SOGʻLOM TURMUSh TARZINI TARGʻIB QILIShGA BAGʻIShLANGAN TADBIR OʻTKAZILDI

Salomatlikni asrash va mustahkamlashning yagona yoʻli bu – sogʻlom turmush tarziga amal qilishdir. Sogʻlom turmush tarzi esa insonning hayoti, salomatligi xavfsizligini taʼminlashga xizmat qiluvchi koʻnikmalarga ega boʻlish asosida hayot faoliyatini yoʻlga qoʻyishi hisoblanadi.

Bu borada keng tushunchalar berish maqsadida Sogʻliqni saqlash vazirligining aholi sogʻlom turmush  tarzini qoʻllab-quvvatlash va jismoniy faolligini oshirish markazi Qoraqalpogʻiston  hududiy  boʻlimi  shifokorlari  Guloyim Shrazova, Venera Davletmuradova va Amudaryo tumani Tibbiyot  birlashmasi masʼul shifokorlarining aholi bilan uchrashuvi oʻtkazildi.

18-fevral kuni Olmazor mahalla fuqarolar yigʻini maʼmuriy binosida boʻlib oʻtgan ushbu uchrashuvda fuqarolarga kundalik hayotda sogʻlom turmush tarzini shakllantirish, yuqumli kasalliklardan himoyalanish, sport bilan muntazam ravishda shugʻullanishga eʼtibor qaratish borasida maʼruzalar qilindi. Asosiy mavzu, yaʼni inson hayotida sogʻlom turmush tarzi, sogʻlom ovqatlanish, piyoda yurishning foydasi, salomatlikni saqlashda toʻgʻri nafas olish mashqlarining ahamiyati boʻyicha maʼlumotlar berildi.

Taʼkidlanganidek, sport bilan muntazam ravishda shugʻullanish, toʻgʻri ovqatlanishni yoʻlga qoʻyish, zararli odatlardan voz kechish, kun tartibiga, shaxsiy gigiyenaga rioya qilish, toza havoda sayr qilish kabilar sogʻlom turmush tarzining asosi hisoblanadi.

Sogʻlom turmush tarzi, bu – har qanday kasalliklar profilaktikasi va salomatlik, kuch-quvvat garovidir. Sogʻlom turmush tarzi qoidalariga rioya etgan odam oilasi, mehnat jamoasi, umuman, jamiyatda oʻz oʻrniga ega boʻladi, turli murakkab vaziyatlarni yengib oʻtish, hayot qiyinchiliklari oldida oʻzini yoʻqotmaslikka oʻrganadi.

Mutaxassislar muayyan shaxsning salomatligi birinchi navbatda uning hayot tarziga, ana shu turmush tarzi elementlariga ongli yondoshishiga bogʻliqligini eʼtirof etishdi. Sogʻlom turmush tarzining har bir yoʻnalishini takomillashtirishga harakat qilib borish kerakligini, buning uchun oilada sogʻlom turmush tarzi va sihat-salomatlikni saqlash, jismonan barkamollikka erishish toʻgʻrisidagi qoʻllanmalarni oʻqish, teledasturlardagi salomatlik va jismoniy barkamollik mavzusidagi koʻrsatuvlarni muntazam koʻrish, shu sohaga aloqador bilimlar doirasini kengaytirish va tibbiy savodxonlikni oshirib borish lozimligi toʻgʻrisida batafsil soʻzlab oʻtishdi.

Maʼruzalardan soʻng mutaxassislar tomonidan fuqarolarning yuqumli kasalliklarning turlari, ulardan himoyalanish, vaktsinatsiyaning ahamiyati toʻgʻrisida berilgan savollarga toʻliq javoblar berildi.

Tadbir davomida  82-sonli umumiy oʻrta taʼlim maktabining 6-sinf oʻquvchilari ishtirokida  nafas olish mashqlari texnikasi koʻrgazmali ravishda koʻrsatib berildi. Shundan soʻng, tadbir ishtirokchilari, mahalla fuqarolari bilan birgalikda sogʻlomlashtirish mashqlari bajarildi.

Tadbir yakunida ishtirokchilarga  gripp, oʻtkir respirator virusli infektsiya kasalligi va uning yuqish yoʻllari, aholi oʻrtasida koronavirus kasalligining oldini olish tadbirlari, jismoniy faollik, sogʻlom ovkatlanish, shaxsiy gigiyena, sogʻlom boʻlishning oddiy qoidalari, immunitetni mustahkamlash boʻyicha tavsiyalar qayd etilgan buklet va eslatmalar tarqatildi.

Jumaboy Yavkashev, TTB ASTTKK va JFO boʻlimi shifokori.