AMUDARYoDA OʻTKAZILGAN BOKS BOʻYIChA OChIQ TURNIR GʻOLIBLARI TAQDIRLANDI

Har yili yurtimizda 9-aprel sanasi Qoraqalpogʻiston Respublikasi Konstitutsiyasi tashkil kuni sifatida keng nishonlanadi. Shu munosabat bilan hududlarda turli tadbirlar, sport musobaqalari, uchrashuvlar oʻtkaziladi.

Amudaryo tumanida ham Qoraqalpogʻiston Respublikasi Konstitutsiyasining 29-yilligiga bagʻishlab, Respublika Boks federatsiyasining sovrini uchun ochiq turnirga start berilgan edi. Shu yil 31-martidan 3-aprelgacha davom etgan bellashuvlarda 2005-2006, 2009-2010-yillarda tugʻilgan oʻsmirlar oʻzaro kuch sinashib, oʻz mahoratlarini koʻrsatishdi.

3-aprel kuni ochiq turnir gʻoliblarini taqdirlash marosimi oʻtkazildi. Marosimda tuman hokimi Sultonboy Yoʻldashev, Bolalar va oʻsmirlar sport maktabi direktori Chorsham Tajimurodov, turizm va sport boʻlimi boshligʻi Gʻulomjon Qurbonboyev, boks federatsiyasi birinchi oʻrinbosari Jasur Nurimbetov, ijrochi direktori Murad Kuanboyev hamda boshqa masʼullar ishtirok etdilar.

Katta boks bayramiga aylanib ketgan marosimda soʻzga chiqqanlar musobaqalar doʻstona ruhda oʻtganligini taʼkidlab, yoshlar orasidan mahoratli, isteʼdodli sportchilar yetishib chiqayotganligi, buning uchun yurtimizning barcha hududlaridagi sport maskanlarida yetarli sharoitlar yaratilganligi va boshqalar toʻgʻrisida keng toʻxtaldilar. Shuningdek, boʻlib oʻtgan musobaqalarda ishtirok etgan yosh sportchilar kuch-gʻayrati, shijoatini, gʻalabaga boʻlgan ishonchini namoyon etishganini eʼtirof etdilar.

Taʼkidlanganidek, tumandagi Bolalar-oʻsmirlar sport maktabining Chordara mahallasida joylashgan bazasi yonidagi mini futbol maydonchasida oʻrnatilgan ringda Qoraqalpogʻiston Respublikasining barcha tumanlari, Xorazm viloyatining Urganch shahri iqtidorli va kuchli bokschilari ishtirok etdilar. Shuningdek, tuman Bolalar-oʻsmirlar sport maktabidagi boks toʻgaraklarida shugʻullanayotgan yosh sportchilar ham boks musobaqalarida qatnashib, oʻz mahoratlarini koʻrsatdilar.

Ochiq turnir bellashuvlarida Qoraqalpogʻiston Respublikasining barcha tumanlaridan va Xorazm viloyatining Urganch shahridan jami 155 nafar yosh bokschilar 23 ta vazn toifasida ishtirok etdilar. Musobaqaning yakuniy bosqichi yaʼni, final janglaridan soʻng, hakamlar hayʼati tomonidan gʻoliblar aniqlandi.

Bellashuvlarda kuch sinashgan amudaryolik yosh charm qoʻlqop ustalari ham oʻz vazn toifalari boʻyicha gʻoliblikni qoʻlga kiritishga musharraf boʻldilar. Ulardan Ogʻabek Karimboyev 37 kg. vazn toifasida, Aziz Nurimov 46 kg. vazn, Bahriddin Qurbiyazov 58 kg. vazn, Javlonbek Jumamurodov 54 kg. vazn, Umid Davletov 57 kg. vazn, Baxt Soburov 60 kg. vazn, Bunyod Ilhomov 63,5 kg. vazn, Komron Qoʻshmonov 67 kg. vazn toifalarida 1-oʻrin gʻoliblari boʻldilar.

Taqdirlash marosimida ochiq turnir gʻoliblari medallar, faxriy yorliqlar va esdalik sovgʻalari bilan taqdirlandilar. Shuningdek, yosh sportchilar Javlonbek Jumamurodovga “Eng yaxshi jangi uchun” nominatsiyasi, Bunyod Ilhomovga “Eng yaxshi bokschi” nominatsiyasi berilib, velosiped sovgʻa qilindi. Muobaqalarda oʻz mahoratini koʻrsatgan yosh bokschi Baxt Soburovga esa “Eng yaxshi texnikasi uchun” nominatsiyasi va ragʻbatlantiruvchi sovgʻa berildi.

Qiziqarli oʻtgan ochiq turnir musobaqalari barcha sportchilarda katta taassurotlar qoldirdi.

 O.Xudoyberganova.