Mangʻitda boks boʻyicha ochiq turnir oʻtkazilmoqda

Boks dunyoda hamma davrlar sporti, deya eʼtirof etiladi. Ushbu sport turi turli davrlarda turlicha koʻrinishda rivojlangan va davrlar osha bugungi kundagidek raundlarga ajratilgan holda, ular orasida tanaffuslar vaqti belgilangan va qoʻllar jarohatlardan maxsus himoya qilingan va yumshoq qoʻlqop kiygan holda  kurashish qabul qilingan. Shuningdek, sportchilar vazn toifalariga ajratilishi boksning yanada ommalashishiga olib kelgan.

Oʻzbekistonda boks yoshlarning eng sevimli, anʼanaviy sport turlaridan hisoblanadi. Ayniqsa keyingi yillarda ushbu sport turi yanada ommalashdi. Mamlakatimizning  barcha hududlarida boks maktablari faoliyat yuritib kelmoqda. Natijada boks boʻyicha koʻplab olimpiada, jahon chempionati gʻoliblari va sovrindorlari yetishib chiqdi. Boks boʻyicha mamlakatimiz yetakchi oʻrinlardan birida turadi.

Tumanimizdan Oʻzbekiston chempionati, nufuzli xalqaro musobaqalar gʻolib va sovrindorlari yetishib chiqqanligi bilan amudaryoliklar ham haqli ravishda faxrlanadilar.

Qoraqalpogʻiston Respublikasi Konstitutsiyasi kuniga bagʻishlab, 2005-2006, 2009-2010-yillarda tugʻilgan oʻsmirlar oʻrtasida Qoraqalpogʻiston Respublikasi boks federatsiyasi sovrini uchun ochiq turnir aynan Mangʻitda oʻtkazilayotgani ham bejiz emas.

31-mart kuni Amudaryo tumani Bolalar-oʻsmirlar sport maktabining Chordara mahallasida joylashgan bazasida ushbu nufuzli musobaqaning ochilishi marosimi boʻlib oʻtdi. Baza yonidagi mini futbol maydonchasida ochiq turnirga kuch sinashish uchun yetib kelgan Qoraqalpogʻiston Respublikasining barcha tumanlari, Xorazm viloyatining Urganch shahri iqtidorli va kuchli bokschilari saf tortdi. Tuman bolalar-oʻsmirlar sport maktabida toʻgaraklarida shugʻullanayotgan yosh sportchilar turli sport oʻyinlarini musiqa sadolari ostida namoyish etib, mehmonlarga xush kayfiyat ulashdi.

Tadbirni Qoraqalpogʻiston Respublikasi boks federatsiyasi rahbari Ahmad Saylanov ochdi va barcha ishtirokchilarni oʻzlarining salohiyatini namoyish etishlari uchun imkon yaratgan ochiq turnir bilan qizgʻin qutladi va ishtirokchilarga muvaffaqiyatlar tiladi. Tuman Bolalar-oʻsmirlar sport maktabi direktori Chorsham Tojimurodov, ochiq turnir bosh hakami, xalqaro toifadagi hakam Ahmad Fozilovlar ham yosh sportchilarni ushbu tadbir bilan qutlab, ringda oʻz kuch va mahoratlarini namoyish etib, gʻoliblik uchun halol va sidqidildan bellashishga chorladi.

Tantanali ochilish marosimidan soʻng ochiq turnirning ilk bellashuvlariga start berildi. Musobaqa shu yilning 31-martidan 3-aprelgacha oʻtkazilishi rejalashtirilgan. Qoraqalpogʻiston Respublikasi Konstitutsiyasi kuniga bagʻishlab oʻtkazilayotgan ochiq turnirda Qoraqalpogʻiston Respublikasining barcha tumanlaridan va Xorazm viloyatining Urganch shahridan jami 155 nafar yosh bokschilar 23 ta vazn toifasida ishtirok etmoqda. 3-aprel kuni final janglari oʻtkaziladi va gʻoliblar tantanali ravishda taqdirlanadi.

Ushbu nufuzli bellashuvda ishtirok etayotgan yosh bokschilarga muvaffaqiyatlar tilaymiz.

Oygul RAJABOVA.