«Yashil makon» umummilliy loyihasi doirasida hududlarda yashil daraxtzorlar barpo etilmoqda

Koʻchat ekib, bogʻ yaratish, oʻzimiz yashab turgan hududni yashil makonga aylantirish ham azaliy qadriyatlarimizdan hisoblanadi. Shu bois, ajdodlarimiz juda qadimdan guzar yoʻllar boʻylari, ekinzorlarning chetlariga, koʻchalar yoqalatib turli xil manzarali va mevali daraxt koʻchatlarini oʻtqazishgan va buni oʻz farzandlari uchun ham doimiy anʼanaga aylantirishgan. Mamlakatimizda yashil hududlar barpo etish, ekilgan har bir tup niholni avaylab-asrash, uning tuproqqa ildiz qoʻyib, unib-oʻsib ketishini taʼminlash maqsadida har yili kuzgi va bahorgi koʻchat ekish mavsumiga alohida puxta taraddud koʻriladi.

Oʻzbekiston Respublikasi Prezidenti Shavkat Mirziyoyev raisligida 2021-yil 2-noyabr kuni oʻtkazilgan videoselektor yigʻilishida belgilangan vazifalar ijrosini taʼminlash maqsadida eʼlon qilingan "Yashil makon" umummilliy loyihasi hamda daraxt ekish boʻyicha "Dolzarb 40 kunlik" doirasida Amudaryo tumanida 2021-yil kuz va 2022-yil bahor mavsumida 1 million 159 ming dona manzarali va mevali daraxt koʻchatlari ekish rejalashtirilgan.

13-mart kuni Amudaryo tumaniga tashrif buyurgan Oʻzbekiston Respublikasi Ekologiya va atrof-muhitni muhofaza qilish qoʻmitasi raisi Narzullo Oblomurodov va mazkur qoʻmita mutasaddilari Amudaryo tumani xokimi Sultonboy Yoʻldashev bilan birgalikda Oq oltin ovuli hududidagi “Oq oltin Amudaryo” fermer xoʻjaligida boʻlishib, “Yashil makon” umummilliy loyihasi doirasida hududda amalga oshirilayotgan ishlar bilan yaqindan tanishdilar va ushbu jarayonga oʻz hissalarini qoʻshib, mevali va manzarali daraxt koʻchatlarini ekdilar.

Ayni kunlarda Amudaryo tumanidagi umumfoydalanuvdagi avtomobil yoʻllari yoqasiga, qishloq xoʻjaligi yerlari atroflaridagi ihota daraxtzorlar barpo etiladigan yerlarda, fermer xoʻjaliklari ekin yer maydonlari chetlariga, oliy va oʻrta maxsus taʼlim, xalq taʼlimi, maktabgacha taʼlim hamda sogʻliqni saqlash yoʻnalishlaridagi muassasalar hududlariga, shuningdek, korxonalar va xizmat koʻrsatish sohalari hududlari, tuman obodonlashtirish boshqarmasi tasarrufidagi hududlar va obʼektlarda iqlim sharoitimizga mos mevali va manzarali daraxtlar koʻchatlarini ekish ishlariga alohida eʼtibor qaratilmoqda.

Tumandagi ovul va mahallalar hududlarida 2021-yil kuz mavsumida 434,6 ming dona manzarali va mevali daraxt koʻchatlari ekish rejalashtirilib, shundan 1,5 ming dona viagra archasi, 2 ming dona sharq tuyasi, 3 ming dona yapon saforasi, 10,6 ming dona katalpa, 9,5 ming dona shumtol, 15,9 ming dona qayragʻoch koʻchatlari ekildi. Bundan tashqari, 2 ming dona jiyda, 24,5 ming dona tut, 6,1 ming dona zarang, 5,5 ming dona akatsiya, 13 ming dona terak, 920 ming dona suriya atirguli, boshqa turdagi 315 ming dona manzarali daraxtlar, 49 ming dona yongʻoq daraxtlari, ming dona uzum, shuningdek, 44 ming dona qalamcha shaklidagi koʻchatlar ekildi.

Hozirgi kunda ushbu ekilgan koʻchatlarning holatlari oʻrganilib, sugʻorish tizimi xamda parvarishlash boʻyicha nazorat qilish va xatlovdan oʻtkazish ishlari olib borilmoqda.

Tumanimizda bahorgi koʻchat ekish mavsumiga ham puxta taraddud koʻrildi. Avvalo koʻchat ekiladigan hududlar xaritasi tuzilib, ekiladigan koʻchatlarni yer, suv sharoitiga mutanosib ravishda joylashtirish boʻyicha oʻrganishlar oʻtkazildi. Ayni paytda 2022-yil bahor mavsumida 724,4 ming dona manzarali va mevali daraxt koʻchatlari ekish ishlari boshlab yuborildi.

Joriy yilgi ekish mavsumida 500 dona viagra archasi, 800 dona sharq tuyasi, 1,3 ming dona yapon saforasi, 4,6 ming dona katalpa, 4,5 ming dona shumtol, 6,3 ming dona qayragʻoch, 800 dona jiyda, 34,3 ming dona tut koʻchatlarini ekish rejalashtirilgan. Bundan tashqari, 3 ming dona zarang, 2,4 ming dona akatsiya, 7,7 ming dona terak, 400 dona suriya atirguli, 146 ming dona daraxt va buta koʻchatlari, 24,7 ming dona yongʻoq, 6,5 ming dona uzum, 136,2 ming dona qalamchalar ekish ishlari amalga oshirilmoqda.

N.Uzakboyev, Amudaryo tumani nazorat boʻyicha inspektsiya boshligʻi.