DARYoBOʻYIDA NAVROʻZ ShUKUHI

Navroʻz – necha asrlardan buyon xalqimiz ulkan shodiyonalar bilan nishonlaydigan, eng qadimiy, milliy urf-odatlarimiz, anʼanalarimiz va qadriyatlarimiz yaqqol namoyon boʻladigan qutlugʻ bayramdir. Sharq taqvimi boʻyicha Yangi yil sanalmish bu kunning mazmuni, tarovati, fayzi oʻzgacha.

Bizning hududimizda haqiqiy koʻklam Navroʻzdan boshlanadi. Tabiat uygʻonib, chor-atrofning jonlanib, yashillikka burkanishi odamlar koʻngliga koʻchadi. Ota-bobolarimizning “Navroʻzdan soʻng, qish boʻlmas” deganlari ham shundan.

Yurtdoshlarimiz joriy yilgi Navroʻz bayramini ham shod-u xurramlikda, ulkan tadoriklar bilan boshladi.

Daryoboʻyi mahallasida ham “Yurtimga xush kelding, Navroʻz!” deb nomlangan tadbir boʻlib oʻtdi.

Mahalla fuqarolar  yigʻini masʼullari hududdagi 21-sonli Bolalar musiqa va sanʼat maktabi, 65-sonli maktab, 32-sonli maktabgacha taʼlim tashkiloti xodimlari bilan hamkorlikda tashkillashtirgan ushbu tadbirga oʻqituvchilar, oʻquvchilardan tashqari, yoshi  ulugʻ nuroniy otaxonlar, onaxonlar, elga xizmat qilib obroʻ-eʼtibor qozongan mehnat fidoyilari, intiluvchan va iqtidorli yoshlar ishtirok etdilar. Mehmonlar bahoriy taomlar, koʻk somsa, sumalak, goʻja, palovlar bilan siylandi va koʻngilochar tomoshalar namoyish qilindi. 21-sonli Bolalar musiqa va sanʼat maktabi iqtidorli oʻquvchilari, 32-sonli maktabgacha taʼlim tashkiloti tarbiyalanuvchilari ijro etgan teatrlashtirilgan bayram tomoshalari bahorni, Navroʻzni sogʻingan yurtdoshlarimizga cheksiz zavq-shavq bagʻishladi.

Shunisi eʼtiborliki, shu kuni fuqarolar yigʻini raisi Mahmud Toʻliboyev bir guruh faollar bilan birga hududdagi kam taʼminlangan oilalarga, shuningdek, keksayib, harakatlari cheklanib qolgan nuroniylarga Navroʻz bayrami munosabati bilan sovgʻa, oziq-ovqat mahsulotlarini topshirdi.

Buningdek azaliy qadriyatlarimizning oʻz ifodasini topayotgani – Navroʻz shukuhi, quvonchi barcha yurtdoshlarimizning ham koʻngliga yetib borishiga xizmat qiladi.

Oygul RAJABOVA.