KUYuK KOʻPIR OVUL FUQAROLAR YIGʻINI RAISI SAYLOVI OʻTKAZILDI

Mamlakatimizning barcha hududlaridagi kabi Amudaryo tumanida ham joriy yilning 16-may sanasidan fuqarolar yigʻinlari raisligiga saylovlar boshlandi. Saylov jarayonlari uyushqoqlik bilan oʻtkazilmoqda.

19-may kuni Kuyuk koʻpir ovulida ham fuqarolar yigʻini raisi saylov boʻlib oʻtdi. Hududdagi 19-sonli maktab binosida boʻlib oʻtgan saylovda ovul fuqarolari nomidan jami 252 nafar vakillar qatnashdi.

Maʼlumki, 2022-yil 16-mart kuni Oliy Majlis Senati Kengashining tomonidan “Fuqarolar yigʻinlari raislari (oqsoqollari) sayloviga tayyorgarlik koʻrish va uni oʻtkazish toʻgʻrisida”gi qarori qabul qilingan edi. Ushbu qarorga va Oʻzbekiston Respublikasining “Fuqarolar yigʻini raisi (oqsoqoli) saylovi toʻgʻrisida”gi Qonuniga muvofiq, tumanda har bir ovul va mahalla fuqarolar yigʻinlarida saylovlarni oʻtkazishga qizgʻin tayyorgarlik koʻrildi.

Saylovni oshkoralik, tenglik va shaffoflik tamoyillariga amal qilgan holda yuqori saviyada tashkil etish maqsadida xalq deputatlari tuman Kengashining qarori bilan saylovni tashkil qilish va oʻtkazishga koʻmaklashuvchi tuman komissiyasi tuzildi hamda tadbirlar rejasi tasdiqlandi. Komissiya tarkibiga idora va tashkilotlarning rahbarlari, deputatlar va jamoatchilik vakillari jalb etildi.

Kuyuk koʻpir ovulida aholi oʻrtasida fuqarolar yigʻinlari raisi saylovini tashkil etish va oʻtkazish boʻyicha ishchi guruh tomonidan saylovga tayyorgarlik masalalari boʻyicha tushuntirish ishlari tashkil etildi. Koʻchalar, xonadonlardan fuqarolarning vakillik normasi belgilanib, vakillar roʻyxati tasdiqlandi. Hududda doimiy yashovchi fuqarolarning fikrini inobatga olgan holda fuqarolar yigʻini raisi lavozimiga nomzodlar boʻyicha takliflar tayyorlandi.

Fuqarolar yigʻini raisi lavozimiga oliy maʼlumotga ega, bevosita saylovga qadar kamida besh yil tegishli hududda doimiy yashayotgan, tashkilotchilik qobiliyatiga, davlat organlarida yoki nodavlat notijorat tashkilotlarida yoxud tadbirkorlik va boshqa xoʻjalik faoliyati sohasida ish tajribasiga, shuningdek hayotiy tajribaga va aholi oʻrtasida obroʻ-eʼtiborga ega boʻlgan shaxslar nomzod qilib koʻrsatildi.

Ishchi guruh hamda saylovni tashkil qilish va oʻtkazishga koʻmaklashuvchi tuman komissiyasi tomonidan barcha nomzodlar oʻrganib chiqilib, tuman hokimi tomonidan Karimova Tamara Otaxonovna hamda Shermetov Joʻrabek Xolimbetovichlar nomzodlariga kelishim berildi.

Saylovda har ikkala nomzod dastlab barchani oʻz dasturi bilan tanishtirdi. Shundan soʻng, Oʻzbekiston Respublikasining “Fuqarolar yigʻini raisi (oqsoqoli) saylovi toʻgʻrisida”gi Qonunining 20-moddasiga koʻra, fuqarolar yigʻini raisini saylash yashirin ovoz berish orqali amalga oshirildi.

Ovozlarni sanash natijalari boʻyicha sanoq komissiyasi tomonidan Karimova Tamara Otaxonovnaga 127 nafar, Shermetov Joʻrabek Xolimbetovichga 121 nafar vakillar ovo bergani maʼlum qilindi. Ovoz berishda ishtirok etgan vakillarning yarmidan koʻprogʻining ovozini olgan nomzod – amalda ovul fuqarolar yigʻini raisi lavozimida ishlab kelayotgan Karimova Tamara Otaxonovna fuqarolar yigʻini raisi lavozimiga saylandi.

Tumanimizning boshqa hududlarida ham fuqarolar yigʻini raisi lavozimiga saylov jarayonlari qizgʻin davom etmoqda.

O.Xudoyberganova