuzarliklarning profilaktikasi boʻyicha chora-tadbirlarni birgalikda ishlab chiqish va amalga oshirish;

– mahalla fuqarolar yigʻini huzurida yarashtirish, maʼrifat va maʼnaviyat masalalari, xotin-qizlar bilan ishlash, voyaga yetmaganlar, yoshlar va sport masalalari, ekologiya va tabiatni muhofaza qilish, obodonlashtirish va koʻkalamzorlashtirish komissiyalarining aʼzosi sifatida ishtirok etish, shuningdek, boshqa yoʻnalishlar boʻyicha komissiyalarga ular vakolatlari doirasidagi masalalarni koʻrib chiqishda koʻmaklashish;

– xotin-qizlarning huquqlari, erkinliklari va qonuniy manfaatlarini himoya qilishga, ularning jamiyat hayotidagi, oilada maʼnaviy-axloqiy muhitni shakllantirishdagi, yosh avlodni tarbiyalashdagi rolini oshirishga qaratilgan chora-tadbirlarning olib borilishida amaliy yordam koʻrsatish;

– vijdon erkinligi va diniy tashkilotlar toʻgʻrisidagi qonun hujjatlariga rioya etilishini, fuqarolarning diniy eʼtiqod erkinligi huquqiga rioya etilishini taʼminlash, roʻyxatdan oʻtmagan diniy tashkilotlar faoliyat koʻrsatishining, diniy ekstremizmning oldini olish, diniy qarashlarni majburan singdirishga yoʻl qoʻymaslik, shuningdek, ularning sodir etilishi sabablari va ularga imkon bergan sharoitlarni aniqlash hamda bartaraf etish yuzasidan birgalikda chora-tadbirlarni amalga oshirish; 

– ozodlikdan mahrum etish bilan bogʻliq boʻlmagan jazo tayinlangan, shartli hukm qilingan, jazoni ijro etish muassasalaridan shartli ozod etilgan, maʼmuriy nazorat oʻrnatilgan, profilaktik hisobda turgan va boshqa shu kabi shaxslarning turmush tarzini nazorat qilish, ular bilan tarbiyaviy-profilaktik ishlarni olib borish;

– mahallada xavfsizlikni taʼminlash maqsadida xonadonlarga kirib chiqib, fuqarolarning oilaviy turmush tarzini oʻrganish va mavjud muammolarni tegishliligi boʻyicha hal etish choralarini koʻrish;

– fuqarolarga pasport tizimi qoidasiga amal qilgan holda yashashlari shartligi, doimiy yoki vaqtinchalik roʻyxatdan oʻtmasdan yashashlariga yoʻl qoʻymaslik, xonadonlarini noqonuniy ravishda ijaraga bermaslik yuzasidan tushuntirishlar olib borish.

IIV Akademiyasi 3-oʻquv kursi 309-gurux kursanti Jumabayev.A.M.