“KASBLAR – KELAJAK KAFOLATI” ShIORI OSTIDA SAYoHAT TAShKIL ETILDI

Umumtaʼlim maktablarida dekabr – ijtimoiy fanlar oyligi doirasida maktab amaliyotchi-psixologlari tomonidan “Kasblar festivali”, “Kasblar – kelajak kafolati”, “Kasbim - faxrim” mavzularida davra suhbatlari, koʻrgazmali oʻquv-seminarlari, turli kasb egalari bilan uchrashuvlar oʻtkazilmoqda.

Ana shunday tadbirlardan biri 42-sonli maktabda ham oʻtkazildi. Ijtimoiy fanlar oyligi doirasidagi “Kasblar – kelajak kafolati” mavzusida oʻtkazilgan psixologik suhbatda oʻquvchi-yoshlar qiziqishlari, orzu-intilishlari, oʻzlari tanlagan kasblarni egallash xususidagi rejalari bilan oʻrtoqlashdilar.

Psixologik davra suhbatidan soʻng, maktabning 10-11-sinf oʻquvchilari uchun Amudaryo muhandislik texnikumiga va “Tamara tekstil” MChJ korxonasiga sayohat uyushtirildi.

Maktabning amaliyotchi-psixologi Aziza Qodirberganova rahbarligida tashkil etilgan mazkur sayohat orqali oʻquvchi-yoshlar kelajakda oʻzlari egallamoqchi boʻlgan kasblar boʻyicha zarur maʼlumotlarga ega boʻldilar. Ayniqsa, Amudaryo muhandislik texnikumida talaba-yoshlar uchun yaratilgan shart sharoitlar, yotoqxona majmuasi, oʻquv auditoriyalari, kutubxona, maʼnaviy-maʼrifiy tadbirlar uchun moʻljallangan zal hamda laboratoriya-amaliy mashgʻulotlar xonalari bilan yaqindan tanishdilar. Shuningdek, texnikumda 2021-2022-yil uchun belgilangan qabul kvotalari, kasb yoʻnalishlari haqidagi maʼlumotlarga ega boʻldilar.

Shundan soʻng, oʻquvchi-yoshlar “Tamara tekstil” MChJga ham borib, korxona rahbari Tamara Yusupova tomonidan amalga oshirilayotgan ishlar, ayniqsa, korxona chevarlari tayyorlagan zamonaviy kiyim-boshlar, korxonada eksportga yoʻnaltirilayotgan tayyor mahsulotlar taxlamlari bilan ham tanishdilar.

Korxona rahbari Tamara Yusupova oʻquvchi-yoshlarga tadbirkorlik sohasining oʻziga xos sir-sinoatlari, xalqimizga foydasi xususida soʻzlab berdi. Sayohat davomida oʻquvchi-yoshlar tadbirkorlik sohasiga oid, shuningdek liboslar dizayni boʻyicha oʻzlarini qiziqtirgan savollarga batafsil javob oldilar. Mazkur sayohat oʻquvchi-yoshlarning oʻz hayot yoʻlini toʻgʻri belgilash, oʻzi uchun manzur kasbni tanlashlarida muhim ahamiyat kasb etdi.

Robiya YOʻLDOShEVA,
42-sonli umumtaʼlim maktabi ijodiy-madaniy masalalar boʻyicha targʻibotchisi.