Hokim yordamchilariga planshetlar topshirildi

Oʻzbekiston Respublikasi Vazirlar Mahkamasining 2022-yil 16-fevral kungi qarori bilan Hokim yordamchilari faoliyatini qoʻllab-quvvatlash jamgʻarmasi tashkil etilgan edi.

Jamgʻarma mablagʻlaridan moliyalashtiriladigan asosiy yoʻnalishlardan biri sifatida hokim yordamchilari faoliyatini samarali tashkil etishga kompyuterlar, planshetlar, multimedia va tarmoq qurilmalari hamda dasturiy taʼminotlarni xarid qilish xarajatlari koʻrsatilgan.

Shu maqsadda, jamgʻarma mablagʻlari hisobidan 21 nafar hokim yordamchisiga soʻnggi, zamonaviy rusmdagi kompyuterlar, 16 nafariga kerakli ish jihozlari xamda zamonaviy mebellar topshirilgan edi.

17-may kuni tuman hokimligida hokim yordamchilari bilan yigʻilish boʻlib oʻtdi. Yigʻilishda tuman hokimi Sultonboy Yoʻldashev qatnashib, hokim yordamchilariga elektron platformalarga ulangan, masofadan turib hisobotlar taqdim etish, xamda videokoferentsaaloqa shaklida yigʻilishlarda ishtirok etish imkonini beruvchi planshetlarni tantanali ravishda topshirdi.

Shuningdek, tuman hokimi hokim yordamchilari faoliyatini samarali tashkil etish, ularning aholi bilan ishlash borasidagi tajriba va malakalarini boyitish yuzasidan oʻz taklif va tavsiyalarini ham berib oʻtdi.

Shu oʻrinda aytish kerakki, bugun Respublikamizning barcha hududlarida 9 ming nafardan ziyod hokim yordamchilari oʻz faoliyatlarini olib bormoqda.

Jumladan, ular sektor rahbarlari bilan birgalikda mahallani ijtimoiy-iqtisodiy rivojlantirish yoʻnalishlarini belgilash, xonadonbay asosda mahalladagi haqiqiy ijtimoiy vaziyatni aniqlash, mahallaning “oʻsish nuqtasi”dan kelib chiqib, taklif etilayotgan yangi loyihalarni amalga oshirishga koʻmaklashish, aholini kasb-hunar va tadbirkorlikka oʻqitish va ularning bandligini taʼminlash boʻyicha koʻplab tizimli ishlarni amalga oshirmoqdalar.

Qolaversa, fuqarolar bilan muloqotlar jarayonida “daftarlar” doirasida oʻrganishlar oʻtkazilib, ijtimoiy reyestrni qaytadan yangilashmoqda. Bunda oʻz-oʻzidan mahallalar qiyofasi shakllanib, ijtimoiy muhitni yaxshilashga doir vazifalar ham belgilanmoqda.

Qolaversa, hokim yordamchilari tadbirkorlik faoliyatini yoʻlga qoʻygan aholini qoʻllab-quvvatlash maqsadida tuman fermer, dehqon xoʻjaliklari va tomorqa yer egalari Kengashi bilan hamkorlikda sifatli urugʻ, koʻchatlar yetkazib berish, biologik oʻgʻitlar bilan taʼminlash, eksport koʻlamini kengaytirish boʻyicha izchil saʼy-harakatlar olib bormoqda.

Mamlakatimizda amalga oshirilayotgan bunday islohatlar “Inson qadri har narsadan ustun” tamoyili asosida amalga oshirilmoqda.

Ushbu yilning “Inson qadrini ulugʻlash va faol mahalla yili” deb nomlanganligining oʻzida ham alohida ramziy maʼno bor. Mahalla institutining ustunlari hisoblangan mahalla raisi, hokim yordamchisi, xotin-qizlar faoli, yoshlar yetakchisi oʻz mahallasida istiqomat qilayotgan har bir fuqaroning ishonchli vakili sifatida faoliyat yuritib, mahalladoshlarining hurmat va eʼtiboiga sazovor boʻlmoqda.

Tuman hokimligining Axborot xizmati