“ShIRINBULOQ” FERMER XOʻJALIGIDA NAVROʻZ BAYRAMIGA BAGʻIShLANGAN TADBIR OʻTKAZILDI

Navroʻz – qadimdan davom etib kelayotgan, el sevgan milliy bayramdir. Yurtimizga koʻklam kirib kelishi bilan ushbu bayramga tadorik boshlab yuboriladi. Tabiat uygʻonishi, sharqona yangi yil, yangi kunning boshlanishi, bobodehqonning yerga baraka urugʻini qadashi kabilar bilan bogʻliq boʻlgan turli udumlarni oʻzida ifoda etadigan Navroʻzi olam tantanalari orqali butun xalqqa bayramona ruh, zavq ulashiladi. Amudaryo tumanida ham bayram munosabati bilan xalq sayillari, turli tomoshalar va tadbirlar oʻtkazilib, yurtdoshlarimizga koʻtarinki kayfiyat baxsh etiladi.

Amudaryo tumanining Qilichboy ovulidagi “Shirinbuloq” fermer xoʻjaligida ham Navroʻz bayrami munosabati bilan katta tadbir oʻtkazildi. Ovuldagi “Quronboy ota” toʻyxonasida fermer xoʻjalik raisi Nodirbek Ollaberganov tomonidan tashkil etilgan ushbu tadbirda xoʻjalikda mehnat qilib kelayotgan 64 nafar ishchi va pudratchilar ishtirok etishdi.

Ochiq dasturxon atrofida soz-u suhbat bilan davom etgan bayram kechasida ishtirok etgan xoʻjalik raisi butun jamoani, ularning oila aʼzolarini Navroʻzi olam bilan muborakbod etdi. Shu bilan birga bugungi kunda yurtimizda qishloq xoʻjaligi sohasida amalga oshirilayotgan islohotlar, dehqon va tomorqachilarga yaratilayotgan imkoniyatlar toʻgʻrisida soʻz yuritib, xoʻjalikda hamjihatlikda erishilayotgan yutuqlarni eʼtirof etdi. Joriy dehqonchilik yilida amalga oshiriladigan ishlar, koʻzlanayotgan marralar, hamjihatlikdagi mehnatlar samarasi, xoʻjalik ishchilariga koʻrsatilayotgan eʼtibor va ragʻbatlar haqida ham gapirib oʻtdi.

Taʼkidlash joizki, Xizr eli mahallasi hududidagi ushbu gʻallachilik, bogʻdorchilik, baliqchilik, parrandachilik va chorvachilikka ixtisoslashgan koʻp tarmoqli “Shirin buloq” fermer xoʻjaligi 2003-yilda tashkil topgan. Unga ayni paytda Nodirbek  Ollaberganov rahbarlik qiladi. Xoʻjalik tasarrufida 100 gektardan ziyod ekin maydoni, 4,5 gektarga yaqin olmazor va uzumzor bogʻ mavjud.

Undan tashqari, baliqchilik tashkil etilgan boʻlib, 10 gektarlik koʻlda bir necha turdagi baliqlar yetishtiriladi. Xoʻjalikda parrandachilik va chorvachilik ham rivojlantirilgan. Gʻalla va paxtadan esa har yilgi mavsumda  xoʻjalikda mavjud boʻlgan texnikalardan unumli foydalangan holda moʻl-koʻl hosil olinib, mavsumiy reja ortigʻi bilan uddalanib kelinmoqda. Mazkur dehqonchilik yilida ham 19 gektar yerda bugʻdoy undirilib, ishchilar tomonidan parvarish qilinmoqda. Erta bahorda 90 gektar yerda paxta yetishtirib, moʻl hosil toʻplash moʻljallanmoqda.

Navroʻz bayrami munosabati bilan “Quronboy ota” toʻyxonasida tashkil etilgan tadbir davomida toʻkin dasturxonga taklif etilgan xoʻjalik ishchilari milliy taom osh bilan siylandi. Ularning barchasiga bayram sovgʻalari ulashildi.

Tadbirga tumanimizdagi taniqli xonanda Bahodir Rajabov ijrosidagi milliy, mumtoz kuy va qoʻshiqlar, dilrabo raqslar yanada tarovat bagʻishladi. Dasturxon atrofida bugungi kunda yurtimizda hukmron boʻlgan tinchlik barqaror boʻlishiga, shunday kunlar tilaklar bildirilib, shukronalar aytildi.

Yuqori koʻtarinkilik bilan oʻtgan bayram tadbiri barcha ishtirokchilarda unutilmas taassurotlar qoldirdi.

O.Xudoyberganova.