BERUNIY NOMLI MAHALLADA KOʻRGAZMALI SEMINAR VA DAVRA SUHBATI TAShKIL ETILDI

Amudaryo tumanining Beruniy nomli mahalla fuqarolar yigʻini binosida “Eng namunali mahalla faoli” deb nomlangan koʻrgazmali seminar va “Onajonlar oʻgiti” nomli davra suhbati boʻlib oʻtdi.

Tadbirlarda tuman hokimi oʻrinbosari Goʻzal Soburova hamda fuqarolar yigʻini masʼullari, hudud aholisi ishtirok etdilar. Tadbir munosabati bilan tashkil qilingan koʻrgazmada mahallada hunarmandchilik, tikuvchilik va yogʻochdan uy-roʻzgʻor  buyumlarini yasash orqasidan  oʻzini oʻzi band qilib, oilasiga daromad olib kelayotgan hunar egalari, ayol-qizlarning mehnat mahsullari namoyish etildi. Mazkur koʻrgazma xotin-qizlarning faolligini oshirish, ularning taʼlim va kasbiy koʻnikmalar olishi, bandligini taʼminlashga har tomonlama koʻmaklashish, tadbirkorlik tashabbuslarini yanada qoʻllab-quvvatlash maqsadida tashkil etildi.

Mehmonlar koʻrgazmaga qoʻyilgan uy-roʻzgʻor buyumlari, beshik, belanchak va yozgi kiyim-kechaklar, yumshoq oʻyinchoqlarni tomosha qilganlaridan soʻng, hunarmandlarning mehnatlariga munosib baho berishdi. Chiroyli va mustahkam, sifatli ishlangan xaridorgir mahsulotlarga talab yuqoriligi tashrif buyuruvchilar tomonidan eʼtirof etildi.

Tadbirda tuman hokimining oila, xotin-qizlar masalalari boʻyicha oʻrinbosari Goʻzal Saburova xotin-qizlarning mamlakat ijtimoiy-siyosiy hayotidagi oʻrni va faolligini oshirish, ularni har tomonlama qoʻllab-quvvatlash, oila va xotin-qizlarning muammolarini oʻz vaqtida aniqlash, ogʻir ijtimoiy ahvolga tushib qolgan oila va xotin-qizlarga ijtimoiy-huquqiy, psixologik yordam koʻrsatish, qishloqlardagi xotin-qizlarni kasb-hunarga, oilaviy va xususiy tadbirkorlikka keng jalb etish, oilalar maʼnaviy-axloqiy qadriyatlarini mustahkamlash borasida amalga oshirilayotgan ishlar xususida soʻzladi.

Bu kabi tadbirlar band boʻlmagan ayol-qizlarning tadbirkorlikni yoʻlga qoʻyishi, kasb-hunar oʻrganishga boʻlgan qiziqishlari ortishida muhim ahamiyat kasb etishini taʼkidlab, ustoz-shogird anʼanalarini yoʻlga qoʻyish, tumanda hunarmandlar rastalarini tashkil qilish masalalariga toʻxtalib oʻtdi.

Shundan soʻng, “Onajonlar oʻgiti”  nomli davra suhbati boshlandi. Ushbu tadbir ham tuman Oila va xotin-qizlar boʻlimi boshligʻi Goʻzal Saburova, shuningdek, 40-sonli maktab direktori Sanobar Xoʻjamurodova, Beruniy nomli mahallada yashovchi nuroniy onaxonlar va yoshlar, mahalla faollari ishtirokida oʻtkazildi.

Tadbir davomidagi ayollarimizning oiladagi, farzand tarbiyasidagi rolini hamda ijtimoiy hayotdagi faolligini oshirish, odobli qiz, iffatli kelin, maʼrifatli ayol  qanday boʻlishi kerakligi haqidagi suhbatlar bilan qizgʻin, muhokamali tarzda boʻlib oʻtdi.

Undan tashqari, suhbat davomida mahallada yashovchi Rima momo Rajabova “Mahallaning eng ibratli oila bekasi” va “Hunarmand ayol” sifatida, yoshlarga ibrat boʻla oladigan Shukurjon Xoʻjamurodova “Mahallaning faol ayoli”, Sohibjamol Uzakbayeva esa ”Hunarmand qiz” sifatida eʼtirof etildi.

”Onajonlar oʻgiti” deb nomlangan davra suhbati davomida yoshi ulugʻ onaxonlarimiz tomonidan yosh oilalar bekalariga va qizlarga oʻzining xayotiy tajribasidan kelib chiqib berilgan kerakli maslahatlari, oʻgitlari  tinglandi.

Qiziqarli oʻtgan tadbirlar mahalla ahlida katta taassurotlar qoldirdi.

O.Xudoyberganova.