Amudaryolik Shahzod Soliyev – Oʻzbekiston chempioni!

Mamlakatimizda bolalar sportini rivojlantirishga qaratilayotgan eʼtibor tufayli oʻz qobiliyatlarini amalda namoyon etib, turli nufuzli sport musobaqalarida sovrinli oʻrinlarni egallab kelayotgan yoshlar safi tobora oshmoqda. 

Durunki mahallasida tugʻilib oʻsgan Shahzod Soliyev  sportning stol tennisi bilan shugʻullanishni boshlaganida hali juda kichkina, 5-6 yashar bolakay edi. 36-sonli umumtaʼlim maktabida jismoniy tarbiya fani oʻqituvchisi boʻlgan bobosi Soliy Yoʻldoshev nevarasining qiziqishlari bilan shaxsan oʻzi jiddiy shugʻullana boshladi. Uyida nevarasi uchun tennis stoli oʻrnatib, uning har  bir harakati, intilishlarini erinmay kuzatib bordi, shu bilan birga, mashgʻulotlar uzviyligini taʼminlashga alohida eʼtibor qaratdi.

Shahzod avval oilaviy musobaqalarda  dadasini, keyinchalik bobosini epchillikda ortda qoldirdi. Oʻzi taʼlim olayotgan 36-sonli maktabda  esa sinflararo va hududiy musobaqalarda doimiy gʻoliblar safidan joy oldi.

10 yoshidan tuman Bolalar-oʻsmirlar sport maktabining stol tennisi  toʻgaragiga qatnay boshlagan Sh.Soliyev toʻgarak rahbari Hamida Rajabovadan bu nozik sport turining sir-asrorlarini oʻrgandi. BOʻSMda oʻtkazilgan stol tennisi musobaqalarida, tuman birinchiligida faol ishtirok etib, muntazam ravishda yuqori oʻrinlarni egalladi.

Nevarasidagi stol tennisiga boʻlgan qiziqishni ragʻbatlantirish maqsadida Soliy ota Yoʻldoshev uni 2017-yilda Nukus shahridagi olimpiya zahiralari kollejiga olib bordi. Kollejda tanlagan yoʻnalishi boʻyicha  mahorat va epchillik hamda test  sinovlaridan muvaffaqiyatli oʻtgan Sh.Soliyev oʻqish jarayonida nafaqat stol tennisi sportining nozik jihatlarini, balki sportchiga xos boʻlgan madaniyatni, shu bilan birga umumtaʼlim fanlarini puxta oʻrgandi. Qisqa fursat ichida u namunali, intizomli xulqi, bilimdonligi bilan va stol tennisi boʻyicha mohir sportchi sifatida tanildi.

Yaqinda, bahor bayramlari arafasida Sh.Soliyev ustozlari uchun munosib sovgʻa hozirladi. U joriy yilning 1-7-mart kunlarida  Fargʻona viloyatida, 2004-2006-yillarda tugʻilgan oʻsmir oʻgʻil bolalar va qizlar  oʻrtasida stol tennisi boʻyicha boʻlib oʻtgan Oʻzbekiston chempionatida eng chiroyli oʻyin koʻrsatib, 1-oʻrinni qoʻlga kiritdi hamda Oʻzbekiston Respublikasi Sport ishlari Vazirligi tomonidan 1-Darajali Diplom va oltin medal bilan taqdirlandi.

Oʻz yoʻnalishi  boʻyicha Oʻzbekiston chempioni boʻlgan Sh.Soliyevning  bu yutugʻi oʻzi taʼlim olayotgan Nukus shahridagi  olimpiya zahiralari kollejidagi ustozlari, taʼlim olgan 36-sonli  maktabi hamda tuman BOʻSMdagi ustozlari uchun ham cheksiz quvonch bagʻishladi.

R.IBRAGIMOVA, amunews.uz jamoatchi muxbiri.