OʻQIShNI OʻRGANGAN BOLALAR QUVONChI

Umumtaʼlim maktablarida oʻquv yilining ikkinchi chorak yakuni biri-biridan quvonchli voqealarga boy boʻldi. Ayniqsa, oʻquv yilining ikkinchi choragini muvaffaqiyatli yakunlagan oʻquvchilar Yangi yil tomoshalarida Qorbobo va Qorqiz tomonidan ragʻbatlantirilgani ularga yanada zavqli lahzalarni hadya etdi.

Tuman xalq taʼlimi boʻlimi tasarrufidagi 20-sonli umumtaʼlim maktabining 1-sinfiga mazkur oʻquv yilida 25 nafar oʻquvchi qabul qilindi. Sinf rahbari Dildora Jumaboyeva  oʻquvchilarni belgilangan dars-rejasiga muvofiq  oʻqitish, “Alifbo”ni mukammal oʻzlashtirishlari uchun zarur shart-sharoitlar yaratish maqsadida oʻquv yili boshidanoq taʼlim-tarbiya jarayonini uzviylik asosida puxta tashkil etdi. Innovatsion pedagogik texnologiyalardan samarali foydalangan holda har bir dars-mashgʻulotni koʻrgazmali vositalar asosida namunali tarzda amalga oshirdi.

Natijada oʻquv yilining ikkinchi choragi yakunlanmasidanoq oʻquvchilar “Alifbo” saboqlarini puxta  oʻzlashtirdilar. Alifboni oʻzlashtirib, oʻqish, yozishni oʻrgangan bolajonlar endilikda oʻzlari uchun qadrli boʻlgan Ona, Vatan kabi soʻzlarni hech qiynalmay oʻqiy oladi.

Joriy yilning 23-dekabr sanasida maktabda “Savodxonlik bayrami” tashkil etilib, unda 1-sinfning 25 nafar oʻquvchisi oʻzlarining “Alifbo”dan olgan saboqlarini amalda namoyish etishdi.

“Savodxonlik bayrami”ga bagʻishlangan maʼnaviy-maʼrifiy tadbirni maktab direktori Jahongir Matnazarov ochdi va 1-sinf oʻquvchilari va ularning ota-onalarini bayram bilan samimiy tabrikladi.

Shundan soʻng, farzandlarining quvonchlariga sherik boʻlish uchun bayram tadbiriga tashrif buyurgan oʻquvchilarning ota-onalari va maktab oʻqituvchilarining olqishlari ostida davraga oʻquvchilarning “Alifbo” kitobi  hamda ona tilimizdagi barcha harflarni ifoda etuvchi koʻrgazmali chiqishlari namoyish etildi. Bolalar alfavit tartibida saflanib, har bir harfning sheʼriy talqinini ifodalab berdilar. Bundan tashqari, oʻquvchilar oʻzlari yodlagan sheʼr va qoʻshiqlarni aytib berishib, ota-onalari hamda ustozlarini xursand qildilar.

Tadbir davomida bilimdon bolalarni tabriklash uchun ular davrasiga Qorbobo va Qorqiz sovgʻalari bilan kirib kelishdi. “Alifbo”dagi barcha harflarni tartibi bilan yoddan aytib bergan, tabiatdagi fasllar, ona tabiat neʼmatlari, ona Vatan, doʻstlik, tinchlik, ota-ona va mehr-oqibat mavzularida sheʼrlar aytgan oʻquvchilarga, 1-sinfning  ikkinchi choragini faqat “aʼlo” baholarga  yakunlagan bilimdon bolalarga Yangi yil sovgʻalari berildi.

“Savodxonlik bayrami”da 1-sinf oʻquvchilarini ularning ota-onalari ham tabriklab, sovgʻalar taqdim etishdi. Davraga kirib kelgan “Oʻqish kitobi va “Ona tili” kitoblarini quvonib qarshi olgan oʻquvchilar ota-onalari va ustozlari bilan raqsga tushdilar.

“Savodxonlik bayrami”da ishtirok etish, alifbodagi harflar bilan boshlanuvchi sheʼrlar aytish bolajonlarga oʻziga xos zavq bagʻishladi. Qolaversa, bayramda ota-onalarining ishtirok etgani bolajonlarning quvonchiga quvonch qoʻshdi. Ota-onalar ham farzandlarining yutuqlarini oʻz koʻzlari bilan koʻrib, ularning savodxon boʻlib olganidanqalblarida faxr-iftixor tuygʻularini tuydilar. Bu sana bolajonlar va ularning ota-onalarining qalbida bir umr muhrlanib qolishi tabiiy.

Risolat IBRAGIMOVA.