Aholini uy-joy bilan taʼminlashga oid tub islohotlar amalga oshirilmoqda

Bugungi kunda mamlakatimizda aholini uy-joy bilan taʼminlashga alohida eʼtibor qaratilishi natijasida insonlarning yashash sharoitlari tobora yaxshilanmoqda. Bu borada amalga oshirilayotgan islohotlar oʻzining ijobiy samarasini bermoqda.

Oʻzbekiston Respulikasi Prezidentining 2021-yilning 11-mart sanasida imzolagan “Bozor tamoyillariga asoslangan ipoteka kreditlarini ajratish orqali aholini uy-joy bilan taʼminlashga oid qoʻshimcha chora-tadbirlar toʻgʻrisida”gi Farmoni bu boradagi ishlarni yangi bosqichga koʻtardi. Ushbu Farmon ipoteka kreditlari orqali aholini uy-joy bilan taʼminlash, uy-joy sharoitlarini yaxshilashga muhtoj oilalarni ijtimoiy va moliyaviy qoʻllab-quvvatlash, xususiy pudrat tashkilotlarini uy-joy qurilishi sohasiga keng jalb etish boʻyicha shart-sharoitlar yaratishga qaratilgan islohotlarning koʻlamini kengaytirishga xizmat qilmoqda.

Mazkur Farmon ijrosini taʼminlash maqsadida Oʻzbekiston Respublikasi Vazirlar Mahkamasining 2021-yil 23-avgustda “Oʻzbekiston Respublikasi hukumatining ayrim qarorlariga oʻzgartirish va qoʻshimchalar kiritish toʻgʻrisida”gi qarori qabul qilindi. Qarorga «Uy-joy sotib olish yoki yakka tartibdagi uy-joylarni qurish va rekonstruktsiya qilish uchun fuqarolarga subsidiya toʻlash tartibi toʻgʻrisida”gi Nizom ilova qilingan.

Nizomda Prezidentimizning «Ipoteka krediti mexanizmlarini takomillashtirishga oid qoʻshimcha chora-tadbirlar toʻgʻrisida”gi Farmoni asosida joriy etilgan bozor tamoyillariga asoslangan ipoteka kreditlari orqali aholini uy-joy bilan taʼminlashning yangi tartibi doirasida koʻp kvartirali uy-joylardagi kvartiralarni sotib olish uchun ipoteka krediti boʻyicha boshlangʻich badal va foizlarning bir qismini qoplash uchun Oʻzbekiston Respublikasi Davlat byudjeti mablagʻlari hisobiga subsidiya taqdim etiladigan Oʻzbekiston Respublikasi fuqarolarini, shu jumladan, daromadi yuqori boʻlmagan va uy-joy sharoitlarini yaxshilashga muhtoj boʻlgan fuqarolarni aniqlash mezonlari, subsidiyalarni hisoblash va toʻlash tartibi belgilab berilgan.

Shuningdek, mazkur Nizom Prezidentimizning «Bozor tamoyillariga asoslangan ipoteka kreditlarini ajratish orqali aholini uy-joy bilan taʼminlashga oid qoʻshimcha chora-tadbirlar toʻgʻrisida”gi Farmoni asosida yakka tartibdagi uy-joylarga ajratilgan ipoteka kreditlari boʻyicha foizlarning bir qismini qoplash uchun Oʻzbekiston Respublikasi Davlat byudjeti mablagʻlari hisobiga toʻlash tartibini belgilaydi.

Qolaversa, ushbu Nizom doirasida aholiga ipoteka kreditlari bozor shartlari asosida belgilanadigan foiz stavkalarida, yaʼni shaharlar va qishloq joylarda birlamchi bozordagi kvartiralarni sotib olish hamda yakka tartibdagi uy-joylarni qurish va rekonstruktsiya qilish uchun ajratilishi koʻrsatilgan.

Nafisa Xudaybergenova, tuman Davlat xizmatlari markazi bosh mutaxassisi.