Fuqarolar yigʻinlari raislari saylovi qonun talablari asosida oʻtkazilmoqda

Mahalla instituti oʻzini oʻzi boshqarish organi sifatida maʼlum bir hududdagi ijtimoiy-siyosiy, madaniy, diniy va boshqa masalalarda mustaqil ish olib boruvchi ijtimoiy tuzilma hisoblanadi. Butun mamlakatimizda boʻlgani kabi Amudaryo tumanida ham joriy yilning may oyida oʻtkaziladigan fuqarolar yigʻinlari raislari saylovini tashkil etish va oʻtkazishga doir ishlar yuqori saviyada tashkil etildi.

16-may kuni tuman hududida ham fuqarolar yigʻinlari raisligiga saylovlar jarayonlari boshlab yuborildi. Jumladan, Oʻrtaqalʼa ovulida ham fuqarolar yigʻini maʼmuriy binosida saylov jarayoni Oʻzbekiston Respublikasi Davlat madhiyasi bilan boshlandi.

Amaldagi tartib asosida koʻcha va guzarlarda oʻtkazilgan yigʻilishlarda fuqarolar yigʻini raisligiga shu ovulda obroʻ-eʼtiborga ega, qonunchilikda belgilangan talablarga mos boʻlgan nomzodlar koʻrsatilib, tuman hokimi tomonidan Zamira Eshmuradova hamda Hayitboy Qutlimurodovlarning nomzodlariga kelishim berilgan. Oʻtkazilgan saylovda fuqarolar yigʻini raisligi uchun qoʻyilgan ikki nafar nomzod vakillar yigʻilishiga kelganlarni oʻz dasturi bilan tanishtirdi.

Oʻrtaqalʼa ovulida fuqarolar vakillari yigʻilishida ishtirok etish uchun hovli, uy, koʻchalardan 360 nafar vakillar saylangan edi. Nomzodlar vakillarni oʻz dasturlari bilan tanishtirganlaridan soʻng, barcha vakillar oʻz vakolatlaridan foydalanib, oʻzlari maʼqul deb bilgan nomzodga ovoz berdilar. Ovoz berish jarayonida 360 nafar vakillardan 245 nafari qatnashdi.

Aytib oʻtish kerakki, Amudaryo tumanida 2 ta shaharcha, 16 ta ovul va 31 ta mahalla jami 49 ta fuqarolar yigʻinlari faoliyat koʻrsatmoqda. Ularning barchasida 2022-yilning may oyida boʻlib oʻtadigan fuqarolar yigʻinlari raislari sayloviga tayyorgarlik koʻrish va uni oʻtkazish boʻyicha tegishli vazifalar belgilanib, 25 banddan iborat tadbirlar rejasi hamda 19 kishidan iborat fuqarolar yigʻinlari raislari saylovini tashkil etish va oʻtkazishga koʻmaklashuvchi tuman komissiyasi tarkibi tasdiqlandi.

  29-30-mart kunlari saylovni tashkil etish va oʻtkazish boʻyicha fuqarolar vakillarining yigʻilishlari oʻtkazildi hamda har bir  fuqarolar yigʻinida 7 kishidan iborat ishchi guruhlar tuzilib, ularning tarkibi tasdiqlandi.

Amudaryo tumanida saylov yoshiga toʻlgan fuqarolar umumiy sonining kamida oʻn ikki foizi miqdorida hovlilar, uylar, koʻchalar va aholi punktlari boʻyicha jami 15 ming 75 nafar fuqarolar vakil sifatida saylandi.

Tumanda fuqarolar yigʻinlari raislari saylovi 26 tasi maktab binosida,  3 tasi kasb-hunar maktablari va texnikumlar binosida, 1 tasi Bolalar musiqa va sanʼat maktabi binosida, 1 tasi korxona va tashkilot binosida, 11 tasi toʻyxonalar binosida va 1 tasi mahalla guzarida va 6 tasi Madaniyat muassasalarida oʻtkazilishi belgilangan.

Oʻzbekiston Respublikasining “Fuqarolar yigʻini raisi (oqsoqoli) saylovi toʻgʻrisida”gi qonuni talablariga asosan, mahallalardagi Ishchi guruhlar tomonidan har mahalladan 2-3 nafardan jami 147 nafar nomzodlar tavsiya etilgan.

Oʻrtaqalʼa ovulida oʻtkazilgan saylov natijalariga koʻra, fuqarolar yigʻini raisligiga nomzodi qoʻyilgan Zamira Eshmuradova saylovda ishtirok etgan vakillarning 24 foiz, Hayitboy Qutlimurodov 74 foiz ovozini toʻplashdi. Eng koʻp ovoz toʻplagan Hayitboy Qutlimurodov ovul fuqarolar yigʻini raisligiga saylandi.

Raislikka saylangan Hayitboy Qutlimurodov bor kuch va bilimini ovul obodligini taʼminlashga, hududni rivojlantirishga sarflashga soʻz berib, nomzodini qoʻllab-quvvatlagan, ushbu masʼuliyatli vazifani ishonib topshirgan ovuldoshlariga oʻz minnatdorchiligini bildirdi.

Ozoda Xudoyberganova.