NAZARXON OVULIDA AHOLIGA SAYYoR TARTIBDA DAVLAT XIZMATLARI KOʻRSATILDI

Amudaryo tumani markazidan 50 kilometr uzoqlikda joylashgan Nazarxan ovul fuqarolar yigʻini hududida yashovchi fuqarolarga sayyor tartibda davlat xizmatlarini koʻrsatish, ularning davlat xizmatlaridan foydalanish borasida yuzaga kelayotgan muammolarini oʻrganish va sohadagi oʻzgarishlar yuzasidan huquqiy tushuntirishlar berish maqsadida sayyor qabul tashkillashtirildi.

5-mart kuni boʻlib oʻtgan ushbu sayyor qabulda Davlat xizmatlari Agentligi Qoraqalpogʻiston Respublikasi boshqarmasi, tuman Davlat xizmatlari markazi, tuman Fuqarolik holati dalolatnomalarini yozish boʻlimi va fuqarolar yigʻini masʼullari, ovul faollari, hudud aholisi  ishtirok etdi.

Tadbirda masʼullar dastlab yurtimizda davlat xizmatlari koʻrsatish tizimining izchillik bilan takomillashtirilishi aholining hayot sifatini yaxshilash imkonini berayotgani, ayniqsa, chekka va olis hududlarda sayyor davlat xizmatlarini koʻrsatish fuqaro va tadbirkorlar uchun yanada qulayliklar tugʻdirayotgani haqida soʻz yuritdilar. Fuqarolarga davlat xizmatlari koʻrsatish bilan birga, ularning huquqiy bilimlarini oshirish maqsadida tizimdagi va qonunchilikdagi yangiliklar targʻib qilindi. Shuningdek, fuqarolarga davlat xizmatlari koʻrsatish sohasidagi oʻzgarishlar, elektron davlat xizmatlaridan foydalanish koʻnikmalari haqida tushuntirishlar berildi.

Qabul davomida ruhiy kasalliklar va narkologiya boʻyicha dispanser hisobida turishi yoki turmasligi toʻgʻrisida maʼlumotnoma olish boʻyicha 8 ta, maktabgacha taʼlim tashkilotlariga navbatga qoʻyish boʻyicha 10 ta, elektron raqamli imzo olish boʻyicha 20 ta, kadastr pasportini shakllantirish boʻyicha 2 ta,  jami 40 dan ortiq ariza roʻyxatga olindi.

Tadbir davomida markaz xizmatlaridan masofadan turib qanday foydalanish mumkinligi haqida ham maʼlumotlar berildi. Fuqarolarga xizmatlardan uzoq yoʻl bosib markazga borib yurmasdan shu yerning oʻzida, oʻz uyida foydalanishi mumkinligi, buning uchun markazdan elektron raqamli imzo olishlari kerakligi tushuntirildi. 

Shu kungi sayyor qabulda tuman Fuqarolik holati dalolatnomalarini yozish boʻlimi xodimlari tomonidan ham Nazarxon ovul fuqarolar yigʻini hududida istiqomat qiluvchi fuqarolarga sayyor tartibda xizmat koʻrsatildi. Shu yerning oʻzida Serjanov Almas Koshkarbayevich va Adilbayeva Mayra Jumabayevnaning, Aqnazarova Nursultan Yergaliyevich va Saparova Qoljamal Genjiboy qizining nikohlari qayd qilinib, buni tasdiqlovchi hujjatlar topshirildi. Bundan tashqari, ovul fuqarolari Timur Jumagaliyev va Aygerim Amanjolovalarning 2022-yil 2-mart kuni tugʻilgan qiz farzandi Kisenbayea Uldana Timur qizining tugʻilganligi qayd qilinib, tugʻilish haqidagi guvohnomasi berildi.

Nazarxon ovuli tuman markazidan olisda joylashgani bois, aholi bunday xizmatlardan foydalanishda qiyinchiliklarga duch kelardi. Ovul fuqarolari xizmatdan foydalanish uchun uzoq yoʻl yurib vaqt va ortiqcha mablagʻ sarflagan holda markazga borishiga toʻgʻri kelar edi. Endilikda aholining yashash joyiga kelib xizmat koʻrsatish yoʻlga qoʻyilgani sababli ogʻiri yengil, uzogʻi yaqin boʻlmoqda. Mazkur sayyor qabulda ovul aholisi shu yerning oʻzida davlat xizmatlaridan foydalanishlariga imkoniyat yaratilganidan, uzogʻi yaqin qilinib, mushkuli oson boʻlganidan juda xursand boʻldilar.

Umida Saparboyeva, tuman DXM boʻlim boshligʻi.