15-SONLI MAKTABDA “MENING KELAJAKDAGI KASBIM” ShIORI OSTIDA KASBLAR FESTIVALI OʻTKAZILDI

Umumtaʼlim maktablarida bitiruvchilarni qiziqishi va iqtidoriga koʻra aniq kasb tanlashlariga koʻmaklashish, yaratilgan shart-sharoitlardan oqilona, unumli foydalanishga undash orqali yoʻl koʻrsatish ularning mustaqil hayotga qadam qoʻyishlarida muhim ahamiyat kasb etadi. Kasbni toʻgʻri tanlagan tirishqoq, shijoatli yoshlar taʼlimning kelgusi bosqichida ham ilm sirlarini, kasb-hunarni puxta egallab, oʻz oldilariga qoʻygan ezgu maqsadlari sari dadil odimlayveradi.
Shu yil 18-dekabr kuni 15-sonli umumiy oʻrta taʼlim maktabda oʻquvchilarni kasb-hunarga yoʻnaltirish maqsadida “Mening kelajakdagi kasbim” shiori ostida kasblar festivali oʻtkazildi. Festivalda tumandagi boshqa maktablar direktorlari, psixologlari va oʻquvchilari ishtirok etdilar. Shuningdek, turli kasb egalari, yaʼni Qilichboy qishlogʻidagi tadbirkorlik bilan shugʻullanuvchi kasb egalari, chilangarlik, avtomobillarga xizmat koʻrsatish ustasi, yongʻin xavfsizligi xodimi, harbiylar, hududdagi 7-sonli oilaviy poliklinika xodimlari ham tashrif buyurdilar.
Festivalni 15-sonli maktab direktori Murodjon Boltayev ochib berdi va mamlakatimizda yoshlarning puxta bilim olishi, oʻzlari tanlagan kasb-hunarni egallashi, iqtidor va salohiyatini toʻlaqonli yuzaga chiqarishi uchun barcha sharoitlar yaratilganini taʼkidlab oʻtdi. Shu bilan birga mamlakatimizda uzluksiz taʼlim tizimini yuksaltirish va barkamol avlodni har tomonlama yetuk va barkamol komil inson qilib tarbiyalash maqsadida taʼlim sohasida koʻplab islohotlar amalga oshirilayotgani, maktabdagi sharoit, olib borilayotgan ishlar haqida soʻz yuritdi.
Taʼkidlanganidek, yoshlar kelajakda jamiyat rivojida oʻz hissalarini qoʻshishi, komil inson boʻlib yetishishlarida oʻz xohishi, moyilligi, qobiliyatiga mos kasb-hunar tanlashlari muhim ahamiyat kasb etadi. Oʻquvchilarning imkoniyatlar va qiziqishlarini hisobga olgan holda ularning jadal intellektual rivojlanishi chuqur, sohalashtirilgan, tabaqalashtirilgan kasbga yoʻnaltirilgan taʼlim olishini taʼminlaydi.
Zero, oʻquvchilarni kasb-hunarga yoʻnaltirish ishlari taʼlim-tarbiya bilan uzviy kechadigan, uning barcha qirralarini qamrab oladigan uzluksiz jarayondir. Oʻquvchilarning qiziqishlari, layoqatlari, qobiliyatlari va individual xususiyatlarini rivojlantirish kasb-hunarga yoʻl olayotgan har bir oʻsmir uchun juda muhimdir. Bunday tadbirlar oʻquvchilarning kasbiy qaror qabul qilishi, ongli ravishda kasb tanlashiga yoʻnalish berishi bilan ahamiyatlidir.
Tadbirga tashrif buyurgan turli kasb egalari oʻz kasblari haqida tushunchalar berdilar. Tadbirkorlar ularga tadbirkorlik faoliyatini boshlash, imtiyozli kredit olish tartibi xususida maʼlumotlar, tavsiyalar berib, yoʻl-yoʻriq koʻrsatdilar.
Festival jarayonida maktabdagi “Duradgorlik”, “Bichish-tikish”, “Oshpazlik”, “Qandolatchilik”, “Yosh ximiklar”, “Munchoq toʻqish”, “Yosh gulchilar” kabi toʻgaraklar rahbarlari va oʻquvchilar tashkil etgan koʻrgazmalar barchaga manzur boʻldi va katta qiziqish uygʻotdi.
Tadbir davomida bitiruvchi oʻquvchilar oliy taʼlim oʻquv yurtlarida oʻzlari tanlab olgan taʼlim yoʻnalishi boʻyicha bilim saviyalarini oshirish hamda fanni chuqur oʻrganishga qaratilgan maxsus koʻnikmalarini oʻzlarida shakllantirish imkoniyatiga ega boʻlishlari haqidagi keng maʼlumotlarga ham ega boʻldilar.
Festival davomida maktabning boshlangʻich sinf oʻquvchilari qoʻgʻirchoq teatri tomoshalarini ijro etib, tadbirga bayramona kayfiyat baxsh etdilar.

Iskandar Iskandarov, 15-sonli maktab direktorining

maʼnaviy-maʼrifiy ishlar boʻyicha oʻrinbosari.