16-SONLI MAKTABDA FUQARO MUHOFAZASI KUNIGA BAGʻIShLANGAN TADBIR OʻTKAZILDI

Kundalik turmushimizda insonning xavfli vaziyatlarga tushib qolish ehtimoli katta. Bu turmushdagi jarohat, transport yoki sanoat avariyasi, yongʻin, suv toshqini, sel oqimi yoki boshqa tabiiy hodisalar boʻlishi mumkin. Bunday vaziyatlarda holatni baholay olish, toʻgʻri harakat qilishga tayyor turish jabrlanganlar sonining kamayishiga va moddiy zararning kamayishiga olib keladi.

Amudaryo tumanida 1-aprel kunidan 1-may kuniga qadar boʻlgan davr “Favqulodda vaziyatlarning oldini olish va fuqaro muhofazasi oyligi” deb belgilandi. Tuman hokimi – Fuqaro muhofazasi boshligʻining shu yil 31-martdagi tegishli buyrugʻi talablariga asosan oylik doirasida hududlarda tadbirlar oʻtkazilib, fuqarolarning favqulodda vaziyatlarga tayyorgarlik holatlari koʻrib chiqilmoqda.

Joriy yilning 19-aprel kuni navbatdagi tadbir 16-sonli maktabda tashkil etildi. Unda tuman Favqulodda vaziyatlar boʻlimi masʼullari, maktab direktori Ravshanoy Oʻrozboyeva, Chaqiriqqa qadar boshlangʻich tayyorgarlik rahbari Akmal Saidov hamda maktab oʻquvchilari ishtirok etdilar.

Tadbirda taʼkidlanganidek, xavf tugʻilganda tezlikda qanday vaziyat yuz berganligini baholay olish, xavfning favqulodda vaziyatga aylanishiga yoʻl qoʻymaslik, xavfli vaziyatdan chiqib ketish uchun toʻgʻri harakat qila bilish alohida ahamiyat kasb etadi. Bunday vaziyatlarning muvaffaqiyatli tugashiga odatda insonning qiyinchiliklarni yengishga boʻlgan tayyorgarligi hisobiga erishish mumkin.

Mazkur oylikni oʻtkazishdan maqsad – tabiiy va texnogen tusdagi favqulodda vaziyatlar yuzaga kelganda maktab oʻquvchilarining toʻgʻri harakat qilish koʻnikmalarini takomillashtirish, fuqaro muhofazasi boʻyicha tuzilgan guruhlarni kechiktirib boʻlmaydigan avariya va qutqaruv ishlariga tayyorgarligini kuchaytirishdan iborat.

Shuningdek, favqulodda vaziyatlar yuzaga kelganda fuqaro muhofazasi guruhlarining oʻz majburiyatlarini aniq va toʻgʻri bajarishini amaliyotda sinash va oʻrganish, tuman fuqaro muhofazasi xizmatlarining hamkorlikdagi harakatlarini takomillashtirish kabilar ham koʻzda tutilgan.

Tadbir masʼullar kuzatuvida ikki bosqichda olib borildi. Birinchi bosqichda “Maktabda yuzaga kelishi mumkin boʻlgan favqulodda vaziyatlarda fuqaro muhofazasi guruhlari va maktab rahbariyatining harakatlari” mavzusida oʻquv mashqining nazariy qismi oʻtkazildi. Maktab ichkarisida oʻquvchilarga kutilmaganda favqulodda hodisalar sodir boʻlib qolganida bajarishi lozim boʻlgan harakatlar tushuntirildi va buni amaliyotda bajarish uchun oʻquvchilar guruhlarga boʻlib olindi.

Ikkinchi bosqichda maktabda kutilmagan avariya hodisalari sodir boʻlganida dastlabki harakat qilish jarayonlari bajarildi. Favqulodda holatda jabrlanganlarga maktab fuqaro muhofazasi guruhlari tomonidan birinchi yordam koʻrsatish, ogʻir ahvolga tushganlarni qutqarish kabi ishlar amalda koʻrsatib berildi.

Tadbirda maktab rahbarlar tarkibi va fuqaro muhofazasi tuzilmasidan 44 nafar oʻquvchilar, tuman Favqulodda vaziyatlar boʻlimidan 2 nafar xodim va maktab oʻqituvchi va oʻquvchilaridan 65 nafari qatnashdi. Tadbirga tashrif buyurgan masʼullar tadbir davomida ishtirokchilarning amaliyotda yoʻl qoʻygan kamchiliklarini koʻrsatib berishdi. Shuningdek, bunday kamchiliklarga yoʻl qoʻymasliklari kerakligi, favqulodda vaziyatlarga doim tayyor turish lozimligi, aks holda kutilmagan xavfli hodisalar ogʻir oqibatlarni keltirib chiqarishi mumkinligi aytib oʻtildi.

B.Tajiboyev, tuman Favqulodda vaziyatlar boʻlimi boʻlinma boshligʻi, kapitan.