"Jayxun ilhomlari" NNT grant loyihasi doirasida davra suhbati oʻtkazildi

Amudaryo tumanida faoliyat yuritayotgan “Jayxun ilhomlari” nodavlat notijorat tashkiloti tomonidan amalga oshirilayotgan “Yoshlar – yangi Oʻzbekiston bunyodkorlari” loyihasining kalendar rejasi boʻyicha tumanning barcha joylarida davra suhbatlari, uchrashuvlar oʻtkazilib kelinmoqda.

Tashkilotning asosiy maqsadi tumanimizdagi ijodkor shoir va yozuvchilar, sanʼatkorlar, amaliy sanʼat ustalarini izlab topib, ularning iqtidorini elga tanitish, yoshlarning barkamol, maʼnaviy yetuk insonlar boʻlib yetishishiga erishishdir.

Shu maqsadlarda tashkilot tomonidan maktablarda, ovul va mahalla fuqarolar yigʻinlarida, korxona va tashkilotlarda oʻtkazilayotgan har bir uchrashuv va davra suhbatlarida mahalla faollari, mehnat faxriylari, imomlar, ijodkorlar, maʼnaviyat targʻibotchilari ishtirok etib tushuntirish ishlarining samarali boʻlishiga erishilmoqda.

“Oilada yoshlar tarbiyasining ahamiyati”, “Yoshlarning maʼnaviyatini yuksaltirish, ularni kitobxonlikka jalb qilish”, “Farzand tarbiyasida ota-onalar va mahallaning oʻrni”, “Yoshlarni giyohvandlik, ichkilikbozlik va boshqa illatlardan himoya qilish” mavzularidagi suhbatlar barchada katta qiziqish uygʻotmoqda va bu borada keng tarzda fikr mulohazalar bildirilmoqda.

Yoshlarning bilim va iqtidorini, fikr-mulohazalarini sinash maqsadida tashkilot tomonidan maktab oʻquvchilari orasida turli mavzularda insholar tanlovlari oʻtkazilib, tanlov gʻoliblari va ishtirokchilari qimmatbaho sovgʻalar, faxriy yorliqlar bilan taqdirlanib kelinmoqda.

Navbatdagi “Yoshlar oʻrtasida sogʻlom turmush tarzi koʻnikmalarini keng targʻib qilish, ularni giyohvandlik, ichkilikbozlik turli axloqsizliklardan himoya qilish” mavzusidagi davra suhbati tuman Xalq taʼlimi boʻlimiga qarashli 50-sonli umumtaʼlim maktabida oʻtkazildi. Tadbirda shifokorlar, Ichki ishlar boʻlimi xodimlari, faol ota-onalar, maktabning yuqori sinf oʻquvchilari, oʻqituvchilar ishtirok etishdi.

Davra suhbatini 50-sonli maktab direktori Alisher Eshniyozov kirish soʻzi bilan ochdi hamda boshqarib bordi. U yigʻilish kun tartibidagi barcha masalalar yuzasidan qatnashuvchilarni tanishtirib oʻtdi.

“Jayxun ilhomlari” nodavlat notijorat tashkilotining raisi Oʻrozali Reyimov oʻz soʻzida grant loyihasining mazmun-mohiyati va ahamiyati, loyiha doirasida amalga oshirilayotgan ishlar hamda ulardan kutilayotgan natijalar haqida gapirib oʻtdi. Shuningdek, bugungi kunda ijodkor yoshlarga qaratilayotgan eʼtibor va gʻamxoʻrliklar, ularni qoʻllab-quvvatlash, xususan ularning ijod mahsullarini gazetalar va Amudaryo televideniyesida yoritib borish borasida olib borilayotgan ishlarga toʻxtalib oʻtdi.

Hududdagi 3-sonli oilaviy poliklinika bosh shifokori Jahongir Pirmonov soʻzga chiqib sogʻlom turmush tarzi koʻnikmalarini targʻib qilish borasida, shuningdek, bu borada kun tartibiga qatʼiy amal qilib borish zarurligini hayotiy misollar orqali yoshlarga tushuntirib berdi. Sogʻlom turmush tarzning garovi doimiy harakat va jismoniy mashqlar bilan muntazam shugʻullanib borish ekanligini taʼkidlab oʻtdi.

Yoshlar oʻrtasida jinoyatchilik, huquqbuzarlikning oldini olish hamda ularni giyohvandlik, ichkilikbozlik, turli axloqsizliklardan himoya qilish borasida “Oq oltin” ovul fuqarolar yigʻini profiliaktika noziri Marat Sipatdinov soʻzga chiqib, bugungi kunda oʻquvchi-yoshlarning turli huquqbuzarlik va jinoyatchilikka yoʻl qoʻymasliklari uchun Oʻzbekiston Respublikasi maʼmuriy javobgarlik toʻgʻrisidagi hamda Jinoyat toʻgʻrisi Kodeksi koʻrsatiladi javobgarlik haqidagi nizomlardan misollar keltirib, yigʻilish ishtirokchilariga maʼlumotlar berib oʻtdi.

Faol ota-onalar nomidan mehnat faxriysi Zulfiya Bekimbetova soʻzga chiqib farzand tarbiyasida ota-onalar va oʻqituvchilar, mahalla ahli birdek masʼul ekanligini alohida taʼkidladi. Maktabning 8 B-sinf oʻquvchisi Rayhona Tojiboyeva esa oʻzining yangi yozgan sheʼrlaridan oʻqib berdi.

Tadbir soʻngida 50-sonli maktabning maʼnaviy maʼrifiy ishlar boʻyicha direktori oʻrinbosari Akram Qurbonboyev mazmunli suhbatlari uchun davra suhbati tashkilotchilariga maktab maʼmuriyati tomonidan teran minnatdorchilik bildirdi.

Oʻ.REIMOV.