KITOBGA MEHR
Taniqli oʻzbek yozuvchisi Oʻtkir Hoshimov "Daftar hoshiyasidagi bitiklar” kitobida shunday yozadi: "Eʼtibor berganmisiz – yoʻqmi, bilmadim-u, Sizning sadoqatda tengi yoʻq doʻstingiz bor. Qachon xohlasangiz siz bilan hamsuhbat boʻladi. Bilmaganingizni oʻrgatadi. Adashsangiz toʻgʻri yoʻl koʻrsatadi. Yaqin kishilaringiz burilib ketganida ham u sizni tark etmaydi. Xizmati uchun hech nima taʼma qilmaydi. Yillab unutib tashlab qoʻysangiz, indamaydi. Tagʻin chorlasangiz, yetib kelib, xizmatingizni qilaveradi...”
... Bu doʻstning nomi – Kitob!
Haqiqatan ham kitob – bizning beminnat doʻstimizdir. Kitobga mehr bolalikdan boshlanadi. Bolaga har xil ertak, badiiy kitoblar mutolaa qilish katta foyda beradi. Ayniqsa sogʻlom bolaning kamol topishida badiiy kitoblarning oʻrni beqiyosdir.
Albatta, kitob mutolaasida kattalarning ham tashabbuskorligi zarur. Sababi, bola ota-onadan, aka-opadan oʻrnak olib ulgʻayadi. Shunday ekan, bolani kitobga mehr ruhida tarbiyalash lozim. Tan olishimiz kerakki, bugungi kunda bolasiga kitob olib berayotgan ota-onalar kam. Menimcha, ota-onalar bolasiga falon soʻmlik mobil telefonlar, turli xil boʻlmagʻur disklar oʻrniga insonni har tomonlama yetuk, maʼnan sogʻlom qilib tarbiyalaydigan, hayotda toʻgʻri yoʻl koʻrsatadigan kitoblarni olib berishsa, maqsadga muvofiq boʻlur edi. Sababi, kitob insonga maʼnaviy ozuqa beruvchi, uning ongini, dunyoqarashini oʻstiruvchi samarali vositadir. Men dugonalarimga ham kitob mutolaasini tavsiya qilgan boʻlardim.
Bizning kollejimizda rus tili va adabiyoti fanidan dars beruvchi sevimli oʻqituvchimiz Nigora opa Saʼdullayevaning biz oʻquvchi yoshlarning kitobga mehr qoʻyib ulgʻayishimizda hissalari katta. Adabiyotdan oʻtayotgan har bir mavzuni va har bir badiiy asarni shu qadar ongimizga singdira biladilarki, biz ham bevosita xuddi mana shu asar qatnashchisiga aylanib qolamiz.
Biz shogirdlarning maʼnan sogʻlom, barkamol insonlar boʻlib kamol topishimizda muhim ahamiyat kasb etuvchi mana shunday – kitobni ulugʻlaydigan chinakam kitobsevar oʻqituvchimiz omon boʻlsin!
Kitoblar haqida soʻz ketar ekan, bir qizcha esimga tushadi.U tumanimizdagi 55-sonli umumtaʼlim maktabining 7-sinf oʻquvchisi Barchinoy Qozoqboyevadir. Yosh boʻlishiga qaramasdan, koʻplab jahon adabiyoti va oʻzbek adabiyoti namoyandalarining asarlarini mutolaa qilgan va qilmoqda. Badiiy kitoblar olamiga bogʻlanib qolgan bu qizcha maktabda ham aʼlo baholarga oʻqiydi. Unga ayniqsa, Oʻ.Hoshimovning "Daftar hoshiyasidagi bitiklar”, Shukrulloning "Kafansiz koʻmilganlar” kabi asarlari yoqadi. Hozirda u Mark Tvenning "Ovsar Vilson” asarini mutolaa qilmoqda.
Oramizda Barchinoyga oʻxshagan yosh kitobxonlar judayam koʻp. Bu - quvonarli. Chunki, kitob - beminnat tarbiyachidir.
Aziza MADRAHIMOVA,
Mangʻit iqtisodiyot kasb-hunar kolleji oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
