DAVLATIMIZDA BOLA HUQUQLARI HIMOYaSI – USTUVOR VAZIFA

Qoraqalpogʻiston Respublikasi Konstitutsiyasining 43-moddasida voyaga yetmaganlar, mehnatga layoqatsizlar va yolgʻiz keksalarning huquqlari davlat himoyasidadir, deyilgan. Undan tashqari, 63-moddasida farzandlar ota-onalarning nasl-nasabidan va fuqarolik holatidan qatʼiy nazar, qonun oldida tengdirlar, onalik va bolalik davlat tomonidan muhofaza qilinadi, deb belgilangan.

Amudaryo tuman hokimligida faoliyat koʻrsatayotgan Bolalar masalalari boʻyicha Komissiya Prezidentimizning 2021-yil 9-avgust kungi “Bola huquqlarining kafolatlarini taʼminlash tizimini yanada takomillashtirish chora-tadbirlari toʻgʻrisida”gi Farmoni bilan tashkil qilingan boʻlib, hozirgi kunda tegishli vazifalar mazkur Farmonga muvofiq amalga oshirilmoqda. Komissiya tomonidan tumanda bolalarning huquqlari, erkinliklari va qonuniy manfaatlarini himoya qilish, ularning sogʻlom turmush tarziga amal qilgan holda hayot kechirishlarini taʼminlash, ota-onalari qaramogʻidan mahrum boʻlishining oldini olish borasida zarur choralar koʻrilmoqda.

Tumanda voyaga yetmaganlar 74200  nafarni tashkil qiladi. Komissiyaga huquqni muhofaza qiluvchi organlardan oʻtgan yil yakuniga qadar 10 ta holat boʻyicha voyaga yetmaganlar tomonidan sodir qilingan maʼmuriy huquqbuzarliklarga oid ishlar kelib tushgan boʻlib, ushbu hujjatlar Komissiyada koʻrildi va voyaga yetmaganlarning ota-onalariga nisbatan qonuniy choralar koʻrildi. Undan tashqari, Komissiyaga  tuman XTBdan ota-onasi bilan Qozogʻiston Respublikasi, Rossiya federatsiyasi kabi chet davlatlarga vaqtincha yashash uchun yoki butunlay koʻchib ketayotgan maktab oʻquvchilarini oʻquvchilar safidan chiqarishni soʻrab kiritilgan 83 ta iltimosnomalar qonuniy asosda oʻrganilib, tegishli qarorlar chiqarib berildi. Bolalarni himoya qilish shoʻʼbasi tomonidan farzandini oʻz tarbiyasiga olish va ota-onalik huquqini tiklash, vasiylikka olish toʻgʻrisidagi fuqarolarning arizalari hududlarga chiqib oʻrganilib, ijobiy hal etilmoqda. Vasiylikka olingan bolalarning yashash sharoitlari ham muntazam ravishda hududlardagi maktab pedagoglari va psixologlar ishtirokida koʻrilib borilmoqda.

Joriy yil davomida 8 nafar voyaga  yetmagan bolalar va 2 nafar ota-onalar IIB tomonidan profilaktik hisobga olingan boʻlib,  ular bilan muntazam ravishda profilaktik ishlar olib borilmoqda.

Oʻtgan yil davomida tumandagi hamkor tashkilotlar bilan birgalikda shu kabi tadbirlar va 48 ta  “Oʻquvchi”, ”Davomat” reydlari oʻtkazildi. Undan tashqari, ovul va mahallalarda, taʼlim muassasalarida targʻibot-tashviqot tadbirlari olib borildi.

Bolalarni himoya qilish, asrab-avaylash har birimiz uchun eʼtibordagi masala boʻlishi kerak. Chunki ular ertaga butun millat, mamlakat taraqqiyotini, kelajagini yaratishdek masʼuliyatli vazifani bajaradi. Biz ularni shunga munosib qilib tarbiyalashga masʼulmiz.

J.Xolmurodov, Amudaryo tuman hokimligining

Bolalarni himoya qilish masalalari shoʻʼbasi rahbari.