TOMORQA YeRLARDAN SAMARALI FOYDALANIShGA OID SEMINAR BOʻLIB OʻTDI

Mamlakatimiz aholisining koʻpchilik qismi qishloq joylarda istiqomat qilgani bois, ularning turmush farovonligi qishloq xoʻjaligi tarmogʻi bilan bogʻliq. Bugungi kunda agrar tizim aholiga oziq-ovqat mahsulotlari yetishtiruvchigina emas, balki yangi ish oʻrinlari yaratish va aholi bandligini taʼminlashda ham muhim sohaga aylandi. Shu boisdan ham qishloq joylarda aholiga ekin maydonlarini ajratish, tomorqa yerlaridan samarali foydalanishini taʼminlashga alohida eʼtibor qaratilmoqda.

Shunisi eʼtiborliki, Amudaryo tumani boʻyicha hududlarda aholi tomorqa yerlarini shudgorlash, zarur urugʻlik va koʻchat yetkazib berish, xonadonlarga ixcham issiqxona qurib berish, shuningdek oilalarda  daromad manbalarini koʻpaytirish maqsadida echki, qoʻy, parranda, asalari uyalari, quyon yetkazib berish kabi xizmatlarni amalga oshiradigan 12 ta “Tomorqa xizmati” masʼuliyati cheklangan jamiyatlari faoliyati yoʻlga qoʻyilgan.

Tomorqa yer egalariga amaliy yordam koʻrsatish maqsadida toʻqsonbosti usulida ekinlarni ekish yuzasidan shu kungacha ovul va mahallalarda 41 ta seminarlar tashkil etilib, ularda 1500 nafardan ortiq usta dehqonlar, ovul va mahalla fuqarolar yigʻinlari raislari, tomorqa yer egalari ishtirok  etdilar. Buningdek saʼy-harakatlar natijasida hududiy dasturga asosan aholi tomorqalariga ekilishi belgilangan 1484 gektar oʻringa 1632 gektar tomorqa yerlarga toʻqsonbosti usulida ekinlar ekilgan.

26-mart kuni Qilichboy ovulidagi namunali tomorqa yer egalaridan biri,  “Mehnatkash dehqon” koʻkrak nishoni sohibi Baxtiyor Mangliyev xonadonida Oʻzbekiston fermer, dehqon xoʻjaliklari va tomorqa yer egalari Kengashi boʻlim boshligʻi Umirzoq Rahmatov ishtirokida tomorqachilik tajribalarini ommalashtirish, Baxtiyor  Mangliyev ish uslubini barcha mahallalar ovullardagi aholi tomorqalarida yoʻlga qoʻyish maqsadida seminar oʻtkazildi.

Tadbirga sektor rahbari, qishloq xoʻjaligi masʼullari, ovul va mahallalar fuqarolar yigʻinlari raislari, hududlardagi hokim yordamchilari, tomorqa yer egalari ishtirok etdilar. Yigʻilganlarga Oʻzbekiston  fermer, dehqon xoʻjaliklari va tomorqa yer egalari Kengashi boʻlim boshligʻi Umrzoq Rahmatov, tuman  fermer, dehqon xoʻjaliklari va tomorqa yer egalari Kengashi raisi Ilhom Polvonovlar tomorqadan unumli foydalanish yuzasidan maʼruza qildilar. Keyin Baxtiyor Mangliyevning 4 sotixlik issiqxonasi koʻzdan kechirildi va barcha bu yerda amalga oshirilayotgan ishlar bilan tanishtirildi, erishilayotgan natijalar haqida batafsil maʼlumotlar berildi.

Baxtiyor Mangliyev issiqxonada dehqonchilik qilish boʻyicha ulkan tajriba toʻplagan tomorqachidir. Oʻtgan yilning kuzida u 4 sotixlik issiqxonasining 2 sotix joyiga piyoz, 1 sotix joyiga rediska, 1 sotixiga turli koʻkatlar ekkan edi. Oila aʼzolari bilan hamjihatlikda ekinlarni yaxshi parvarish qilgani bois, qish boʻyi bozorga koʻkatlar, koʻk piyoz sotib, yozdagiday daromad olib keldi. Hozirgi kunda rediskalari ham sotishga yarab qoldi va kundalik daromadi yana ham koʻpaydi. Natijada oila farovon, dasturxoni toʻkin. Demak, astoydil mehnat qilinsa, yaxshi ishlab, yaxshi yashashga ishtiyoq boʻlsa, 4 sotixgina yer ham ulkan daromad manbai boʻlar ekan.

Albatta, buningdek tajribalarni ommalashtirish tumanimizda tomorqa yerlardan samarali foydalanish, qishloq aholisining bandligini taʼminlash va  doimiy daromadga ega boʻlishlariga erishishda, kambagʻallikni qisqartirishda kelgusida oʻzining ijobiy natijalarini beradi.

Hozirgi davrda tumanimizda 39 ming 406 nafar tomorqa yer egalari ixtiyorida  6652 gektar ekin maydoni mavjud. Bu maydonlardan samarali foydalanilishiga erishish maqsadida tajribali tomorqachilar Oq oltin ovulidan Yangiboy Qurbonboyev, Bobur ovulidan Abdurahmon Matsapoyev, Choykoʻl ovulidan Mahmudjon Norboyev, Qoramon mahallasidan Otaxon Oʻtamurodovlarning yil davomida tomorqadan daromad olish tajribalari yuzasidan targʻibotlar olib borilmoqda. Baxtiyor Mangliyev xonadonida oʻtkazilgan seminar ham aynan tomorqadan yil davomida mahsulot yetishtirish va daromad olishni ommalashtirishga xizmat qiladi.

Seminar barcha ishtirokchilarda ulkan taassurotlar qoldirdi. Masʼullar ishtirokchilarni qiziqtirgan savollarga batafsil javoblar berdilar.

Oygul RAJABOVA.