HOSIL MOʻL, XIRMON YuKSAK

Oʻzbek paxtasini jahon bozoriga chiqarishda paxtani qayta ishlash sanoatining oʻrni beqiyos. Shu sababli 2001-yil 11-iyun kuni Oʻzbekiston Respublikasi Prezidentining "Respublika paxta tozalash sanoatini monopoliyadan chiqarish va boshqaruvini takomillashtirish chora-tadbirlari toʻgʻrisida”gi Farmoni qabul qilinib, Farmon asosida "Oʻzpaxtasanoat” uyushmasi tashkil etilgan edi.

Paxta tolasi "Oʻzpaxtasanoat” uyushmasiga qarashli paxta tozalash korxonalarida ishlab chiqariladigan, eksportga yoʻnaltirilgan mahsulotning muhim turlaridan biri boʻlib, xalqaro ekspertlar fikricha, soʻnggi yillarda oʻzbek tolasining paxta bozori talablariga toʻliq javob beruvchi sifat xususiyatlarining yaxshilanishi sababli unga boʻlgan qiziqish yanada oshdi.

Tumanimizda yetishtirilgan paxtani yigʻim-terim mavsumida uzluksiz qabul qilib olish tuman paxta tozalash korxonasining asosiy vazifasidir. Korxona zimmasiga xom ashyoni saqlash, uni sifatli qayta ishlash, paxta mahsulotlari ishlab chiqarish, paxta terminallari orqali eksportga joʻnatish, gʻoʻzaning urugʻlik fondini tayyorlash kabi vazifalar yuklatilgan. Shu bilan birga, korxona fermer xoʻjaliklariga urugʻlikni taqsimlash, yetkazib berish, xom ashyoni yigʻib-terish va uni keyingi ishlov uchun paxta tayyorlash punktlariga qabul qilishgacha boʻlgan koʻplab tadbirlarning amalga oshirilishida koʻmaklashadi.

Xalqimizda "Urugʻ sifati – hosil barakasi”, degan gap bor. Bu bejiz aytilmagan. Shu bois boʻlsa kerak, koʻpni koʻrgan usta dehqon-paxtakorlar bilan suhbatlashsangiz, hosildorlikning kutilganidek boʻlishi urugʻlik chigitning navdor, sara boʻlishiga bogʻliq ekanini taʼkidlashadi. Darhaqiqat, paxta tolasining uzunligi, pishiqligi, sanoatbopligi va sifati koʻp jihatdan urugʻlikka bogʻliq. Tumanimizdagi 262 ta fermer xoʻjaliklari bilan urugʻlik chigit yetkazib berish boʻyicha tuzilgan shartnomalarga muvofiq, hududlardagi 17 ta shoxobchalar orqali 1538 tonna chigit ekish mavsumida oʻz vaqtida yetkazib berildi. Bu yil paxta yetishtirish uchun ajratilgan asosiy maydonlarga gʻoʻzaning "Omad”, "S-4727”, "Sulton", "Porloq", "Buxoro-8” va boshqa qator navlar urugʻlari ekildi.

Mavsumdagi muhim yangilik - korxonamizga qarashli zavodning "Oq oltin” ovuli hududida joylashgan "Oq oltin” paxta qabul qilish maskani hududiga koʻchirilgani boʻldi. Mavsum oldidan ushbu yangi paxta tozalash zavodi hududi obodonlashtirilib, uning qoshida savdo va maishiy xizmat koʻrsatish obʼektlari qurilishi poyoniga yetkazildi. Zavodning yangi maskanga koʻchib oʻtishi munosabati bilan "Yulduz” ochiq hissadorlik jamiyati nomi oʻzgartirilib, "Amudaryo paxta tozalash” aktsiyadorlik jamiyati shaklida qayta roʻyxatdan oʻtkazildi.

Eng muhimi, joriy yilgi paxta yigʻim-terimi muvsumiga puxta tayyorgarlik koʻrildi. Korxonaning asosiy qabul maskani hamda unga qarashli joylardagi paxta qabul qilish maskanlarida mavsumga tayyorgarlik ishlari sifatli bajarildi. Xususan, qabul maskanlarida transportyorlar, gʻaram maydonchalari, paxta qabul qiluvchi moslamalar, havo soʻrgichlar, gʻaram buzgich uskunalar, avtotarozi binosi, suv hovuzi, maskanlar hududini oʻrab turgan devorlar sifatli taʼmirlandi. Mavjud avtotarozilar davlat standarti koʻrigidan oʻtkazildi. Paxta gʻaramlarini yaxshi saqlash uchun zarur sharoitlar yaratildi.

Joriy yilning 10-sentyabridan boshlab korxonamizga qarashli 6 ta paxta qabul qilish maskanlarida "oq oltin” ortilgan karvonlarni qabul qilish boshlab yuborildi. Shu kungacha qabul qilingan jami hosilning konditsion vazni 33 ming tonnadan ortib ketdi.

Mavsum boshlanganidan beri fermer xoʻjaliklariga qoʻl terimiga jami 7 mlrd. soʻmdan ortiq naqd pul mablagʻlari tijorat banklari tomonidan terim puli sifatida tarqatildi.

Korxonamizda 400 nafardan ortiq ishchilar mehnat qilmoqdalar. Ulardan bosh muhandis Baxtiyor Toʻrayev, bosh energenik Mahmud Boltayev, bosh mexanik Paraxat Oʻrozboyev, tayyorlov boʻlimi boshligʻi Bahodir Qodirov, texnik nazorat boʻlimi boshligʻi Rajab Toʻrayev kabi oʻz kasbining jonkuyarlari paxtakorlarimizning peshona teri evaziga yetishtirilgan "oq oltin”ini qabul qilish, saqlash va qayta ishlash jarayonida fidoyilik koʻrsatmoqdalar.

Fursatdan foydalanib, mehnat jamoamiz nomidan tumanimiz paxtakorlarini, fermerlarni, qishloq xoʻjaligi sohasi mutaxassislarini va barcha hasharchilarni mehnat zafari – tumanimizda davlatga paxta topshirish boʻyicha shartnomaviy rejaning bajarilishi munosabati bilan tabriklagan holda "Hormang, aziz paxtakorlar!” deymiz!

Olimboy XUDOYBERGANOV,

"Amudaryo paxta tozalash” aktsiyadorlik jamiyati raisi.

M.HABIBULLAYeV

olgan surat.