HUDUDLARDA SUD RAISLARINING SAYYoR QABULLARI OʻTKAZILDI

Yurtimizda fuqarolarning huquq va erkinliklarini ishonchli himoya qilish, odil sudlovga erishish, sud ishi yurituvi sifatini yanada yaxshilashga qaratilayotgan eʼtibor yuksak samaralar bermoqda. Shu qatori sud masʼullari tomonidan fuqarolarning murojaatlarini qabul qilish, yurituvdagi ishlarni adolatli koʻrib chiqish borasida amalga oshirilayotgan ishlar sohada yanada yuqori natijalarga erishishni taʼminlash bilan birga xalqning sud organlariga boʻlgan ishonchini oshirmoqda.

29-yanvar kuni Amudaryo tumanidagi Kuyuk koʻpir, Xitoy, Boʻz yop ovullari va Tor yop mahallasida sudlar raislari tomonidan sayyor qabul va huquqiy targʻibot tadbirlari amalga oshirildi. Jinoyat ishlari va Fuqarolik ishlari boʻyicha tuman sudi raislari, Iqtisodiy ishlar boʻyicha Beruniy tumanlararo sudi masʼullari ishtirok etgan ushbu sayyor qabullarda fuqarolarning sudga taalluqli masalalar boʻyicha murojaatlari qabul qilinib, ularga huquqiy tushuntirish berildi.

Sayyor qabulda dastlab mamlakatimizda fuqarolarning huquq va erkinliklarini ishonchli himoya qilish kafolatlarini kengaytirish, sud tizimini isloh qilish, odil sudlovga erishish darajasini, sud ishi yurituvi sifatini, fuqarolarning huquqiy bilimi va madaniyatini oshirish, sud, huquq-tartibot idoralari xodimlari va keng jamoatchilik hamkorligini mustahkamlash borasida izchil ishlar olib borilayotgani taʼkidlandi. Shuningdek, mahalla fuqarolari oʻrtasida huquqbuzarliklarni oldini olish, fuqarolarning maʼnaviyatini hamda ularning huquqiy bilimi va madaniyatini yanada yuksaltirish maqsadida normativ-huquqiy hujjatlarning mazmun-mohiyati sud amaliyotidagi misollar bilan tushuntirib oʻtildi.

Tadbir jarayonida sudyalar tomonidan har bir fuqaro oʻzining huquqiy bilimi va madaniyatini yuksaltirib, jamiyatda aholining huquqiy bilimi va madaniyatini yanada oshirishda, mamlakatimizning har tomonlama rivojlanishida, yot gʻoyalarga berilmaslik va yoshlar oʻrtasidagi huquqbuzarlik va jinoyatchilikni oldini olishda oʻzlarining munosib hissasini qoʻshishlari lozimligi taʼkidlandi.

Shundan soʻng, sud raislari fuqarolar bilan yuzma-yuz suhbatlashib, ularning murojaatlarini qabul qildilar. Oʻtkazilgan sayyor qabullarda Kuyuk koʻpir ovulida 13 nafar, Xitoy ovulida 14 nafar, Boʻz yop ovulida 11 nafar, Tor yop ovulida 16 nafar fuqarolar turli muammolar yuzasidan murojaat etdilar. Qabullar chogʻida sud raislari har bir murojaatchini eshitib, oʻrtaga qoʻygan masalalari boʻyicha tegishli tartibda javob berdilar.Oʻrganish talab etiladigan murojaatlarga muddat belgilanib, fuqarolar bundan xabardor qilinishi aytildi.

Qabul davomidagi jami 44 ta murojaatdan 4 tasi kadastr hujjatlarini rasmiylashtirish, 6 tasi mutaxassislik boʻyicha ishga joylashish, qolganlari boshqa masalalar boʻyicha boʻldi. Murojaatlar sud raislari tomonidan qonun talablari asosida koʻrib chiqildi va fuqarolarga huquqiy tushuntirishlar berildi.

Yurtimiz aholisining sud idoralariga boʻlgan ishonchini mustahkamlash, huquqiy bilimini oshirishga qaratilgan ishlar koʻlamini yanada kengaytirish maqsadida oʻtkazilgan mazkur sayyor qabullarda ishtirok etgan fuqarolar sud masʼullariga oʻz minnatdorchiliklarini bildirdilar.

Qayrulla Atamurodov, Fuqarolik ishlari boʻyicha tuman sudi raisi.