Oʻzbekiston Fermer, dehqon xoʻjaliklari va tomorqa yer egalari kengashi raisi Aktam Haitov tumanimizga tashrif buyurdi

Maʼlumki, 2020-yil 11-noyabrda Oʻzbekiston Respublikasi Prezidenti Shavkat Mirziyoyevning “2020-2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlari toʻgʻrisida”gi qarori qabul qilingan edi.

 Mazkur qaror ijrosi boʻyicha Amudaryo tumanida amalga oshirilayotgan ishlar bilan yaqindan tanishish maqsadida 21-fevral kuni Oʻzbekiston Fermer, dehqon xoʻjaliklari va tomorqa yer egalari kengashi raisi Aktam Haitov tumanimizga tashrif buyurdi.

Dastlab tuman hokimi Sultonboy Yoʻldashev bilan birgalikda “Rasulov Erkin asalchi” fermer xoʻjaligiga qarashli asalarichilik klasteri faoliyati bilan yaqindan tanishdi. 2019-yilda tashkil etilgan bu klasterda shifobaxsh va oʻta foydali yantoq gulidan yuqori sifatli asal olish yoʻlga qoʻyilgan boʻlib, bu turdagi asal ichki bozorda juda xaridorgirdir. Ushbu klasterda har mavsumda asalarichilik qilish istagidagi koʻplab yoshlar kasbga oʻqitilib, oʻz bizneslarini yoʻlga qoʻyishlari uchun asalari oilalari beriladi.

Aktam Haitov klaster faoliyati bilan tanishar ekan, yosh asalarichilarni oʻqitish va ishga jalb qilish borasida yoʻlga qoʻyilgan yangi tajribani qoʻllab-quvvatladi va Qoraqalpogʻiston Respublikasida asalarichilikni yanada rivojlantirish borasida oʻzining foydali taklif va tavsiyalarini berib oʻtdi.

Shundan soʻng tumandagi mahallalarga biriktirilgan hokim yordamchilarinig faoliyati bilan tanishish maqsadida ular bilan uchrashdi.

Jumladan, Oʻrta qala ovul fuqarolar yigʻiniga biriktirilgan hokim yordamchisi Hamza Haytimbetovning ish joyiga borib, ish sharoitlari, fermer va dehqon xoʻjaligini rivojlantirish boʻyicha ovul hududida amalga oshirayotgan ishlari bilan yaqindan tanishdi.

Hokim yordamchisi oʻz mahallasidagi fuqarolar bilan birma-bir muloqotda boʻlib qishloq xoʻjaligining turli yoʻnalishlarida tadbirkorlik qilish istagidagi fuqarolarga imtiyozli kredit va yer ajratishda amaliy yordam berilayotganligini maʼlum qildi.

Qolaversa, Oʻrta qalʼa ovuli yerlari serhosil boʻlib, dehqon xoʻjaligi mahsulotlarini yetishtirishga moslashganligi, hudud aholisining daromad manbai asosan dehqonchilik mahsulotlaridan iborat ekanligi inobatga olinib, ovul oilalarga issiqxonalar tashkil qilgan holda oʻz tadbirkorlik faoliyatini yoʻlga qoʻyishda amaliy yordamlar koʻrsatilmoqda. Bu esa aholi bandligini taʼminlash va oilalarning daromad manbaiga ega boʻlishida, bozorlarimizdagi toʻkin-sochinlik va narx-navo barqarorligiga zamin yaratmoqda.

Tashrif yakunida tuman hokimligi binosining majlislar zalida Aktam Haitov, tuman hokimi Sultonboy Yoʻldashev, mahallalardagi hokim yordamchilari hamda O‘zLiDeP tuman Kengashi masʼullari ishtirokida uchrashuv boʻlib oʻtdi.

Uchrashuvda tuman hokimi Sultonboy Yoʻldashev mahallalarda yangidan ish boshlagan hokim yordamchilarining ish faoliyatini samarali tashkil qilishlari boʻyicha zarur koʻrsatma va tavsiyalari berdi.

Aktam Haitov tomonidan hokim yordamchilari har bir oilaning yashash tarzidan, oilaviy sharoitidan doimo bohabar boʻlib turishi, oʻzlari biriktirilgan mahallani har tomonlama rivojlantirishga, aholining yashash sharoitini yaxshilashga va tadbirkorlik qobilyatini qoʻllab- quvvatlashga masʼul ekanligi aytib oʻtildi.

Shundan soʻng, O‘zLiDeP rahbari Aktam Haitov partiyaga aʼzo boʻlish istagini bildirgan hokim yordamchilariga aʼzolik guvohnomalarini topshirdi.

Shuningdek, partiyaning saylovoldi dasturida belgilab qoʻyilgan vazifalar ijrosini taʼminlashda partiya aʼzolari va faollari sidqidildan harakat qilmogʻi lozimligi taʼkidlandi.

Tuman hokimligining axborot xizmati