36-SONLI MAKTABDA “KONSTITUTsIYa BAXTIMIZ QOMUSI” DEB NOMLANGAN TADBIR OʻTKAZILDI

Mamlakatimiz boʻylab Oʻzbekiston Konstitutsiyasining 29 yilligi keng nishonlandi. Hududlarda, korxona-tashkilotlarda, shu qatorida umumtaʼlim maktablarida ham ushbu bayram munosabati bilan turli tadbirlar tashkil etildi.

Konstitutsiyasining 29 yilligi arafasida 36-sonli maktabda ham oʻquvchilarning huquqiy ongini yuksaltirish va olgan bilimlarini mustahkamlash maqsadida darslarda “Konstitutsiyani oʻrganamiz”, “Konstitutsiya - mening taqdirimda” mavzularida maʼnaviy-maʼrifiy tadbirlar, davra suhbatlari oʻtkazildi.

7-dekabr kuni 36-sonli umumiy oʻrta taʼlim maktabining 6-“A” sinfi oʻquvchilari tomonidan “Konstitutsiya —  baxtimiz qomusi” deb nomlangan tantanali tadbir boʻlib oʻtdi. Tarix fani oʻqituvchisi Nurbek Ataxanov va sinf rahbari Dilnura Boboniyozovalar tomonidan tashkil etilgan mazkur tadbirga maktab oʻquvchilari va oʻqituvchilar taklif etildi.

Soʻzga chiqqanlar barchani qutlugʻ bayram bilan muborakbod etib, Konstitutsiyamizning tarixi, bugungi kundagi oʻrni va ahamiyati, soʻnggi yillarda mamlakatimizda amalga oshirilayotgan islohotlar, ularning mohiyati va mazmuni haqida toʻxtalib oʻtdilar. Shuningdek, Konstitutsiyamizda bizning bosh maqsadimiz – faqat huquqiy demokratik davlat emas, balki adolatli jamiyat qurish ekani aniq-ravshan belgilab berilgani xususida keng toʻxtaldilar. Xalqimizning adolat va haqiqatga intilish, adolatli jamiyat qurishdek asriy orzularini amalga oshirish uchun huquqiy demokratik davlat va adolatli jamiyat qurish borasidagi konstitutsiyaviy normalarni hayotga tizimli ravishda, keng joriy etish ustuvor vazifamiz boʻlishi kerakligini eʼtirof etdilar. Bosh Qomusimiz jamiyat va fuqarolar, ayniqsa, yoshlar hayotida muhim ahamiyat kasb etishini alohida aytib oʻtdilar.

Taʼkidlanganidek, bugungi kunda Bosh qomusimiz mamlakatimizda suveren demokratik davlat barpo etish, inson manfaatlari, huquq va erkinliklarini taʼminlash, iqtisodiyotimiz rivoji va turmushimiz farovonligini yuksaltirishning asosiy huquqiy kafolati boʻlib xizmat qilmoqda. Konstitutsiyaning muhim jihati, unda inson huquqlari eng oliy qadriyat sifatida eʼtirof etilganidir. Zero, Bosh Qomusimizning barcha tamoyillari, avvalo, inson va fuqarolar huquq va erkinliklarini himoya qilishga qaratilgan boʻlib, davlatning majburiyati ushbu huquq va erkinliklarni taʼminlashda aks etadi.

Oʻquvchilar tomonidan Konstitutsiyaga bagʻishlab oʻzbek, rus va ingliz tillarida sheʼrlar oʻqildi, Konstitutsiyaning ayrim moddalari keltirilib, ular boʻyicha keng tushunchalar berildi. Sahna koʻrinishi, raqslar va qoʻshiqlar ijro etildi.

Bunday tadbirlar oʻquvchilarda Vatanga muhabbat, bosh Qomusimiz-Konstitutsiyamizga hamda davlatimiz ramzlariga hurmat tuygʻularini shakllantirishda katta ahamiyatga ega. Oʻquvchilar tadbir davomida davlatimizning Asosiy Qonuni – Konstitutsiya haqida oʻzlarining nechogʻliq darajada chuqur bilimlarga ega ekanligini namoyish etdilar.

Qiziqarli va koʻtarinki ruhda oʻtgan tadbir oʻquvchilarning Konstitutsiya haqidagi bilim va tushunchalarini yanada boyitdi.

O.Xudoyberganova, 36-sonli maktabning ijodiy-madaniy masalalar boʻyicha targʻibotchisi.